ខេត្តកណ្ដាល ៖ ជនសង្ស័យអតីតជាមុខសញ្ញាចោរកម្មម្នាក់ ដែលកន្លងមកធ្លាប់ជាប់ពន្ធនាគារជាង៤ឆ្នាំផងនោះ ត្រូវបានកម្លាំងនគរបាលស្រុកអង្គស្នួលឃាត់ខ្លួនជាថ្មីទៀត កាលពីវេលាម៉ោង៧និង១០នាទីយប់ ថ្ងៃទី១៨ ខែកុម្ភៈ ឆ្នាំ២០២៥។ ចំណែកបក្ខពួក៣នាក់ទៀត…
ខេត្តកណ្ដាល ៖ ជនសង្ស័យអតីតជាមុខសញ្ញាចោរកម្មម្នាក់ ដែលកន្លងមកធ្លាប់ជាប់ពន្ធនាគារជាង៤ឆ្នាំផងនោះ ត្រូវបានកម្លាំងនគរបាលស្រុកអង្គស្នួលឃាត់ខ្លួនជាថ្មីទៀត កាលពីវេលាម៉ោង៧និង១០នាទីយប់ ថ្ងៃទី១៨ ខែកុម្ភៈ ឆ្នាំ២០២៥។ ចំណែកបក្ខពួក៣នាក់ទៀត កំពុងរត់គេចខ្លួន ក្រោយពីក្រុមនេះ បានធ្វើសកម្មភាពព្រួតវាយទៅលើយុវជន៣នាក់ទៀត នៅក្នុងហាងផឹកស៊ីមួយកន្លែង ដោយចោទប្រកាន់ទៅលើក្រុមជនរងគ្រោះ ថា បានរាំឌឺដាក់ក្រុមខ្លួន បណ្ដាលឲ្យជនរងគ្រោះ ៣នាក់ខាងលើ ក្នុងចំណោមនោះ មានអ្នកប្រដាល់ម្នាក់ផងដែរ រងរបួសយ៉ាងដំណំ ។
ជនសង្ស័យខាងលើ ឈ្មោះ ស៊ឹម វ៉ៃយុក ភេទប្រុស អាយុ២៣ឆ្នាំ ជនជាតិខ្មែរ មុខរបរកម្មករ មានទីលំនៅភូមិទឹកជា ឃុំពើក ស្រុកអង្គស្នួល ខេត្ដកណ្ដាល។ ជននេះធ្លាប់ជាប់ពន្ធនាគារខេត្ដកណ្ដាល១លើក ពីបទលួចមានស្ថានទម្ងន់ទោស រយៈពេល៤ឆ្នាំ និង៦ខែ នៅក្នុងឆ្នាំ២០២០ ដល់ ឆ្នាំ២០២៤ទើបចេញ ។
ដោយឡែកបក្ខពួក៣នាក់ទៀត កំពុងគេចខ្លួន រួមមាន ៖
១-ឈ្មោះ វ៉ាន់ គឹមសិញ ភេទប្រុស អាយុ២៣ឆ្នាំ ជនជាតិខ្មែរ មុខរបរកម្មករ មានទីលំនៅភូមិត្រពាំងឈើនាង ឃុំពើក ស្រុកអង្គស្នួល ។
២-ឈ្មោះ វ៉ាន់ គឹមស៊ឺ ហៅម៉ៅ ភេទប្រុស អាយុ១៨ឆ្នាំ ជនជាតិខ្មែរ មុខរបរកម្មករ មានទីលំនៅភូមិត្រពាំងឈើនាង ឃុំពើក ស្រុកអង្គស្នួល ។
៣-មិនស្គាល់ឈ្មោះ (ហៅក្រៅ អាយួន) ភេទប្រុស អាយុប្រហែល២៣ឆ្នាំ មិនស្គាល់អាស័យដ្ឋានស្នាក់នៅ ។
នគរបាល ដកហូតយកម៉ូតូ១គ្រឿង ម៉ាកហុងដាឌ្រីមសេ១២៥ ផលិតឆ្នាំ២០១៩ ពាក់ស្លាកលេខកណ្ដាល 1AC-6106 ។ និងទូរសព្ទ ១គ្រឿង ម៉ាកiPhone11 ពណ៌ក្រហម ។
ចំណែកជនរងគ្រោះចំនួន៣នាក់ រួមមាន ៖
ទី១-ឈ្មោះ ល.ស.ល ហៅឡាក់ ភេទប្រុស អាយុ១៩ឆ្នាំ ជនជាតិខ្មែរ មុខរបរ ជាកីឡាករប្រដាល់ មានទីលំនៅភូមិព្រៃក្រឡាញ់ ឃុំលំហាច ស្រុកអង្គស្នួល របួសបែកក្បាល បែកបបូរមាត់ និងបាក់ធ្មេញ ។
ទី២-ឈ្មោះ អ.វ.ណ.ឈ ភេទប្រុស អាយុ២៤ឆ្នាំ ជនជាតិខ្មែរ មុខរបរសន្តិសុខ មានទីលំនៅភូមិត្រពាំងពើក ឃុំពើក ស្រុកអង្គស្នួល របួសពកក្បាល ជាំភ្នែកខាងស្តាំ និងហើមថ្គាម ។
ទី៣-ឈ្មោះ ក.ថ ភេទប្រុស អាយុ២១ឆ្នាំ ជនជាតិខ្មែរ មុខរបរកម្មកររោងចក្រ រស់នៅភូមិត្រពាំងអំពិល ឃុំត្រពាំងគង ស្រុកសំរោងទង ខេត្តកំពង់ស្ពឺ របួសបែកក្បាល និងហើមមាត់ ។
