ខេត្តកំពង់ឆ្នាំង ៖ សមត្ថកិច្ចនគរបាលនៃស្នងការដ្ឋាននគរបាលខេត្តកំពង់ឆ្នាំង កាលពីរសៀលថ្ងៃទី១២ កុម្ភៈ ឆ្នាំ២០២៥ បានបង្ហាញមុខក្មេងទំនើងចំនួន១០នាក់ ដែលបានធ្វើសកម្មភាពបង្ហោះម៉ូតូនៅចំណុចផ្លូវវាងក្រុង ហើយត្រូវបានបណ្ដាញសង្គមថតបង្ហោះជាសាធារណៈ ដោយទាមទារឲ្យនាំក្មេងទាំងនោះមកធ្វើការអប់រំ…
ខេត្តកំពង់ឆ្នាំង ៖ សមត្ថកិច្ចនគរបាលនៃស្នងការដ្ឋាននគរបាលខេត្តកំពង់ឆ្នាំង កាលពីរសៀលថ្ងៃទី១២ កុម្ភៈ ឆ្នាំ២០២៥ បានបង្ហាញមុខក្មេងទំនើងចំនួន១០នាក់ ដែលបានធ្វើសកម្មភាពបង្ហោះម៉ូតូនៅចំណុចផ្លូវវាងក្រុង ហើយត្រូវបានបណ្ដាញសង្គមថតបង្ហោះជាសាធារណៈ ដោយទាមទារឲ្យនាំក្មេងទាំងនោះមកធ្វើការអប់រំ ។
សូមរំលឹកថា កាលពីពេលថ្មីៗនេះ មានផេកមួយឈ្មោះ Munកំប្លែង បានបង្ហោះខ្លឹមសារនិងរូបភាពវីដេអូស្តីពីសកម្មភាពក្មេងមួយក្រុមបង្ហោះម៉ូតូអមដោយខ្លឹមសារថា (ខំបន្តិចទៀតអាអូន ទំពាំងស្អុយនៅខាងខេត្តកំពង់ឆ្នាំងបងប្អូន ឥលូវបន្តិចទៀតបានវាស់កម្ពស់ហើយ ។ លេងបង្ហោះម៉ូតូនៅលើផ្លូវជាតិបងប្អូនអើយនៅខាងខេត្តកំពង់ឆ្នាំង មន្ត្រីប៉ូលិសបើឃើញហើយចុះទៅបង្ក្រាប់ផងបងប្អូនអើយមើលៗផងអោយសុទ្ធតែទំពាំងស្អុយទេនៀក នៅស្រុកខ្មែរយើងមានច្រើនណាស់) ។
លោក ប៉ុល វុទ្ធី ស្នងការរងនគរបាលខេត្តកំពង់ឆ្នាំងបានបញ្ជាក់ថា ក្រោយឃើញការបង្ហោះក្នុងបណ្តាញសង្គមបែបនេះ លោកឧត្តមសេនីយ៍ត្រី តេង ចាន់ណាត ស្នងការនគរបាលខេត្តកំពង់ឆ្នាំង បានចេញបទបញ្ជាឱ្យស្រាវជ្រាវរហូតដល់ថ្ងៃទី១១និង ១២ខែកុម្ភៈ ទើបសម្រេចឃាត់ខ្លួនបានចំនួន១០នាក់ និងម៉ូតូចំនួន៩គ្រឿង ។
ក្រោយធ្វើការសាកសួរពួកគេបានឆ្លើយសារភាពថា កាលពីថ្ងៃទី៣០ ខែមករា ឆ្នាំ២០២៥ វេលាម៉ោង៥និង៣០នាទីរសៀល នៅចំណុចផ្លូវកោងវាងក្រុង ស្ថិតនៅក្នុងភូមិត្រពាំងពោធិ៍ ឃុំពង្រ ស្រុករលាប្អៀរ ខេត្តកំពង់ឆ្នាំង ពួកគេបានដាក់ម៉ូតូតំរៀបគ្នាលើផ្លូវជាតិលេខ៥ ក្នុងគន្លងផ្លូវម៉ូតូ ដើម្បីថតរូបនិងថតជាវីដេអូ ។ នៅពេលនោះស្រាប់តែពួកគេ២នាក់ ក្នុងចំណោមជាង១០នាក់បានជិះម៉ូតូបង្ហោះ ពិតប្រាកដមែនគឺឈ្មោះ ថូ សាវី និងឈ្មោះ រះ (មិនស្គាល់អាស័យដ្ឋានកំពុងគេចខ្លួន)។
លោក ប៉ុលវុទ្ឋី បានបន្តថា ក្រោយធ្វើការអប់រំពីលោកឧត្តមសេនីយ៍ស្នងការនគរបាលខេត្ត និង នគរបាលជំនាញព្រហ្មទណ្ឌកម្រិតស្រាលនៅចំពោះមុខ ឪពុកម្តាយ និងអាណាព្យាបាលក្រុមកេ្មងទាំងនោះ បានធ្វើកិច្ចសន្យាបញ្ឈប់សកម្មភាព ហើយបានអនុញ្ញាតអោយវិលត្រឡប់ទៅផ្ទះវិញ ដោយរក្សាទុកតែម៉ូតូចំនួន២គ្រឿង ដែលធ្វើសកម្មភាពបង្ហោះនៅអធិការដ្ឋាននគរបាលស្រុករលាប្អៀររយៈពេល៣ខែ ៕
ចែករំលែកព័តមាននេះ