ខេត្តបាត់ដំបង ៖ អគ្គិភ័យឆេះកញ្ជ្រាំងក្នុងស្រែរាប់សិបហិកតាចំនួន០២កន្លែងផ្សេងគ្នាក្នុងពេលតែមួយ ដែលបង្កឲ្យមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋ និងសមត្ថកិច្ចបញ្ចេញកម្លាំងនិងរថយន្តពន្លត់អគ្គិភ័យព្រោងព្រាត ដើម្បីជួយអន្តរាគមន៍ កាលពីវេលាម៉ោង១០ និង៣០នាទីយប់ថ្ងៃទី២៤ កុម្ភៈ នៅក្នុងឃុំកំពង់ព្រះ…
ខេត្តបាត់ដំបង ៖ អគ្គិភ័យឆេះកញ្ជ្រាំងក្នុងស្រែរាប់សិបហិកតាចំនួន០២កន្លែងផ្សេងគ្នាក្នុងពេលតែមួយ ដែលបង្កឲ្យមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋ និងសមត្ថកិច្ចបញ្ចេញកម្លាំងនិងរថយន្តពន្លត់អគ្គិភ័យព្រោងព្រាត ដើម្បីជួយអន្តរាគមន៍ កាលពីវេលាម៉ោង១០ និង៣០នាទីយប់ថ្ងៃទី២៤ កុម្ភៈ នៅក្នុងឃុំកំពង់ព្រះ និងឃុំអូរដំបង២ ស្រុកសង្កែ ដែលជាទង្វើរបស់ម្ចាស់ស្រែតែម្ដង ។
អធិការស្រុកសង្កែ លោក យុត តុងហូ បានឲ្យដឹងថា អគ្គិភ័យទាំង០២លើកនេះ កើតឡើងស្ទើរព្រមៗគ្នាពេលតែមួយ ។ លោកបានប្រាប់ថា ដំបូងយើងទទូលដំណឹងពីអគ្គិភ័យដែលបានឆេះកញ្ជ្រាំងក្នុងស្រែនៅចំណុចភូមិបញ្ញា ឃុំកំពង់ព្រះ ។
លោកថា បន្ទាប់ពីទទួលបានព័ត៌មាននេះ កម្លាំងជំនាញបានបញ្ចេញរថយន្តពន្លត់អគ្គិភ័យភ្លាមៗ ដើម្បីជួយអន្តរាគមន៍ដែលមានកិច្ចសហការពីមន្ត្រីមូលដ្ឋាន និងប្រជាពលរដ្ឋរាប់សិបនាក់ផង។ លោកអធិការបានបញ្ជាក់ដែរថា នៅពេលកម្លាំងចម្រុះរាប់សិបនាក់ មានទាំងការប្រើប្រាស់រថយន្តពន្លត់អគ្គិភ័យផង កំពុងប្រយុទ្ធនឹងកម្លាំងភ្លើងដែលកំពុងឆេះរាលដាលកាន់ខ្លាំង ពាសពេញស្រែនៅចំណុចខាងលើមិនទាន់ថមថយផង ស្រាប់តែភ្លាមៗមានសេចក្ដីរាយការណ៍បន្ថែមទៀតថា
«អគ្គិភ័យ» បាននិងកំពុងឆេះកញ្ជ្រាំងក្នុងស្រែរាលដាលយ៉ាងខ្លាំងអស់រាប់សិបហិចតាដែរ នៅចំណុចភូមិបញ្ញា ឃុំអូរដំបង២។ ពេលនោះ កម្លាំងរបស់លោកទាំងនៅក្នុងអធិការទាំងនៅក្នុងមូលដ្ឋាន រួមទាំងប្រជាពលរដ្ឋផង ថែមទាំងបានចល័តរថយន្តពន្លត់អគ្គិភ័យជួយអន្តរាគមន៍ស្ទើរវិលក្បុង តែយើងគ្រប់គ្រងបានមុនពេលឆេះរាលដាលជិតចូលដល់ក្នុងភូមិ ។
ជុំវិញករណីគ្រោះអគ្គិភ័យដ៏កក្រើករាត្រី និងដ៏គ្រោះថ្នាក់ខាងលើនេះ បើយោងតាមរបាយ