សមត្ថកិច្ចបានឲ្យដឹងថា ហេតុការណ៍ វាយតប់គ្នានោះ បានកើតឡើងនៅវេលាម៉ោង២៣និង៤០នាទីយប់ថ្ងៃទី១៦ ខែកុម្ភៈ ឆ្នាំ២០២៥ នៅក្នុង ហាងTHE FOREST ដែលមានទីតាំងស្ថិតនៅភូមិព្រៃគោ ឃុំលំហាច ស្រុកអង្គស្នួល ខេត្តកណ្តាល ។ ដោយនៅមុនពេលកើតហេតុ ក្រុមជនរងគ្រោះ និងមិត្តស្រី ចំនួនពីរនាក់ទៀត បានចូលផឹកស្រាបៀរ នៅក្នុងហាងខាងលើ ហើយក្រោយពេលផឹកស្រវឹង ក្រុមជនរងគ្រោះ បាននាំគ្នារាំលេងនៅនឹងតុផឹកស៊ី ចំណែកភ្ញៀវដទៃទៀត ក៏នាំគ្នារាំដែរ ។
ប្រភពដដែល បានឲ្យដឹងបន្តថា រហូតដល់ពេលកើតហេតុ ខណៈជនរងគ្រោះ កំពុងតែរាំលេង ស្រាប់តែក្រុមជនសង្ស័យ មានគ្នា៤នាក់ ដែលអង្គុយផឹងនៅតុក្បែរគ្នានោះ បានដើរទៅរករឿង ប្រុងវាយជនរងគ្រោះ ប៉ុន្តែពេលនោះ ដោយមានអ្នកឃាត់ ទើបក្រុមជនសង្ស័យនោះ មិនបានវាយជនរងគ្រោះឡើយ ។ បន្ទាប់មក ដោយខ្លាចមានរឿងបន្តទៀត ទើបក្រុមជនរងគ្រោះ នាំគ្នាហៅអ្នកលក់ឲ្យគិតលុយ ហើយបានដើរចេញទៅផ្ទះវិញ ប៉ុន្តែនៅពេលដើរដល់មុខហាង ស្រាប់តែក្រុមជនសង្ស័យ ទាំង៤នាក់នោះ បានចេញតាមក្រោយ រួចក៏បានព្រួតគ្នាវាយជនរងគ្រោះបណ្ដាលឲ្យមានរបួសបែកក្បាល ហើមភ្នែក ហើមក្បាល ហើមខ្លួន និងដៃជើង ហើមមាត់ គ្រប់គ្នាតែម្ដង ។
ប្រភពខាងលើ បានបញ្ជាក់ប្រាប់ទៀតថា ក្រោយពីកើតហេតុ ក្រុមជនសង្ស័យបានគេចខ្លួនបាត់អស់ បន្ទាប់មកជនរងគ្រោះទាំង៣នាក់ បានរាយការណ៍ប្រាប់នគរបាលប៉ុស្តិ៍រដ្ឋបាលលំហាច ហើយក្រោយពេលទទួលបានព័ត៌មានខាងលើ កម្លាំងនគរបាលប៉ុសិ៍្តខាងលើ បានសហការណ៍ជាមួយកម្លាំងផ្នែកជំនាញស្រុក ចុះទៅកាន់កន្លែងកើតហេតុធ្វើការស្រាវជ្រាវភ្លាមៗ ។ ខណៈនោះ ដោយសារតែជនរងគ្រោះ មានរបួសផង និងស្រវឹងស្រាផង បាននាំគ្នាទៅមន្ទីរពេទ្យ ព្យាបាលរបួសទាំងយប់ លុះព្រឹកឡើងនៅថ្ងៃទី១៧ ខែកុម្ភៈ ឆ្នាំ២០២៥ វេលាម៉ោង៨ព្រឹក ទើបជនរងគ្រោះបានទៅដាក់ពាក្យបណ្ដឹង នៅប៉ុស្ដិ៍លំហាច ។
ប្រភពមួយនេះ បានឲ្យដឹងបន្ថែមផងដែរថា ក្រោយពីការស្រាវជ្រាវ នៅថ្ងៃទី១៨ ខែកុម្ភៈ ឆ្នាំ២០២៥ នៅវេលាម៉ោង១៩និង១០នាទី ទើបនគរបាលព្រហ្មទណ្ឌស្រុកអង្គស្នួល សហការណ៍ជាមួយកម្លាំងនគរបាលប៉ុស្ដិ៍លំហាច កម្លាំងនគរបាលប៉ុស្ដិ៍ពើក និងកម្លាំងនគរបាលប៉ុស្ដិ៍ព្រៃពួច ឃាត់ខ្លួនជនសង្ស័យឈ្មោះ ស៊ឹម វ៉ៃយុក បានម្នាក់រួចនាំទៅកាន់អធិការដ្ឋាននគរបាលស្រុកដើម្បីសួរនាំ ។ នៅចំពោះមុខនគរបាល ជនសង្ស័យរូបនេះបានឆ្លើយសារភាពថា ខ្លួននិងបក្ខពួក ៣នាក់ទៀត ដូចមានឈ្មោះខាងលើ បានធ្វើសកម្មភាពវាយទៅលើភាគីជនរងគ្រោះមែន ដោយសារភាគីជនរងគ្រោះបានរាំឌឺ ដាក់មកពួកខ្លួនមុន ៕
ចែករំលែកព័តមាននេះ