ខេត្តបាត់ដំបង ៖ ក្រោយពីទទួលពាក្យបណ្ដឹងជនរងគ្រោះ (ស្រីស្នេហ៏) ក្នុងសំណុំរឿង«ហិង្សាដោយចេតនា» កម្លាំងអធិការក្រុងបាត់ដំបងបាននិងកំពុងស្វែងរកឃាត់ខ្លួនមន្ត្រីកងរាជអាវុធហត្ថម្នាក់ ដែលរងការចោទប្រកាន់ក្នុងសំណុំរឿងនេះ ។ នេះបើតាមការឲ្យដឹងពីលោក ពេជ្រ…
ខេត្តបាត់ដំបង ៖ ក្រោយពីទទួលពាក្យបណ្ដឹងជនរងគ្រោះ (ស្រីស្នេហ៏) ក្នុងសំណុំរឿង«ហិង្សាដោយចេតនា» កម្លាំងអធិការក្រុងបាត់ដំបងបាននិងកំពុងស្វែងរកឃាត់ខ្លួនមន្ត្រីកងរាជអាវុធហត្ថម្នាក់ ដែលរងការចោទប្រកាន់ក្នុងសំណុំរឿងនេះ ។ នេះបើតាមការឲ្យដឹងពីលោក ពេជ្រ សារ៉ែន អធិការក្រុងបាត់ដំបង ។
លោក ពេជ្រ សារ៉ែន បានថ្លែងប្រាប់កោះសន្តិភាព នៅព្រឹកថ្ងៃទី២៥ កុម្ភៈ នេះថា មន្ត្រីជំនាញរបស់លោក បាននិងកំពុងស្វែងរកឃាត់ខ្លួនជនសង្ស័យម្នាក់ ដែលមានមុខងារជាមន្ត្រីកងរាជអាវុធហត្ថខេត្តបាត់ដំបង ។ លោកអធិការរូបនេះបានបញ្ជាក់ថា ជនសង្ស័យបានរងការចោទប្រកាន់ពីស្ត្រីរងគ្រោះម្នាក់ដែលទំនងជាគូស្នេហ៍នឹងគ្នាផង បានប្រើអំពើហិង្សាយ៉ាងឃោរឃៅទៅលើនាងបណ្ដាលឲ្យរងរបួសលើរាងកាយ ។ ប៉ុន្តែជនសង្ស័យរូបនេះកំពុងគេចខ្លួន ហើយកម្លាំងរបស់លោកនៅតែបន្តស្វែងរកនៅឡើយទេ ។
បើតាមមន្ត្រីជំនាញបានឲ្យដឹងថា នារីរងគ្រោះឈ្មោះ លឿត ស្រីណយ អាយុ២៤ឆ្នាំ រស់នៅភូមិបាក់ព្រា ឃុំព្រៃចាស់ ស្រុកឯកភ្នំ ។ ដោយឡែក ជនរងសង្ស័យដែលរងបណ្ដឹងចោទប្រកាន់ឈ្មោះ នូ មិត្ត ជាមន្ត្រីកងរាជអាវុធហត្ថខេត្តបាត់ដំបង ។ មន្ត្រីដដែលបានប្រាប់ថា ជនសង្ស័យ និងនារីរងគ្រោះជាគូសង្សារយ៉ាងស៊ីជម្រៅ ។
នារីគ្រោះបានទៅដាក់ពាក្យបណ្ដឹងនៅអធិការនគរបាលក្រុងបាត់ដំបងនៅរសៀលថ្ងៃទី១៧ កុម្ភៈ ក្រោយនាងព្យាយាមទៅដាក់ពាក្យបណ្ដឹងនៅទីបញ្ជាការកងរាជអាវុធហត្ថខេត្តមិនបានសម្រេច ។
ជនរងគ្រោះឈ្មោះ លឿត ស្រីណយ បានបញ្ជាក់ប្រាប់កោះសន្តិភាពតាមទូរស័ព្ទនៅរសៀលថ្ងៃទី ២៥ កុម្ភៈ ថា ហេតុការណ៍បានកើតឡើងនៅវេលារំលងអធ្រាត្រឈានចូលថ្ងៃទី១៧ កុម្ភៈ នៅផ្ទះជួលរបស់គូស្នេហ៍នៅក្នុង «បុរីរំចេក» ស្ថិតក្នុងភូមិរំចេក៤ សង្កាត់រតនៈ ក្រុងបាត់ដំបង ។ នាងណយប្រាប់ថា សង្សារហេងស៊យរបស់នាងឈ្មោះ នូ មិត្ត ធ្វើប៉េអឹមនៅខេត្តបាត់ដំបង ។
