រស់នៅក្នុងសម័យកាលបច្ចុប្បន្ននេះ សូមប្រុងប្រយ័ត្នគ្រប់យ៉ាងរាប់ទាំងការការពារ និងរក្សាគណនីធនាគារ និងគណនីបណ្តាញសង្គមផ្សេងៗរបស់អ្នក ។ បើមិនដូច្នេះទេ ប្រយ័ត្ននាំរឿងដាក់ខ្លួនដោយខ្លួនមិនបានប្រព្រឹត្តអ្វីសោះនោះ ។ ដោយសារតែបច្ចេកវិទ្យារីកចម្រើន យើងក៏ងាយស្រួល…
រស់នៅក្នុងសម័យកាលបច្ចុប្បន្ននេះ សូមប្រុងប្រយ័ត្នគ្រប់យ៉ាងរាប់ទាំងការការពារ និងរក្សាគណនីធនាគារ និងគណនីបណ្តាញសង្គមផ្សេងៗរបស់អ្នក ។ បើមិនដូច្នេះទេ ប្រយ័ត្ននាំរឿងដាក់ខ្លួនដោយខ្លួនមិនបានប្រព្រឹត្តអ្វីសោះនោះ ។
ដោយសារតែបច្ចេកវិទ្យារីកចម្រើន យើងក៏ងាយស្រួល ហើយធ្វើឲ្យយើងសម្រួលការប្រើប្រាស់បានកាន់តែលឿន និងកាន់តែមានតម្លៃថោក ។ ប៉ុន្តែទន្ទឹមនឹងភាពលឿន និងងាយស្រួលនេះ ពេលខ្លះយើងភ្លេចខ្លួននាំឲ្យជនខិលខូចលួចយកគណនីយើងទៅប្រើប្រាស់ប្រព្រឹត្តិសកម្មភាពផ្សេងៗដែលយើងមិនដឹងខ្លួន ។
ជាក់ស្តែងកាលពីពេលថ្មីៗកន្លងទៅនេះ នាយកដ្ឋានប្រឆាំងបទល្មើសបច្ចេកវិទ្យា ទើបតែបានបើកការស្រាវជ្រាវលើកករណីមួយពាក់ព័ន្ធនឹងការលួចគ្រប់គ្រងគណនីហ្វេសប៊ុក។ ករណីនេះ គឺមានស្ត្រីម្នាក់បានលួចទៅគ្រប់គ្រងគណនីហ្វេសបុក ដែលជាបណ្តាញសង្គមដ៏ពេញនិយមនៅកម្ពុជា ហើយបានបន្លំខ្លួនជាម្ចាស់គណនីរួចផ្ញើសារតាមរយៈឆាត (messenger) ទៅសាច់ញាតិ ឬអ្នកស្គាល់គ្នាផ្សេងៗជាមួយជនរងគ្រោះ ដើម្បីធ្វើការឆរបោកខ្ចីប្រាក់ ។
គេមិនដឹងថា តើសកម្មភាពនេះ ជនរងគ្រោះដឹងដោយរបៀបណានោះទេ ។ ប៉ុន្តែសំណាងហើយដែលករណីនេះសមត្ថកិច្ចបានស្រាវជ្រាវរកឃើញជនសង្ស័យ ហើយចាត់វិធានការបាន ។
បើតាមនាយកដ្ឋានប្រឆាំងបទល្មើសបច្ចេកវិទ្យា បានបញ្ជាក់ថា បន្ទាប់ពីគេបានកំណត់អត្តសញ្ញាណជនសង្ស័យហើយនោះ ដោយមានការសម្របសម្រួលពីព្រះរាជអាជ្ញាអមសាលាដំបូងរាជធានីភ្នំពេញ នាយកដ្ឋានបានឃាត់ខ្លួនជនសង្ស័យ១រូបជាស្ត្រី ។ ក្រោយការសាកសួរដោយសមត្ថកិច្ចជំនាញ ស្ត្រីដែលជនសង្ស័យ ដែលមានរូបរាងសាច់ឈាម ទ្រលុកទ្រលន់មិនសមថា ជាជនសង្ស័យនៅក្នុងករណីនោះបានសារភាពថា ខ្លួនបានយកគណនីធនាគាររបស់អ្នកស្គាល់គ្នា ដើម្បីទទួលប្រាក់ពីមេខ្លោង ដោយទទួលបាននូវកម្រៃជើងសាររាល់ការទទួលប្រាក់ម្ដងៗ ដែលប្រាក់ទាំងអស់នោះទទួលបានពីការឆរបោកក្រោមរូបភាពខាងលើ ។
បច្ចុប្បន្ន ជនសង្ស័យខាងលើ ត្រូវបាននាយកដ្ឋាន កសាងសំណុំរឿងបញ្ជូនទៅកាន់អយ្យការអមសាលាដំបូងរាជធានីភ្នំពេញ និងត្រូវបានចៅក្រមស៊ើបសួរនៃសាលាដំបូងរាជធានីភ្នំពេញ ចេញដីកាឲ្យឃុំខ្លួនដាក់ពន្ធនាគារបណ្ដោះសន្ន ដើម្បីស្រាវជ្រាវស្វែងរកមុខសញ្ញាបក្ខពួកដទៃទៀត ។
