រាជធានីភ្នំពេញ ៖ មន្ត្រីកងអាវុធហត្ថរាជធានីភ្នំពេញ មួយរូប គឺពលបាលឯក សយ ច័ន្ទស័ក្ដដារ៉ា ដែលបានប្រព្រឹត្តអំពើឆ្គាំឆ្គងរំលោភក្រមសីលធម៌វិជ្ជាជីវៈកងរាជអាវុធហត្ថ នៅវត្តសំបួរមាស ត្រូវបានអង្គភាពសម្រេចដាក់ទណ្ឌកម្មវិន័យស្ដីបន្ទោសដោយលាយលក្ខណ៍អក្សរ។…
រាជធានីភ្នំពេញ ៖ មន្ត្រីកងអាវុធហត្ថរាជធានីភ្នំពេញ មួយរូប គឺពលបាលឯក សយ ច័ន្ទស័ក្ដដារ៉ា ដែលបានប្រព្រឹត្តអំពើឆ្គាំឆ្គងរំលោភក្រមសីលធម៌វិជ្ជាជីវៈកងរាជអាវុធហត្ថ នៅវត្តសំបួរមាស ត្រូវបានអង្គភាពសម្រេចដាក់ទណ្ឌកម្មវិន័យស្ដីបន្ទោសដោយលាយលក្ខណ៍អក្សរ។ ហើយពលបាលឯក សយ ច័ន្ទស័ក្ដដារ៉ា ក៏បានទទួលស្គាល់នូវកំហុសឆ្គងរបស់ខ្លួន និងព្រមសងសំណងជំងឺចិត្តដល់តំណាងសាមណេរទាំងបីអង្គ ផងដែរ នេះបើតាមសេចក្តីប្រកាសព័ត៌មានរបស់ឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស នៅថ្ងៃទី១៩ ខែកុម្ភៈ ឆ្នាំ២០២៥ ។
យោងតាមរបាយការណ៍របស់លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស មេបញ្ជាការកងរាជអាវុធហត្ថរាជធានីភ្នំពេញ និងបានការអនុញ្ញាតពីនាយឧត្តមសេនីយ៍ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស លោកឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានប្រកាសអំពីករណីពលបាលឯក សយ ច័ន្ទស័ក្តដារ៉ា បានប្រព្រឹត្តអំពើឆ្គាំឆ្គង រំលោភក្រមសីលធម៌ វិជ្ជាជីវៈកងរាជអាវុធហត្ថ នៅវត្តសំបួរមាស មានដូចខាងក្រោម ៖
ក-/ អំពីសាវតារ ៖ ឈ្មោះ សយ ច័ន្ទស័ក្តដារ៉ា ធ្លាប់បានបួសជាសង្ឃ នៅវត្តសំបួរមាស ពីឆ្នាំ២០១៣ ដល់ឆ្នាំ២០២៣ ហើយបានសឹកពីសាមណេរ ដាក់ពាក្យចូលបម្រើកងរាជអាវុធហត្ថ នៅថ្ងៃទី១០ ខែសីហា ឆ្នាំ២០២៣។ ក្នុងអំឡុងពេលបួសជាសង្ឃ នៅឆ្នាំ២០១៣ ខ្លួនបានយកក្មេងប្រុស ១នាក់ ឈ្មោះ យ៉ាន មករា អាយុ៦ឆ្នាំ ធ្វើជាកូនសិស្សស្នាក់នៅក្នុងកុដិ ជាមួយគ្នា (ក្មេងប្រុសនោះរស់នៅភូមិជាមួយគ្នា, ម្តាយក្រីក្រ, កំព្រាឪពុក)។ លុះដល់ឆ្នាំ២០២១ ឈ្មោះ យ៉ាន មករា ក៏បានបួសជានេន នៅវត្តសំបួរមាស ស្នាក់នៅក្នុងកុដិ ជាមួយគ្នារហូតដល់ឆ្នាំ២០២៣ ។
