ខេត្តកំពង់ស្ពឺ ៖ ល្បែងស៊ីសងគ្រប់ប្រភេទបានបើកដំណើរការវិញហើយនៅក្នុងស្រុកភ្នំស្រួច នៃខេត្តកំពង់ស្ពឺ បន្ទាប់ពីបិទមួយរយៈខ្លីប្រមាណមួយដង្ហើមចង្រិត ព្រោះមានអ្នកញៀនល្បែងច្រើនណាស់ ។ ទីតាំងល្បែងស៊ីសងគ្រប់ប្រភេទមាន (បញ្ជល់មាន់ ជល់មាន់តាមអនឡាញ…
ខេត្តកំពង់ស្ពឺ ៖ ល្បែងស៊ីសងគ្រប់ប្រភេទបានបើកដំណើរការវិញហើយនៅក្នុងស្រុកភ្នំស្រួច នៃខេត្តកំពង់ស្ពឺ បន្ទាប់ពីបិទមួយរយៈខ្លីប្រមាណមួយដង្ហើមចង្រិត ព្រោះមានអ្នកញៀនល្បែងច្រើនណាស់ ។
ទីតាំងល្បែងស៊ីសងគ្រប់ប្រភេទមាន (បញ្ជល់មាន់ ជល់មាន់តាមអនឡាញ បៀរ អាប៉ោង និងកន្ទុយលេខ) ខុសច្បាប់ជាច្រើនកន្លែងនៅម្តុំផ្សារត្រែងត្រយឹង ស្រុកភ្នំស្រួច ខេត្តកំពង់ស្ពឺ ក្នុងនោះ មានមួយកន្លែងធំជាងគេដែលគេស្គាល់ម្ចាស់ គឺលោកម៉ៅ ហៅមេ(១១) ដ៏ល្បីល្បាញដុះស្លែយូរហើយ អ្នកណាក៏ស្គាល់ដែរ ។
លោក ម៉ៅ ហៅមេ(១១)នេះ ត្រូវបានប្រភពបង្ហើបថា មានខ្នងបង្អែកគ្រាក់ៗនៅពីក្រោយ ធ្វើជាខ្នងបង្អែកទៀតផង។
បើអ្នកណាចង់ទៅលេងល្បែងបញ្ជល់មាន់និងអាប៉ោង អាចធ្វើដំណើរចេញពីភ្នំពេញតាមបណ្តោយផ្លូវសហព័ន្ធរុស្សី ឆ្ពោះមកផ្លូវជាតិលេខ៤ ឆ្លងកាត់ទីរួមខេត្តកំពង់ស្ពឺ ដល់បង្គោលគីឡូម៉ែត្រលេខ៨៦~៨៧ ផ្សារត្រែងត្រយឹង បត់ស្តាំចូលទៅឧទ្យានជាតិគីរីរម្យប្រហែល៥~៦គីឡូម៉ែត្រ និងទៅដល់ស្ថានីយ៍ប្រេងយីហោ តេលា រួចបត់ឆ្វេងចូលតាមចំការស្វាយប្រហែលជាង១គីឡូម៉ែត្រ នឹងបានទៅដល់សង្វៀនបញ្ជល់មាន់របស់លោកម៉ៅ ហៅមេ(១១)ហើយ ។ អាចចូលទៅលេងល្បែងស៊ីសងផ្សេងៗទៀតបាន មិនបារម្ភអ្វីឡើយ។
ប្រភពបន្តថា បើទោះបីជាកន្លងទៅឯកឧត្តម វ៉ី សំណាង អភិបាលខេត្តកំពង់ស្ពឺចាស់ ផ្លាស់ប្តូរ ដល់លោក ជាម ច័ន្ទ សោភ័ណ បានចេញបញ្ជាឱ្យសមត្ថកិច្ចធ្វើការបង្ក្រាបល្បែងស៊ីសងគ្រប់ប្រភេទក៏ដោយ ក៏ឈ្មោះ ម៉ៅ ហៅមេ(១១) នៅតែគឃ្លើនមិនខ្លាចឡើយបន្តលេងរាល់ថ្ងៃ គូពិសេសគឺថ្ងៃច័ន្ទ ថ្ងៃព្រហស្បតិ៍ និងថ្ងៃសៅរ៍ ហើយភ្នាល់លុយរាប់ពាន់ ម៉ឺនដុល្លារអាមេរិក ដ៏ល្បីល្បាញ…បើត្រូវការលេង សូមអញ្ជើញ ធានាគ្មានអ្នកចាប់ទេ ។
ប្រជាពលរដ្ឋដែលរស់នៅម្តុំផ្សារត្រែងត្រយឹងនិយាយថា÷ ម្ចាស់ទីតាំងល្បែងគ្រប់កន្លែងនេះ ដែលហ៊ានបើកល្បែងស៊ីសងដូចជា (ជល់មាន់និងអាប៉ោង) ខុសច្បាប់ ទុកឲ្យក្រុមញៀនល្បែងទាំងនោះទៅលេងភ្លូកទឹក ភ្លូកដី មិនដែលឃើញបង្ក្រាបម្តងណាឡើយ។
បើនិយាយពីល្បែងកន្ទុយលេខវិញ នៅក្នុងផ្សារត្រែងត្រយឹង មានមិនក្រោមពី១០កន្លែងឡើយ និយាយរួមផ្សារត្រែងត្រយឹងនិងប៉ុស្តិនគរបាលរដ្ឋបាលឃុំត្រែងត្រយឹងនៅក្បែរគ្នា។
ប្រជាពលរដ្ឋលើកឡើងបន្ថែមទៀតថា បុគ្គល ម៉ៅ ហៅមេ(១១) ដែលហ៊ានបើកល្បែងស៊ីសងគ្រប់ប្រភេទដោយខុសច្បាប់ដែលមានទីតាំងខាងលើ កំពុងឲ្យបក្ខពួករបស់ខ្លួនដើរកៀងគរក្រុមញៀនល្បែងគ្រប់មជ្ឈដ្ឋានឲ្យទៅលេងភ្នាល់លុយ ចាញ់ឈ្នះ រាប់លានរៀល ដល់រាប់ពាន់ម៉ឺនដុល្លារ ឯណោះ (ពោលគឺ) ភ្នាល់លុយច្រើនៗទៅតាមការកំណត់គ្នា គូធម្មតា ឬគូរពិសេស។បើនិយាយពីការប៉ុងលុយ និងដកតុងក្នុងការជល់មាន់វិញមិនក្រោមពី២០លានរៀលនោះទេក្នុងមួយថ្ងៃ ។
ប្រជាពលរដ្ឋជាច្រើនរូបរស់នៅតំបន់ត្រែងត្រយឹងបានបង្ហាញនូវក្តីកង្វល់ថា រស់នៅសព្វថ្ងៃនេះ ពួកគាត់មានការព្រួយបារម្ភយ៉ាងខ្លាំង បញ្ហាសុខទុក្ខ សុវត្ថិភាពរបស់ពួកគាត់ ព្រោះថា ទីណាមានល្បែងស៊ីសង ទីនោះ មិនយូរមិនឆាប់នោះទេ និងកើតមានបទល្មើសផ្សេងៗដូចជា ចោរលួច ឆក់ ប្លន់ ជាពិសេស អំពើហិង្សាក្នុងគ្រួសារជាដើម ។
ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