តាមព័ត៌មានដែលបង្ហើបនេះ គេមិនដឹងថា តើជនរងគ្រោះដែលជាម្ចាស់គណនី នេះជួបបញ្ហាយ៉ាងណានោះទេ ហើយក៏មិនបានដឹងថា តើជនសង្ស័យ និងបក្សពួកខ្លួនអាចប្រើប្រាស់រូបភាពបែបនេះធ្វើសកម្មភាព បានប្រាក់ប៉ុន្មានហើយនោះដែរ ។ ប៉ុន្តែវា គឺជាសារមួយប្រាប់យើងទាំងអស់គ្នាឲ្យប្រុងប្រយ័ត្នខ្ពស់ លើការគ្រប់គ្រងគណនី។
តាមអ្នកបច្ចេកទេសជាទូទៅក្រៅពីអ្នកហេកឃ័រ ដែលមានជំនាញជ្រៀតចូលលួចគ្រប់គ្រង ការដែលជនខិលខូចអាចលបលួចជ្រៀតទៅប្រើប្រាស់គណនីរបស់យើងម្នាក់ៗបានវាអាចមកពីកត្តាផ្សេងៗ គឺមានការយកទូរស័ព្ទទៅជួសជុល ការទុក្ខទូរស័ព្ទចោល ការដែលយើងឧស្សាហ៍ចូលទៅប្រើប្រាស់បណ្តាញសង្គមនៅរកន្លែងបម្រើសេវាកម្មឧបករណ៍ប្រើប្រាស់សាធារណៈ ឬឧបករណ៍ប្រើប្រាស់រួម និងការដែលគេខ្ចីទូរស័ព្ទទៅទំនាក់ទំនងជាដើម ។
សូមកុំប្រហែស! រាល់ទូរស័ព្ទរបស់យើងនៅពេលនេះវាដូចជា កូនសោរមួយនៃជីវភាពរបស់យើងប្រចាំទៅហើយ ។ ដោយសារតែនៅក្នុងទូរស័ព្ទនេះ គឺយើងមានតាំងពីកុងធនាគារ បណ្តាញទំនាក់ទំនងសង្គមផ្សេងៗ តាំងពីហ្វេសបុក តេឡេក្រាម អ៊ីនស្តាក្រាម … ជាដើម ដូច្នេះប្រសិនបើយើងប្រហែស គឺហានិភ័យនឹងកើតមាន ។
សូមកុំទុកចិត្តអ្នកដែលស្គាល់គ្នាល្មមៗ ដោយមិនគួរបណ្តោយឲ្យកាន់ទូរស័ព្ទចុចនេះចុចនោះផ្តេសផ្តាស់ឡើយ ។ ហើយនៅពេលដែលទួរស័ព្ទយើងខូច ឬចាស់លែងចង់ប្រើប្រាស់ ឬក៏ចង់ប្តូរទូរស័ព្ទអីក៏សូមព្យាយាម Sign Out ពោល គឺចាកចេញពីគ្រប់បណ្តាញសង្គមនិងគណនីដែលមាន ។ ពោល គឺត្រូវតែសម្អាតឲ្យអស់នូវអ្វីដែលពាក់ព័ន្ធនឹងខ្លួនយើង ដើម្បីបង្ការកុំអោយមានជនឆ្លៀតឱកាសយកទៅធ្វើសកម្មភាពដូចជា នារីជនសង្ស័យខាងលើ ។
ក្រៅពីនេះសម្រាប់សមត្ថកិច្ចវិញ ក្រៅពីចូលរួមអបអរហើយនោះក៏សង្ឃឹមថា ឆ្លងតាមសម្តីសារភាពរបស់ជនសង្ស័យនឹងស្រាវជ្រាវហើយឈានទៅបង្ក្រាបមេក្លោងនៅក្នុងបណ្តាញនេះយកមកផ្តន្ទាទោសឲ្យបានផងដែរ ។ តាមសម្តីជនសង្ស័យ អ្នកពាក់ព័ន្ធ គឺមានច្រើន ដូច្នេះសង្ឃឹមថា សមត្ថកិច្ចនឹងវែកមុខរកឲ្យឃើញយកមកកាត់ទោស ។
សរុបមកវិញ ដើម្បីសុវត្ថិភាពសូមព្យាយាមការពារ និងថែរក្សាគណនីធនាគារ និងបណ្តាញសង្គមផ្សេងៗរបស់យើងឲ្យបានល្អ ដើម្បីការពារជនឆ្លៀតឱកាស ។ ដោយឡែករឿងសារដែលមានមិត្តភក្តិខ្ចីលុយ ឬក៏ប្រាប់ហេតុផលនេះហេតុផលនោះនៅក្នុងករណីឲ្យយើងផ្ញើប្រាក់សូមផ្ទៀងផ្ទាត់ ហើយបញ្ជាក់ឲ្យបានច្បាស់លាស់ ។ ពីព្រោះនៅពេលនេះ ការទូទាត់ប្រាក់នេះវាងាយស្រួល វាលឿនវារហ័ស ពេលខ្លះភាពងាយស្រួលនោះហើយដែលនាំឲ្យមានាការខាតបង់ ។ សូមលើកកម្ពស់ការប្រុងប្រយ័ត្នពីព្រោះក្រុមជនខិលខូចរមែងឆ្លៀតឱកាសគ្រប់ជំហាន នៅពេលដែលយើងខ្វះការប្រុងប្រយ័ត្ន ៕
ចែករំលែកព័តមាននេះ