ខ-/ អំពីអង្គហេតុ ៖ នៅវេលាម៉ោង១១និង៤០នាទីយប់ ឈានចូលថ្ងៃទី៦ ខែកុម្ភៈ ឆ្នាំ២០២៥ ឈ្មោះ សយ ច័ន្ទស័ក្តដារ៉ា បានជូនមិត្តភក្តិ ចំនួន២នាក់ ចេញពីកន្លែងកម្មវិធីខួបកំណើត មកសម្រាកនៅវត្ត (១-ឈ្មោះ ពៅ រ៉ាវី មុខរបរអ្នកដុតសពនៅវត្ត, ២-ឈ្មោះ មេន ថាមុំ មុខរបរអ្នកបើកបររថយន្តរបស់វត្ត)។ ហើយឈ្មោះ សយ ច័ន្ទស័ក្តដារ៉ា ក៏បានឱ្យឈ្មោះមេន ថាមុំ យកម៉ូតូ ឌុបជូនខ្លួនទៅបន្ទាយវិញ ពេលចេញដំណើរក៏បានឃើញនេនព្រះនាម យ៉ាន មករា គង់លើបង់ថ្ម នៅមុខកុដិ ឈ្មោះ សយ ច័ន្ទស័ក្តដារ៉ា ក៏ឱ្យឈប់ម៉ូតូ ហើយសួរសុខទុក្ខលោកនេនព្រះនាម យ៉ានមករា និងបានជជែកប្រកែកគ្នា បង្កឱ្យមានជម្លោះ មិនបណ្តាលឱ្យមានរបួស ស្លាកស្នាមទេ ។
គ-/ អំពីអង្គច្បាប់ ៖ -មាត្រា២១៧ បទហិ.ង្សាដោយចេតនា ជាអំពើហិ.ង្សាប្រព្រឹត្តដោយចេតនាលើអ្នកដទៃ ត្រូវផ្តន្ទាទោសដាក់ពន្ធនាគារពី១ឆ្នាំ ទៅ៣ឆ្នាំ និងពិន័យជាប្រាក់ពី២លានរៀល ទៅ៦លានរៀល។ -មាត្រា២២៨ បទហិ.ង្សាស្រាល ជាអំពើប្រព្រឹត្តទៅលើអ្នកដទៃ នូវហិ.ង្សាស្រាល ដែលមិននាំឱ្យរបួសទេនោះ ត្រូវផ្តន្ទាទោសពិន័យជាប្រាក់ពី៥ពាន់រៀល ទៅ១សែនរៀល។ យោងតាមអង្គហេតុខាងលើ ពលបាលឯក សយ ច័ន្ទស័ក្តដារ៉ា បានប្រព្រឹត្តទង្វើឆ្គាំឆ្គង រំលោភក្រមសីលធម៌ វិជ្ជាជីវៈកងរាជអាវុធហត្ថ ។
ឃ-/ អំពីទណ្ឌកម្មវិន័យ ៖ -មាត្រា៤១ ទណ្ឌកម្មផ្នែកវិន័យ មាន ៖ ១-ចំពោះនាយទាហាន និងនាយទាហានរងៈ -ការព្រមាន, -ការស្តីបន្ទោស, -ការបន្ទោសដោយលាយលក្ខណ៍អក្សរ ឬការផ្អាកមុខដំណែង។ ២-ចំពោះពលទាហាន ៖ -ការព្រមាន, -ការជាប់បញ្ញត្តិ, -ការផ្អាកមុខដំណែង។ -មាត្រា៤២ ការបន្ថយឋានន្តរសក្តិត្រូវធ្វើចំពោះយោធិន ដែលមានកំហុសធ្ងន់ និងប្រព្រឹត្តល្មើសបទបញ្ញត្តិច្រើនដង។ ការបន្ថយឋានន្តរសក្តិនេះ ត្រូវវិនិច្ឆ័យ និងផ្តល់យោបល់ពីក្រុមប្រឹក្សាវិន័យ។ យោងតាមអង្គហេតុខាងលើ ពលបាលឯក សយ ច័ន្ទស័ក្តដារ៉ា បានប្រព្រឹត្តអំពើឆ្គាំឆ្គង រំលោភក្រមសីលធម៌ វិជ្ជាជីរៈទៅលើព្រះសង្ឃ ទោះបីខ្លួនធ្លាប់បួស ឬជាគ្រូរបស់លោកនេនអង្គនោះក្តី ខ្លួនបានសឹកពីភិក្ខុ គឺពីបព្វជិតមកជាគ្រហស្ថហើយ មិនត្រូវប្រព្រឹត្តទង្វើបែបនោះទេ ។
ង-/ ថ្ងៃទី១៧ ខែកុម្ភៈ ឆ្នាំ២០២៥ វេលាម៉ោង១៥និង៣០នាទី នៅសាលាអនុគុណខណ្ឌដង្កោ បានប្រារព្ធពិធីរម្ងាប់អធិករណ៍ ករណីជម្លោះនៅវត្តសំបួរមាស មានសមាសភាពដូចខាងក្រោម ៖