រូបនាងនិងលោកប៉េអឹមឈ្មោះមិត្តនេះ មានទំនាក់ទំនងស្នេហាជាមួយគ្នាយ៉ាងស៊ីជម្រៅអស់រយៈពេលប្រហែល០២ឆ្នាំកន្លងមកហើយ គីតត្រឹមថ្ងៃប្រើហិង្សាមកលើនាង។
នាងនិយាយថា នៅមុនកើតហេតុ នាងបានតាមទាន់គូស្នេហ៍របស់នាងនាំស្រីផ្សេងចូលខារ៉ាអូខេ។ ដោយសារតែនាងខឹង នាងក៏សុំបែក និងសុំទារលុយដែលជំពាក់នាង ។ នាងបានបញ្ជាក់ថា ប្រហែលត្រង់ចំណុច «នាងតាមទាន់មានស្រីថ្មី និងទាមទារលុយជំពាក់» នេះហើយ ទើបលោកប៉េអឹម នូ មិត្ត ខឹងនឹងនាង ។ លុះពេលចូលទៅដល់ក្នុងផ្ទះនៅវេលារំលងអធ្រាត្រ ស្រាប់តែស្ទុះទៅវាយទាត់ធាក់នាងគ្មានប្រណីដៃទាំងកណ្ដាលអធ្រាត្រ ពេលនាងកំពុងរៀបចំអីវ៉ានចាកចេញពីផ្ទះ។
ជុំវិញសំណុំរឿងលោកប៉េអឹមឈ្មោះ នូ មិត្ត ប្រើអំពើហិង្សាយ៉ាងឃោរឃៅទៅលើគូស្នេហ៍បណ្ដាលឲ្យរងរបួសពេញរាងកាយខាងលើនេះ បើតាមជនរងគ្រោះបានប្រាប់ថា មិនត្រឹមតែវាយដំទៅលើនាងយ៉ាងព្រៃផ្សៃប៉ុណ្ណោះទេ ជនសង្ស័យឈ្មោះ នូ មិត្ត រូបនេះ បានផ្ញើសារជាសម្លេងតាមទូរស័ព្ទជាបន្តបន្តាប់ ទៅគំរាមកំហែងនាងគ្រប់បែបយ៉ាង ហើយថែមទាំងជម្រុញនាងឲ្យទៅប្ដឹងនៅតុលាការ កុំប្ដឹងត្រឹមតែអធិការក្រុង ឬចង់ប្ដឹងដល់ណាក៏បានដែរ ។
នៅក្នុងសារជាសម្លេងជាច្រើនឃ្លីបដែលកោះសន្តិភាពទទូលបានជាបន្តបន្ទាប់ មានឃ្លីបសម្លេងខ្លះ លោកប៉េអឹម នូ មិត្ត បានប្រាប់ជនរងគ្រោះដែលជាគូស្នេហ៏ ក្រោយពីដឹងថា នាងបានដាក់ពាក្យប្ដឹងខ្លួនទៅកាន់អធិការក្រុងបាត់ដំបង ជនសង្ស័យរូបនេះអួតប្រាប់នាងដូច្នេះថា « ខ្ញុំមានពេលណាទៅចឹង… ចឹង… ទេ។ ទៅអធិការក្រុងវាតូចណាស់ ទៅលើសហ្នឹងទៅ… ទៅតុលាការអីចឹងទៅណា…» ជននេះបានអួតទៀតថា «ទៅអធិការក្រុង វាទៅមិនកើត ដោយសារអធិការក្រុងវាពួកម៉ាក់ទៅមិនកើត»។
