រាជធានីភ្នំពេញ ៖ អនុវត្ដតាមគំរូរបស់លោកជំទាវកិត្ដិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជាឥស្សរជនឆ្នើមថ្នាក់ជាតិនៃវេទិកាភាពជាអ្នកដឹកនាំប្រចាំតំបន់អាស៊ី-ប៉ាស៊ីហ្វិកក្នុងការឆ្លើយតបមេរោគ/ជំងឺអេដស៍នៅកម្ពុជា កាលពីថ្ងៃទី២៥ មិថុនា ឆ្នាំ២០១១ លោកជំទាវអៀង ប្ញទ្ធា ភរិយាលោក ប៊ុន សំបូរ ទីប្រឹក្សាផ្ទាល់សម្ដេចតេជោនាយករដ្ឋមន្ដ្រី និងជារដ្ឋលេខាធិការទីស្ដីការគណៈរដ្ឋមន្ដ្រីបានទៅសួរសុខទុក្ខ និងយកអំណោយចែកជូនជនរងគ្រោះដែលមានផ្ទុកមេរោគអេដស៍ និងគ្រួសារយុទ្ធជនដែលកំពុងបំពេញភារកិច្ចការពារជាតិនៅសមរភូមិមុខ នៅទីស្នាក់ការគណបក្សប្រជាជនកម្ពុជា សង្កាត់បឹងធំ ខណ្ឌដង្កោ រាជធានីភ្នំពេញ ។
លោកជំទាវអៀង ប្ញទ្ធា បានពាំនាំការផ្ដាំផ្ញើសួរសុខទុក្ខពីសម្ដេចប្រមុខទាំង៣របស់គណបក្សប្រជាជនកម្ពុជាក៏ដូចជាលោកប៊ុន សំបូរ ដែលពេលនេះមិនបានអញ្ជើញមកដោយជាប់បេសកកម្មនៅបរទេស ហើយឱ្យលោកស្រីមកជួបសួរសុខទុក្ខសំណេះសំណាលដោយផ្ទាល់ជាមួយបងប្អូន ។ លោកជំទាវបានផ្ដល់អនុ
សាសន៍ឱ្យបងប្អូនជនរងគ្រោះទាំងអស់យកចិត្ដទុកដាក់ថែរក្សាសុខភាពអនាម័យក្នុងការរស់នៅ និងទទួលទានថ្នាំតាមការកំណត់របស់លោកវេជ្ជបណ្ឌិត ។ បងប្អូនទាំងអស់សុទ្ធតែជាជនរងគ្រោះ ហើយបានឆ្លងមេរោគដោយមិនដឹងខ្លួន ដូចនេះបងប្អូនត្រូវទទួលបានការថែទាំដោយយកចិត្ដទុកដាក់ដោយគ្មានការរើសអើងពីប្រជាពលរដ្ឋទូទៅក៏ដូចជាអាជ្ញាធរមូលដ្ឋានដែរ។
លោកស្រីបានសំណូមពរដល់អាជ្ញាធរមានសមត្ថកិច្ចឱ្យយកចិត្ដទុកដាក់ចំពោះបងប្អូនជនរងគ្រោះទាំងអស់នេះដោយលើកយកគំរូប្រកបដោយកាយវិការមនុស្សធម៌ដោយគ្មានការរើសអើសរបស់លោកជំទាវកិត្ដិព្រឹទ្ធបណ្ឌិតប៊ុន រា៉នី ហ៊ុន សែន ប្រធានកាកបាទក្រហមកម្ពុជាក្នុងការសួរសុខទុក្ខដល់ជនរងគ្រោះនៅគ្រប់ទិសទី ។
នាឱកាសនោះលោកជំទាវបានចែកអំណោយជូនដល់គ្រួសារជនរងគ្រោះដោយជំងឺអេដស៍ចំនួន១០គ្រួសារ និងគ្រួសារយុទ្ធជនសមរភូមិមុខចំនួន១គ្រួសារដោយបញ្ជាក់
ថា អំណោយទាំងនេះមានចំនួនតិចតួចប៉ុណ្ណោះដែលអាចជួយដោះស្រាយការលំបាករបស់បងប្អូនក្នុងរយៈពេលខ្លី តែវាបញ្ជាក់អំពីទឹកចិត្ដរបស់លោកស្រី និងក្រុមគ្រួសារដែលតែងតែចុះជាប់ និងបានយកចិត្ដទុកដាក់ជាមួយបងប្អូនដែលរស់ក្នុងសង្កាត់បឹងធំជាដរាបមក។
អំណោយឧបត្ថម្ភក្នុង១គ្រួសារទទួលបានអង្ករ៣០គីឡូក្រាម ទឹកស៊ីអ៊ីវ១យួរ អំបិលអីុយ៉ូត២គីឡូក្រាម មី១កេស សារុង១ ថវិកា២ម៉ឺនរៀល និងកង់១គ្រឿងសម្រាប់សិស្សពូកែដែលជាកូនរបស់យុទ្ធជនសមរភូមិមុខ និងបានឧបត្ថម្ភចំនួន១០០ដុល្លារសម្រាប់ចាក់ដីនៅសាលាបឋមសិក្សាព្រៃរមាស ៕
ចែករំលែកព័តមាននេះ