១-ព្រះវិន័យមុនី ចឹក ចុន្ន ព្រះអនុគុណខណ្ឌដង្កោ និងជាព្រះចៅអធិការវត្តស្លែង
២-លោក មាស ញិល មន្ត្រីមន្ឌីរធម្មការ និងសាសនា រាជធានីភ្នំពេញ
៣-លោក ស្រ៊ាន ម៉ៃ ប្រធានការិយាល័យព្រះពុទ្ធសាសនាមន្ទីរធម្មការ
៤-ព្រះកិរិយាភិបាល កុង ពិសី ព្រះចៅអធិការវត្តសំបួរមាស រួមទាំងមន្ត្រីសង្ឃប្រចាំខណ្ឌដង្កោ និងសាមណេរដែលពាក់ព័ន្ធករណីជម្លោះ
៥-លោកឧត្តមសេនីយ៍ត្រី ពូ ដាវី មេបញ្ជាការរង កងរាជអាវុធហត្ថរាជធានីភ្នំពេញ និងសហការី
៦-តំណាងភាគីពាក់ព័ន្ធករណីជម្លោះខាងលើ។
បន្ទាប់ពីព្រះអនុគុណមានសង្ឃដីកាសួរនាំ អំពីអង្គហេតុទៅកាន់សាមណេរចំនួន៣អង្គ ហើយសាមណេរទាំងបីអង្គ ព្រមអនុគ្រោះ និងទទួលយកនូវការសុំខមាទោស ព្រមទាំងព្រះចៅអធិការ និងព្រះគ្រូសូត្រទាំងពីរ ព្រះអង្គ ក្នុងវត្តសំបួរមាស បានឯកភាពតាមសំណូមពររបស់សាមណេរទាំងបីអង្គ ដើម្បីរំលត់អធិករណ៍។ ក្នុងនាម ព្រះអនុគុណ ក៏បានទទួលយកការអភ័យទោសពីពលបាលឯក សយ ចាន់ស័ក្តដារ៉ា ដោយបានថ្វាយបង្គំ សុំខមាទោស ចំពោះព្រះអនុគុណ ព្រមទាំងសាមណេរទាំងបីអង្គ ។
ច-/ អំពីដំណោះស្រាយ និងចំណាក់ការ ៖
១-ពលបាលឯក សយ ច័ន្ទស័ក្តដារ៉ា បានទទួលខុសត្រូវនូវកំហុសរបស់ខ្លួន ដែលបានប្រព្រឹត្តទង្វើឆ្គាំឆ្គង រំលោ.ភក្រមសីលធម៌ វិជ្ជាជីវៈ ទៅលើលោកនេនទាំង៣អង្គ យល់ព្រមសងសំណងជំងឺចិត្តដល់ភាគីតំណាងសាមណេរទាំងបីអង្គ ។
២-ត្រូវបានដាក់ទណ្ឌកម្ម ផ្នែកវិន័យ ដូចមានចែងក្នុងមាត្រា៤១ នៃបទវិន័យទូទៅសម្រាប់យោធិន នៃកងយោធពលខេមរភូមិន្ទ ៖ ពលបាល ឯក សយ ច័ន្ទស័ក្តដារ៉ា ទទួលការបន្ទោសដោយលាយលក្ខណ៍អក្សរ ។
សូមរម្លឹកឡើងវិញថា «ពុទ្ធបរិស័ទចំណុះជើងវត្តសំបួរមាសមិនសុខចិត្តរឿង ជនដៃដល់វា.យព្រះសង្ឃហើយ ដោះលែងវិញ» កាលពីវេលាម៉ោង៧យប់ថ្ងៃទី៦ ខែកុម្ភៈ ឆ្នាំ២០២៥ នៅក្នុងបរិវេណវត្តសំបួរមាស ស្ថិតនៅក្នុងភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ពុទ្ធបរិស័ទក្មេងចាស់ប្រុសស្រីចំណុះជើងវត្តជិតមួយភូមិនាំគ្នាតវ៉ាទាំងយប់ ពាក់ព័ន្ធនឹងករណីបុរស៣នាក់បានប្រើហិង្សាទៅលើព្រះសង្ឃបីអង្គដែលគង់នៅក្នុងវត្តសំបួរមាស ហើយសមត្ថកិច្ចបានហៅបុគ្គលបីនាក់យកទៅសួរនាំរួចបែរជាអត់មានដំណោះស្រាយ និងឲ្យត្រឡប់ទៅផ្ទះវិញ ៕
ចែករំលែកព័តមាននេះ