ទីក្រុងតូរ៉ុនតូ៖ យន្តហោះដឹកអ្នកដំណើរ១គ្រឿងរបស់ក្រុមហ៊ុនអាកាសចរណ៍ដែលតាអ៊ែ (Delta Air) ពេលកំពុងរត់នៅលើផ្លូវសុខៗស្រាប់តែក្រឡាប់ផ្ងារជើងឡើងលើនៅពេលព្យាយាមចុះចតនៅអាកាសយានដ្ឋានតូរ៉ូនតូ ភាសុន អ៊ែផត (Toronto Pearson Airport)។…
ទីក្រុងតូរ៉ុនតូ៖ យន្តហោះដឹកអ្នកដំណើរ១គ្រឿងរបស់ក្រុមហ៊ុនអាកាសចរណ៍ដែលតាអ៊ែ (Delta Air) ពេលកំពុងរត់នៅលើផ្លូវសុខៗស្រាប់តែក្រឡាប់ផ្ងារជើងឡើងលើនៅពេលព្យាយាមចុះចតនៅអាកាសយានដ្ឋានតូរ៉ូនតូ ភាសុន អ៊ែផត (Toronto Pearson Airport)។ សាក្សីនិយាយថានៅពេលព្យាយាមចុះចតនោះមានខ្យល់កន្ត្រាក់ គួបផ្សំនឹងការធ្លាក់ទឹកកករដូវរងា។
ហេតុការណ៍នេះបណ្ដាលឱ្យរងរបួសមនុស្ស១៥នាក់នៅក្នុងចំណោមមនុស្ស៨០នាក់ដែលជិះនៅក្នុងយន្តហោះ។ ក្រុមហ៊ុនដែលតាថ្លែងថាយន្តហោះនោះបើកដំណើរការដោយក្រុមហ៊ុនអ៊ីនដេវើ អ៊ែ (Endeavor Air) ដែលជាបុត្រសម្ព័ន្ធ។ នៅលើយន្តហោះនោះមានអ្នកដំណើរ៧៦នាក់ និងបុគ្គលិកក្រុមហ៊ុន៤នាក់។ យន្តហោះស៊ីអ័រជេរ៩០០ (CRJ900) ផលិតដោយក្រុមហ៊ុនកាណាដា អាចដឹកមនុស្សបាន៩០នាក់។
មូលហេតុនៃការក្រឡាប់យន្តហោះនេះនៅមិនទាន់ដឹងច្បាស់នៅឡើយទេ។ នៅលើបណ្ដាញសង្គម អ្នកខ្លះបង្ហោះរូបវីឌីអូយ៉ាងព្រោងព្រាត។ រូបខ្លះបង្ហាញទីភ្នាក់ងារពន្លត់អគ្គិភ័យខិតខំបាញ់ទឹកស្រោចជុំវិញយន្តហោះដើម្បីទប់ស្កាត់ការឆេះយន្តហោះ។ គេឃើញយន្តហោះផ្ងារជើងឡើងលើនៅលើផ្លូវហោះហើរដែលគ្របដណ្ដប់ដោយទឹកកកយ៉ាងក្រាស់ឃ្មឹក។
អ្នកលេងបណ្ដាញហ្វេសប៊ុកម្នាក់ឈ្មោះចន នែលសុន (John Nelson) សរសេររៀបរាប់ថាយើងកំពុងស្ថិតនៅតូរ៉ុនតូ។ យើងទើបតែចុះចតនៅទីនេះ។ យន្តហោះរបស់យើងផ្ងារជើងឡើងលើ។ ភ្នាក់ងារពន្លត់អគ្គិភ័យមកដល់កន្លែងកើតហេតុហើយ។ មនុស្សភាគច្រើនមិនមានបញ្ហាអ្វីទេ។ យើងត្រៀមចាកចេញពីយន្តហោះហើយ ហើយឃើញផ្សែងហុយចេញពីយន្តហោះ។
មន្ត្រីបម្រើការនៅអាកាសយានដ្ឋានភាសុនថ្លែងថាខ្លួនត្រូវប្រឈមដោះស្រាយបញ្ហាអាកាសធាតុត្រជាក់ ធ្លាក់ខ្យល់ខ្លាំង។ ទន្ទឹមនឹងនោះ ក្រុមហ៊ុនអាកាសចរណ៍នានាក៏ប្រញាប់ដឹកជញ្ជូនអ្នកដំណើរបន្ទាប់ពីខកខានជាច្រើនជើងដោយសារធ្លាក់ទឹកកកខ្លាំងកាលពីចុងសប្ដាហ៍រហូតដល់កម្ពស់២២សង់ទីម៉ែត្រ។ នៅក្នុងចំណោមអ្នករបួសទាំងនោះ ២នាក់ត្រូវគេដឹកតាមយន្តហោះទៅមណ្ឌលវះកាត់ខួរក្បាល, កុមារម្នាក់ត្រូវគេដឹកទៅមន្ទីរពេទ្យកុមារ, ១២នាក់ទៀតត្រូវគេដឹកទៅមន្ទីរពេទ្យ៕
ចែករំលែកព័តមាននេះ