ការណ៍អធិការស្រុកសង្កែដែលបានរាយការណ៏ជួនការិយាល័យជំនាញបានឲ្យដឹងថា អគ្គិភ័យដែលឆេះកញ្ជ្រាំងនៅភូមិបញ្ញា ឃុំកំពង់ព្រះ លើទំហំដីប្រមាណ៦០ហិចតា ដោយឡែក នៅឯភូមិស្វាយធំ ឃុំអូរដំបង២ ភ្លើងបានឆេះកញ្ជ្រាំងលើទំហំដីប្រមាណ៣០ហិចតា ។
លោក យុត តុងហូ អធិការស្រុកសង្កែបានបញ្ជាក់ថា អគ្គិភ័យដែលឆេះកញ្ជ្រាំងក្នុងស្រែទាំង០២កន្លែងនេះ គឺម្ចាស់ស្រែជាអ្នកដុតផ្ទាល់ ។ លោកបានបន្ថែមថា កម្លាំងយើងបានទប់ស្កាត់ និងពន្លត់ភ្លើងឆេះកញ្ជ្រាំងទាំង០២កន្លែងនេះបានទាំងស្រុង ហើយយើងក៏បានស្នើឲ្យអាជ្ញាធរដែនដីអញ្ជើញម្ចាស់ស្រែ ដែលជាអ្នកបង្កអគ្គិភ័យផ្អើលពេញស្រុកយកទៅសួរនាំធ្វើការអប់រំ និងធ្វើកិច្ចសន្យាផងដែរ ។
បើតាមការស្រង់សម្ដីម្ចាស់ស្រែដែលជាអ្នកបង្កអគ្គិភ័យបានទទួលស្គាល់កំហុសរបស់ខ្លួនថា ខ្លួនពិតជាអ្នកបានដុតកញ្ជ្រាំងក្នុងស្រែរបស់ខ្លួនមែន តែវាបានឆេះរាលដាលដល់ស្រែអ្នកក្បែរខាង ទើបបង្កឲ្យមានការភ្ញាក់ផ្អើលតែម្ដង ។ អ្នកបង្កអគ្គិភ័យបានបញ្ជាក់ពីមូលហេតុដែលខ្លួនដុតដូច្នេះថា «ខ្លួនដុតកញ្ជ្រាំងក្នុងស្រែបែបនេះ ដើម្បីឲ្យដីធូរភ្ជួរស្រួល តែបើមិនដុតទេ ភ្ជួរមិនចូលឡើយ» ។
លោក យុត តុងហូ បានបញ្ជាក់ដែរថា អគ្គិភ័យឆេះកញ្ជ្រាំងខាងលើនេះ បានឆេះរាលដាលគូរឲ្យបារម្ភបំផុត ហើយកន្លែងខ្លះ ឆេះឆ្លងជិតចូលដល់ផ្ទះអ្នកភូមិ តែសំណាងល្អកម្លាំងយើងជួយពន្លត់ទាន់ពេល ។
យ៉ាងណាក្ដី តាមរយៈកោះសន្តិភាព លោកអធិការស្រុកសង្កែ បានអំពាវនាវដល់ប្រជាពលរដ្ឋនៅតាមមូលដ្ឋាន មេត្តាសូមកុំដុតកញ្ជ្រាំង ឬស្មៅ នៅតាមស្រែឬនៅតាមចម្ការ ព្រោះអាចបង្កឲ្យមានហានិភ័យខ្លាំងណាស់ ។
អគ្គិភ័យឆេះកញ្ជ្រាំងក្នុងស្រែនេះ បើទប់ស្កាត់មិនទាន់ពេលទេ វាអាចឆេះរាលដាលចូលដល់ក្នុងភូមិ ហើយអាចនឹងឆេះលំនៅឋានប្រជាពលរដ្ឋតែម្ដង។ ដូច្នេះ សូមបងប្អូនប្រជាពលរដ្ឋត្រូវតែ
បញ្ឈប់សកម្មភាពដុតកញ្ជ្រាំងតាមស្រែនេះទៀត យើងត្រូវចូលរួមទប់ស្កាត់ និងត្រូវប្រុងប្រយ័ត្នចំពោះគ្រោះអគ្គិភ័យនេះ ។ ព្រោះនេះជារដូវប្រាំង ក្ដៅហូតហែងដែលអគ្គិភ័យអាចកើតមានឡើងដោយថាហេតុយ៉ាងងាយបំផុត៕
ចែករំលែកព័តមាននេះ