ខេត្តស្វាយរៀង ៖ មានករណីភ្ញាក់ផ្អើលដល់ប្រជាពលរដ្ឋ និងអ្នកធ្វើដំណើរតាមដងផ្លូវ នាំគ្នាផ្អើលចោមរោមឈរមើលដោយក្រុមក្មេងៗ អ្នករើសអេតចាយស្រែកប្រាប់ថា មានមនុស្សរអិលជើងធ្លាក់ចូលក្នុងទឹកប្រឡាយ បង្ហៀទឹកទន្លេវ៉ៃគោក្រោម ក៏ប៉ុន្តែគ្មានអ្នកណាម្នាក់ ចុះទៅជួយស្រង់ក្មេងលង់ទឹកនោះទេ…
ខេត្តស្វាយរៀង ៖ មានករណីភ្ញាក់ផ្អើលដល់ប្រជាពលរដ្ឋ និងអ្នកធ្វើដំណើរតាមដងផ្លូវ នាំគ្នាផ្អើលចោមរោមឈរមើលដោយក្រុមក្មេងៗ អ្នករើសអេតចាយស្រែកប្រាប់ថា មានមនុស្សរអិលជើងធ្លាក់ចូលក្នុងទឹកប្រឡាយ បង្ហៀទឹកទន្លេវ៉ៃគោក្រោម ក៏ប៉ុន្តែគ្មានអ្នកណាម្នាក់ ចុះទៅជួយស្រង់ក្មេងលង់ទឹកនោះទេ បានតែត្រឹមមកឈរមើលត្រៀបត្រាតែប៉ុណ្ណោះ ។
ករណីក្មេងប្រុសធ្លាក់ទឹកប្រឡាយនេះ កើតឡើងនៅវេលាម៉ោង០៩និង៣០នាទីព្រឹកថ្ងៃទី១៥ កុម្ភៈ ២០២៥ នៅចំណុចក្បាលហុងប្រឡាយបង្ហៀទឹកទន្លេវ៉ៃគោក្រោម ខាងកើតស្ពានតាហោ ចម្ងាយជាង១០០ម៉ែត្រ ស្ថិតនៅភូមិក្បាលស្ពាន សង្កាត់ពោធិតាហោ ក្រុងស្វាយរៀង ។
បើតាមប្រជាពលរដ្ឋ ដែលនៅជិតកន្លែងកើតហេតុ បានឲ្យដឹងថា មុនពេលកើតហេតុ គេឃើញក្មេងៗប្រុស អាយុប្រមាណជា០៧ ដល់១០ឆ្នាំ ចំនួន០៤នាក់ ដើររើសអេតចាយ (សំបកដប សំបកកំប៉ុង) តាមមាត់ប្រឡាយ ស្រាប់តែមានក្មេងប្រុសម្នាក់ ក្នុងចំណោម០៤នាក់ បានរអិលជើងធ្លាក់ចូលក្នុងទឹកប្រឡាយទឹក លេចបាត់ឈឹង ខណៈនោះក្មេងៗ ស្រែកប្រាប់ថា អាអូនលេចទឹកបាត់ហើយ រត់ទៅហៅឪ មក! ខណៈនោះ ក្មេងម្នាក់បានរត់ទៅផ្ទះ ហៅឪពុកម្តាយ ហើយពេលមកដល់វិញ ចំណាយពេលជិតកន្លះម៉ោងទៅហើយ។ រីឯ មនុស្សម្នា អ្នកភូមិនិងអ្នកធ្វើដំណើរតាមដងផ្លូវ បានត្រឹមតែនាំគ្នាមកឈរមើលទៅក្នុងទឹកប្រឡាយ ពុំឃើញមានអ្នកណាម្នាក់ ចុះទៅរាវរក ឬស្រង់ក្មេងរងគ្រោះឡើយ ។
ប្រភពបន្តថា ខណៈនោះ គេឃើញមានមន្ត្រីនគរបាលប៉ុស្តិ៍រដ្ឋបាលសង្កាត់ពោធិតាហោ មកដល់ដែរ ក៏ប៉ុន្តែមិនហ៊ានចុះទៅរាវ រកជនរងគ្រោះទេ បានត្រឹមហៅគេហៅឯង ឲ្យជួយ រយៈពេលជិត១ម៉ោង ទើបរកបានអ្នកចេះហែលទឹកបាន២នាក់ មកជួយចុះរាវ អស់រយៈពេលកន្លះម៉ោង ទើបរកឃើញ ប៉ុន្តែពេលរកឃើញស្រង់ឡើង គឺអ្វីៗហួសពេលទៅហើយ ដោយក្មេងរងគ្រោះ លង់ទឹកជិត២ម៉ោងទៅហើយ ។
សមត្ថកិច្ចបានប្រាប់ថា ជនរងគ្រោះ អាយុ៧ឆ្នាំ ជាសិស្ស មានទីលំនៅភូមិរោងបន្លែ សង្កាត់ស្វាយរៀង ក្រុងស្វាយរៀង ខេត្តស្វាយរៀង ។
ក្រោយពីសមត្ថកិច្ចធ្វើកោសលវិច័យរួច បានប្រគល់សព ឲ្យឪពុកម្តាយយកទៅធ្វើបុណ្យតាមប្រពៃណី ៕
ចែករំលែកព័តមាននេះ