អ្នកដែលមានបញ្ហាជាមួយនឹងក្រុមអ្នកចងការប្រាក់ខុសច្បាប់ ជាពិសេស គឺកម្ចីអនឡាញដែលប្រតិបត្តិការដោយជនបរទេសអាចមានសិទ្ធិមិនសង ហើយមិនតែប៉ុណ្ណោះសមត្ថកិច្ចកម្ពុជានឹងចេញមុខការពារពលរដ្ឋថែមទៀត ។ ប៉ុន្តែទោះបីជាយ៉ាងណាក៏ដោយពលរដ្ឋកុំច្រឡំអ្នកជំពាក់កម្ចីផ្លូវការនានា គឺនៅដដែលពីព្រោះវា គឺជាកាតព្វកិច្ច ។ ក្រោយពេលដែលបញ្ហាកម្ចីអនឡាញនេះបានកើនឡើងពីមួយថ្ងៃទៅមួយថ្ងៃ…
អ្នកដែលមានបញ្ហាជាមួយនឹងក្រុមអ្នកចងការប្រាក់ខុសច្បាប់ ជាពិសេស គឺកម្ចីអនឡាញដែលប្រតិបត្តិការដោយជនបរទេសអាចមានសិទ្ធិមិនសង ហើយមិនតែប៉ុណ្ណោះសមត្ថកិច្ចកម្ពុជានឹងចេញមុខការពារពលរដ្ឋថែមទៀត ។ ប៉ុន្តែទោះបីជាយ៉ាងណាក៏ដោយពលរដ្ឋកុំច្រឡំអ្នកជំពាក់កម្ចីផ្លូវការនានា គឺនៅដដែលពីព្រោះវា គឺជាកាតព្វកិច្ច ។
ក្រោយពេលដែលបញ្ហាកម្ចីអនឡាញនេះបានកើនឡើងពីមួយថ្ងៃទៅមួយថ្ងៃ ហើយពលរដ្ឋរងគ្រោះកាន់តែច្រើនលោក ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានប្រកាសជាចំហរជាសាធារណៈថា ពលរដ្ឋមិនបាច់សងពួកគេក៏បានពីព្រោះនេះ គឺជាសកម្មភាពខុសច្បាប់ ។
លោកឧបនាយករដ្ឋមន្ត្រីបានថ្លែងនៅពេលបិទសន្និបាតក្រសួងមហាផ្ទៃថា ប្រសិនបើក្រុមអ្នកឱ្យខ្ចីប្រាក់នោះជាក្រុមដែលខុសច្បាប់ ពោលជាក្រុមជនបរទេសដែលធ្វើការផ្តល់កម្ចីតាមអនឡាញជាដើមនោះ គឺកុំសងតែម្តង ។ បើសិនជាពួកគេរករឿងណាមួយ សូមប្តឹងមកសមត្ថកិច្ច ។
នៅក្នុងពេលជាមួយគ្នានោះ លោកក៏បានសង្កត់ធ្ងន់ថា ពលរដ្ឋក៏គួរតែញែកឲ្យដាច់ និងច្បាស់លាស់ រវាងកម្ចីជាមួយស្ថាប័នមីក្រូហិរញ្ញវត្ថុ ឬអង្គភាពផ្តល់ប្រាក់កម្ចីដែលគេធ្វើប្រតិបត្តិការស្របតាមច្បាប់ និងកម្ចីជាលក្ខណៈឯកជនបុគ្គល និងបុគ្គលដែលផ្ទុយពីកម្ចីខុសច្បាប់នោះ គឺត្រូវតែមានកាតព្វកិច្ចសងទៅតាមច្បាប់ និងការព្រមព្រៀង ។
ពាក់ព័ន្ធនឹងករណីនេះ លោក ទូច សុខៈ អ្នកនាំពាក្យរងនៃក្រសួងមហាផ្ទៃក៏បានថ្លែងបញ្ជាក់បន្ថែមពីបញ្ហាលើបញ្ហានេះថា «ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃបានណែនាំ និងដាក់គោលការណ៍ទៅរដ្ឋបាលដែនដី និងសមត្ថកិច្ចចំណុះក្រសួងថា កម្ចីតាមអនឡាញខុសច្បាប់ពលរដ្ឋមិនបាច់សង ។
លោកបានបន្តថា នៅក្នុងករណីដែលក្រុមនោះចុះទៅធ្វើសកម្មភាពគំរាមកំហែង សម្លុត ដោយរូបភាពណាក៏ដោយ សូមក្លាហានហ៊ានប្តឹងទៅសមត្ថកិច្ច ដោយសារតែសមត្ថកិច្ច គឺត្រៀមខ្លួនរួចជាស្រេច ដើម្បីជួយបងប្អូនប្រជាពលរដ្ឋគ្រប់រូប ។