ក្នុងឃ្លីបសម្លេងមួយឃ្លាទៀត «ហើយបើធ្វើខ្ញុំបាន ខ្ញុំសុខចិត្តកាត់ម្រាមកូនដៃមួយចោល»។ នៅក្នុងចំណោមឃ្លីបសម្លេងរាប់សិបឃ្លីបទៀតដែលភាគច្រើនជាសម្លេងគំរាមកំហែងនាង ។ មិនត្រឹមតែប៉ុណ្ណឹងទេ មានឃ្លីបសម្លេងមួយឃ្លាដែលមន្ត្រីកងរាជអាវុធហត្ថ សំបូររឿងអាស្រូវស្រីញីមិនចេះចប់រូបនេះបានផ្ញើទៅអួតប្រាប់នាងថា «អ្នកឯងស្គាល់ខ្ញុំតិចពេកហើយ..! ម៉ាស្រុកខ្មែរចង់និយាយថា មេដែលឡើងធំទាំងអស់ ម៉ាស្រុកខ្មែរ… គេស្រលាញ់ខ្ញុំដូចប្អូនបង្កើត សុទ្ធតែអគ្គ… ទាំងអស់ អគ្គព្រះរាជអាជ្ញាទាំងអស់… ចង់លេង លេងបាន,,.»។
ពាក់ព័ន្ធនឹងពាក្យមួយឃ្លីបដែលលោក នូ មិត្ត អួតកំញើញស្រីស្នេហ៍ថា «លោកអធិការក្រុងបាត់ដំបង ជាពួកម៉ាក់របស់ខ្លួន» ។ លោក ពេជ្រ សារ៉ែន អធិការក្រុងបាត់ដំបង បានបដិសេធន៍ភ្លាមៗ ចំពោះអំនូតជនសង្ស័យឈ្មោះ នូ មិត្ត ។ លោក ពេជ្រ សារ៉ែន បានឆ្លើយតបវិញថា «កុំថាឡើយពួកម៉ាក សូម្បីស្គាល់ប្រវត្តិជនម្នាក់នេះ ក៏លោកស្ទើរមិនស្គាល់ផង» ។
លោកអធិការបានបញ្ជាក់ថា «ខ្ញុំធ្លាប់ទៅជួបមិត្តភក្ដិរបស់ខ្ញុំក្នុងកម្មវិធីមួយ ។ ហើយចៃដន្យបានជួបឈ្មោះ មិត្ត នេះ តាមរយៈមិត្តភក្ដិរបស់ខ្ញុំក្នុងគ្រាហ៍នោះ ថែមទាំងបានថតរូបជុំគ្នាមួយប៉ុស្ដិ៍ទៀតផង ។ ក្នុងកាលៈទេសៈបែបនេះ ជនសង្ស័យម្នាក់នេះ មិនមែនជាមិត្តភក្ដិខ្ញុំទេ។ ខ្ញុំទើបស្គាល់ប៉ុណ្ណឹងឯង» ។
យ៉ាងណាក្ដី បើតាមលោក ពេជ្រ សារ៉ែន បានបញ្ជាក់ថា «បើតាមខ្ញុំដឹង ជនម្នាក់នេះកំពុងយកឈ្មោះថ្នាក់ដឹកនាំមួយចំនួនទៅភ្ជាប់ជាមួយនឹងរឿងអាស្រូវរបស់ខ្លួនដែលកំពុងមានរឿងរ៉ាវជាមួយស្ត្រីរងគ្រោះ ខណៈដែលថ្នាក់ដឹកនាំមិនដឹងខ្លួនបន្តិចសោះ» ។ ប៉ុន្តែពេលនេះ កម្លាំងជំនាញរបស់លោកបាននិងកំពុងតាមរកមុខ ដើម្បីឃាត់ខ្លួនតាមបណ្ដឹងជនរងគ្រោះហើយ។
ដោយឡែក បើតាមសម្ដីនារីរងគ្រោះ ដែលជាអតីតគូស្នេហ៍ហេងស៊យវិញ បានបញ្ជាក់ចុងក្រោយថា នាងនឹងបញ្ជាក់ការទំនាក់ទំនងជាមួយឈ្មោះមិត្តនេះហើយ ។ នាងមិនអាចសម្របសម្រួលជាមួយលោកប៉េអិមឈ្មោះ នូ មិត្ត នេះបន្តទៀងទេ។ នាងសំណូមពរសុំឲ្យសមត្ថកិច្ច ចាត់ការតាមផ្លូវច្បាប់ហើយ៕
ចែករំលែកព័តមាននេះ