ទីក្រុងប៉ារីស៖ នៅពេលគណៈប្រតិភូអាមេរិក និងរុស្ស៊ីធ្វើដំណើរទៅដល់ទីក្រុងរីយ៉ាត ប្រទេសអារ៉ាប៊ីសាអូឌីត ដើម្បីជជែកគ្នាអំពីបញ្ហាអ៊ុយក្រែនដោយគ្មានវត្តមានអ៊ុយក្រែនចូលរួម នៅឯទីក្រុងប៉ារីស ប្រទេសបារាំងឯណោះ ប្រទេសមហាអំណាចធំៗរបស់អឺរ៉ុបក៏បានកោះប្រជុំគ្នាជាបន្ទាន់។ ពួកគេក៏ខ្វាយខ្វល់អំពីជោគវាសនារបស់អ៊ុយក្រែនសម្បើមណាស់ដែរព្រោះទីមួយអាមេរិកបានទុកអឺរ៉ុបនៅខាងក្រៅឆាកទៅហើយ ហើយអឺរ៉ុបខ្លាចអាមេរិកទុកអ៊ុយក្រែននៅខាងក្រៅឆាកមួយទៀត។
គម្រោងជួបគ្នានៅអារ៉ាប៊ីសាអូឌីតនោះ បើយោងតាមរដ្ឋមន្ត្រីការបរទេសអាមេរិក គ្រាន់តែជាជំនួបបឋមដើម្បីស្ទាបស្ទង់ចិត្តគ្នាតែប៉ុណ្ណោះ។ អាមេរិកចង់មើលជំហររុស្ស៊ី និងចង់ដឹងថាតើលោកពូទីនចង់ដោះស្រាយបញ្ហានេះកម្រិតណា។ រុស្ស៊ីធ្លាប់និយាយជារឿយៗថាបើចង់ដោះស្រាយបញ្ហាឱ្យបានលឿនលុះត្រាតែអ៊ុយក្រែនប្រគល់ទឹកដី២០%ដែលរុស្ស៊ីកំពុងកាន់កាប់។
តាំងពីមុនកិច្ចជំនួបអាមេរិក-រុស្ស៊ី លោកហ្សេឡិនស្គីប្រកាសមិនទទួលស្គាល់ និងមិនទទួលយកលទ្ធផលជាដាច់ខាតព្រោះគ្មានវត្តមានរបស់អ៊ុយក្រែនចូលរួម។ កិច្ចជំនួបនៅប៉ារីសចូលរួមដោយអង់គ្លេស, អាល្លឺម៉ង់, គណៈកម្មការអឺរ៉ុប, អគ្គលេខាណាតូ និងថ្នាក់ដឹកនាំអឺរ៉ុបដទៃទៀត។ កិច្ចជំនួបនេះធ្វើឡើងបន្ទាប់ពីលោកម៉ាក្រុងទើបតែនិយាយគ្នាថ្មីៗជាមួយលោកត្រាំ។
កិច្ចជំនួបនេះក៏ធ្វើឡើងបន្ទាប់ពីលោកត្រាំបង្កការភ្ញាក់ផ្អើលពេញពិភពលោកដោយនិយាយទូរស័ព្ទជាមួយលោកពូទីន និងឯកភាពគ្នាស្ងាត់ៗតែ២នាក់ថាត្រូវតែពន្លឿនការចរចាគ្នាដើម្បីបិទបញ្ចប់សង្គ្រាមឱ្យបានឆាប់តាមដែលអាចធ្វើទៅបាន។ ព្រឹត្តិការណ៍នេះបង្កការភ្ញាក់ផ្អើលខ្លាំងជាងគេសម្រាប់អឺរ៉ុប។ អឺរ៉ុបបារម្ភថាអាមេរិកអាចនឹងបោះបង់ខ្លួនចោល។ ចំណែកបញ្ហាអ៊ុយក្រែនក៏អាមេរិកចរចាឆិនឆៃដើម្បពីឱ្យឆាប់ចប់។
ពោលគឺមិនខុសពីអ្វីដែលរដ្ឋមន្ត្រីការពារជាតិអាមេរិកនិយាយនៅទីក្រុងមុយនិចថាអាមេរិកលែងខ្វល់ពីអ៊ុយក្រែន និងអឺរ៉ុបហើយ។ អាមេរិកគិតអំពីសន្តិសុខនៅព្រំដែនរបស់ខ្លួនវិញម្ដង។ អធិការបតីអាល្លឺម៉ង់ចង់ក្រើនរំលឹកអាមេរិកថាគួរណាស់កុំបែកបាក់សាមគ្គីគ្នា។ ដូចការចង់បានរបស់លោកហ្សេឡិនស្គីដែរ លោកសូលចង់ឃើញអាមេរិក អឺរ៉ុប និងអ៊ុយក្រែនរួបរួមសាមគ្គីគ្នា និងប្រកាន់ជំហររួមតែមួយមុននឹងចរចាជាមួយរុស្ស៊ី។ លោកចង់ផ្ដោតសំខាន់ទៅលើការធានាសន្តិសុខជាតិរបស់អ៊ុយក្រែន។
លោកសូលថ្លែងប្រាប់អ្នកសារព័ត៌មានថាមិនត្រូវបែកខ្ញែកមតិគ្នារវាងអាមេរិក និងអឺរ៉ុបនៅក្នុងបញ្ហាសន្តិសុខ និងការទទួលខុសត្រូវនោះទេ។ និយាយម៉្យាងទៀតថាអង្គការណាតូបង្កើតឡើង និងដំណើរការដោយផ្អែកទៅលើគោលការណ៍ដែលថាយើងតែងតែធ្វើអ្វីផ្អែកទៅលើជំហរជារួម និងដោះស្រាយបញ្ហាប្រឈមរួមគ្នា។ បញ្ហានេះច្បាស់ណាស់ គ្មានអ្វីត្រូវឆ្ងល់ទេ៕
ចែករំលែកព័តមាននេះ