លោកបានបន្តបញ្ជាក់ថា «នេះ គឺជាស្មារតីនៃការព្រួយបារម្ភរបស់ថ្នាក់ដឹកនាំ និងជាគោលការណ៍ឲ្យអាជ្ញាធរចាត់វិធានការផ្លូវច្បាប់ប្រឆាំងនឹងក្រុមដើរផ្តល់ប្រាក់កម្ចីអនឡាញខុសច្បាប់ » ។ លោកបានបន្តថា «នេះគឺជាសារដែលថ្នាក់ដឹកនាំរបស់ក្រសួងមហាផ្ទៃឲ្យសមត្ថកិច្ចនៅមូលដ្ឋានជួយអន្តាគមន៍ដល់ពលរដ្ឋអោយបានទាន់ពេលទាន់វេលានៅក្នុងករណីដែលក្រុមកម្ចីខុសច្បាប់ទាំងនោះទៅអុកឡុក និងដាក់សំពាធពលរដ្ឋ »។
លោក ទូច សុខៈ បានបន្តថា លោកឧបនាយករដ្ឋមន្ត្រីបានស្នើឲ្យមានការផ្សព្វផ្សាយករណីនេះឲ្យបានទូលំទូលាយ ដល់ប្រជាពលរដ្ឋ ។
ជុំវិញព័ត៌មាននេះ លោក ឃឿន សារ៉េត ដែលជាអ្នករត់ម៉ូតូកង់បីឥណ្ឌា មួយរូបបានចែករំលែកថា លោកមិនបានទទួលព័ត៌មាននេះនៅឡើយទេ ប៉ុន្តែប្រសិនបើសមត្ថកិច្ចអាចជួយពលរដ្ឋបានលើរឿងនេះ គឺជាការល្អប្រសើរមែនទែន ។
លោកបានបន្តទៀតថា បើសមត្ថកិច្ចពិតជាអាចជួយពលរដ្ឋលើរឿងនេះបានល្អមែនទែន ពីព្រោះឭថា ពួកកម្ចីអនឡាញនេះមានខ្នងក្រាស់ៗណាស់ ហើយមកដល់ពេលនេះមានពលរដ្ឋរត់ចោលស្រុក ហើយអស់ទ្រព្យសម្បត្តិនោះក៏មិនតិចដែរ ។ ប្រជាពលរដ្ឋម្នាក់ដែលសុំមិនបញ្ចេញឈ្មោះបានលើកឡើងថា បើក្រសួងមហាផ្ទៃធ្វើបានដូចលោកឧបនាយករដ្ឋមន្ត្រីនិយាយមែន ពលរដ្ឋសប្បាយចិត្តច្រើនមិនខាន ។ លោកបានបញ្ជាក់ថា «រដ្ឋមន្ត្រីមហាផ្ទៃអេះចំកន្លែងរមាស់ហើយ ប៉ុន្តែសំខាន់ថា អាជ្ញាធរនៅថ្នាក់ក្រោមនឹងងធ្វើតាមការលើកឡើងនេះឬអត់ប៉ុណ្ណោះ» ។
មកដល់ពេលនេះផលប៉ះពាល់កម្ចីអនឡាញនៅកម្ពុជាមានច្រើន ប៉ុន្តែស្ថិតិនៃផលប៉ះពាល់ដោយសារកម្ចីអនឡាញនៅកម្ពុជាហាក់មិនទាន់ត្រូវបានបញ្ចេញដោយសា្ថប័នណាមួយនៅឡើយទេ ។ អ្វីដែលគេបានផ្សព្វផ្សាយកន្លងមក គឺភាគច្រើនមានតែសេចក្តីព្រួយបារម្ភ និង ចំណាត់ការនៅលើក្រដាស់របស់ធនាគារជាតិនៃកម្ពុជា ។
មកដល់ពេលនេះកម្ពុជា មានធនាគារពាណិជ្ជចំនួន ៥៩ ធនាគារឯកទេសចំនួន ៩ គ្រឹះស្ថានមីក្រូហិរញ្ញវត្ថុចំនួន៨៧ និងគ្រឹះស្ថានឥណទានជនបទចំនួន ១១៥ ដែលមានគណនីបញ្ញើប្រហែលជាង២១លានគណនី និងគណនីឥណទាន (គណនីសម្រាប់សងប្រាក់)ចំនួន ៤លាន ។
ធនាគារជាតិនៃកម្ពុជាកន្លងមកបានឲ្យដឹងថា គិតត្រឹមដែលតុលា ឆ្នាំ២០២៤ ប្រាក់កម្ចីដែលពលរដ្ឋជំពាក់គ្រឹះស្ថានធនាគារ និងស្ថាប័នហិរញ្ញវត្ថុមានតម្លៃប្រមាណជាជិត៦១ ពាន់លានដុល្លារ ប៉ុន្តែកម្ចីអនឡាញធនាគារជាតិមិនបានបញ្ជាក់ថា វាមានចំនួនប៉ុន្មាននោះទេ ៕
ចែករំលែកព័តមាននេះ