ដឹងមូលហេតុហើយ! ករណីឆេះផ្ទះលក់សាំង នៅតំបន់សេដ្ឋកិច្ចចេជាង ក្នុងស្រុកព្រៃនប់​ ព្រឹក​មិញ​

ខេត្តព្រះសីហនុ ៖ មានករណីអគ្គីភ័យបានឆាប​ឆេះផ្ទះលក់សាំងមួយកន្លែង ​រាលដាលឆេះបន្ទប់ជួលស្នាក់នៅរបស់កម្មករមួយចំនួនផងដែរ ។ ក្នុងហេតុការណ៍នេះដែរ​ បណ្តាល​ឱ្យ​បុរសជាម្ចាស់ផ្ទះម្នាក់រងរបួសស្រាល​ ។

ហេតុការណ៍ខាងលើនេះ​បង្កការភ្ញាក់ផ្អើល​កាលពីវេលាម៉ោង៨និង១០នាទីព្រឹក​ថ្ងៃទី១២ ខែកុម្ភៈ ឆ្នាំ២០២៥ នៅចំណុចតំបន់សេដ្ឋកិច្ចចេជាង ស្ថិតក្នុង​ភូមិត្រពាំងមូល ឃុំជើងគោ ស្រុកព្រៃនប់ខេត្តព្រះសីហនុ ។​

ម្ចាស់ផ្ទះរងគ្រោះឈ្មោះ លាន ធូ ភេទប្រុស អាយុ៤២ឆ្នាំ មុខរបរលក់ដូរ និងថតរូប ត្រូវជាប្តី និងប្រពន្ធឈ្មោះ ឈាន ហ៊ួរ ភេទស្រី អាយុ៤០ឆ្នាំ មុខរបរលក់ដូរ ។

តាមការរៀបរាប់របស់ស្ត្រីជាប្រពន្ធ​បាន​ឱ្យដឹង​ថា មុនកើតហេតុ ប្តីរបស់​គាត់នៅមុខផ្ទះ ហើយកំពុងថតរូបឱ្យ​គេ២នាក់​ ចំណែករូបគាត់នៅផ្ទះបាយ ស្រាប់តែ​គាត់​ឮសម្លេងផ្ទុះ​កំប៉ុងឮសូរផូសៗ លុះគាត់មកមើលក៏ឃើញ​ភ្លើងបានឆាបឆេះយ៉ាងខ្លាំង​ទៅហើយ ។

តាមរបាយការណ៍របស់សមត្ថកិច្ចអធិការដ្ឋាននគរបាលស្រុកព្រៃនប់​បាន​ឱ្យ​ថា យោងតាមការបំភ្លឺរបស់ឈ្មោះ យាន ហួរ ត្រូវជាប្តី បានប្រាប់សមត្ថកិច្ចថា មុនពេលកើតហេតុ រូបគាត់បានកំពុងថតរូបឲ្យ​គេពីរនាក់នៅរោងជាប់ផ្ទះ ស្រាប់តែ​មានអគ្គីភ័យឆាបឆេះឡើងគឺបណ្ដាលមកពីឆ្លងចរន្តអគ្គិសន្នី ឆេះដុំទប់ភ្លើង ក្នុងពេលនោះរូបគាត់បានបាញ់ទឹកពន្លត់ដែរ ក៏ប៉ុន្តែមិនអាចទប់​បាន គឺ​ភ្លើងរឹតតែឆេះខ្លាំងឡើងៗតែម្តង ។

តាមរបាយការណ៍បាន​ឱ្យដឹងបន្តថា ផ្ទះកើតហេតុខាងលើជា​ប្រភេទសំណង់ជាន់​ផ្ទាល់ដី សង់អំពីថ្ម ដំបូលប្រក់សង្គ័សី មានទំហំទទឹង១០ម៉ែត្រគុណនឹងបណ្ដោយ២០ម៉ែត្រ ។​

​ក្នុងករណីខាងលើបណ្តាលឱ្យរងការ​ខូចខាតរួមមាន ឆេះបន្ទប់ជួលចំនួន១៣បន្ទប់ ប្រហែល៥០ភាគរយ ឆេះផ្ទះ១ខ្នងអស់ទាំងស្រុង ។ លុយខ្មែរចំនួន២០លានរៀល និងលុយដុល្លារចំនួន៣០០ដុល្លារ ព្រមទាំងសម្ភារៈ លក់ដូរ និងឯកសារពាក់ព័ន្ធផ្សេងៗមួយចំនួនទៀត ។ ចំពោះមូលហេតុបណ្តាលមកពីឆ្លងចរន្តអគ្គិសនីដុំទប់ភ្លេីងបង្កជាអគ្គិភ័យ។

ករណីអគ្គិភ័យខាងលើបានចេញរថយន្តពន្លត់អគ្គិភ័យរបស់ស្នងការដ្ឋាននគរបាល ខេត្តព្រះសីហនុចំនួន០៣គ្រឿង បានប្រេីប្រាស់ទឹក​អស់ចំនួន០៣ឡានស្មើនិង២០ម៉ែត្រគូប, រថយន្តពន្លត់អគ្គិភ័យរបស់អធិការដ្ឋាននគរបាលស្រុកព្រៃនប់ចំនួន០២គ្រឿងបានប្រើប្រាស់ទឹកអស់៦ឡានស្មើ១៨​ម៉ែត្រគូប, រថយន្តពន្លត់អគ្គិភ័យរបស់ក្រុមហ៊ុនចំនួន០២គ្រឿងបានប្រើប្រាស់ទឹកអស់០៥ឡានស្មើ២០ម៉ែត្រគូប។

ក្នុងករណីអគ្គិភ័យខាងលើនេះដែរ សមត្តកិច្ចបានសហការគ្នាប្រើប្រាស់រថយន្តជាច្រើនគ្រឿង មានមកពីស្នងការនគរបាលខេត្ត មកពីអ្នកឧកញ្ញ៉ាទៀ វិចិត្រ ដូងប្រេង និងអធិការនគរបាលស្រុក ប្រើប្រាទឹកជាច្រើន នៅតែមិនអាចជួយសង្គ្រោះបាន ព្រោះផ្ទះដែលឆាប់ឆេះ មានបើកស្ថានីយលក់សាំង (មានស៊ីទែនសាំងបណ្តែតនៅលើ មិនកប់ដី តែមិនផ្ទះស៊ីទែនទេ) ។

អគ្គីភ័យខាងលើ ត្រូវបានពន្លត់នៅវេលា​ម៉ោង៩និង​៣០ព្រឹកថ្ងៃដដែល ដោយប្រើប្រាស់ទឹកជាច្រើនរថយន្ត ​និង​មិនបង្ករបួសស្នាមធ្ងន់ធ្ងរនោះទេ គ្រាន់តែ​​បុរសជាម្ចាស់ផ្ទះ​រងរបួស​ត្រូវដៃបន្តិច ៕​