ទីក្រុងប្រ៊ុចសែល៖ សហភាពអឺរ៉ុប និងប្រទេសកាណាដាចាប់ផ្ដើមខិតជិតគ្នានៅពេលដែលខ្លួនកំពុងជិះនៅលើទឹកតែមួយនៅក្នុងជម្លោះពាណិជ្ជកម្មជាមួយអាមេរិកបន្ទាប់ពីលោកត្រាំចាត់ការយ៉ាងចាស់ដៃទៅលើទំនិញរបស់កាណាដាដោយដំឡើងពន្ធ២៥%។ គ្រាន់តែថាពន្ធនេះព្យួរទុករយៈពេល៣០ថ្ងៃសិន។ អ្នកវិភាគយល់ថាកាណាដាចង់រំដោះខ្លួនចេញពីខ្នោះឃ្នាងនៃអន្ទាក់ពាណិជ្ជកម្មដែលកំពុងរួបរឹតយ៉ាងធ្ងន់ធ្ងរ។
មិនធម្មតាទេ ពន្ធ២៥%បានអីនឹងចំណេញទៀត? ម៉្លោះហើយ អ្នកវិនិយោគនឹងរើរោងចក្ររបស់ខ្លួនទៅប្រទេសផ្សេងជាមិនខានឡើយ។ អឺរ៉ុប និងកាណាដាធ្លាប់ទទួលបានអត្ថប្រយោជន៍ពីកិច្ចព្រមព្រៀងពាណិជ្ជកម្មដែលចុះហត្ថលេខាកាលពីឆ្នាំ២០១៧។ តាមរយៈនេះ ភាគីទាំង២អាចជំរុញទំហំពាណិជ្ជកម្មច្រើនជាងមុន៦៥% និងបង្កើតភាពជាដៃគូយុទ្ធសាស្ត្រខាងផ្គត់ផ្គង់វត្ថុធាតុដើមកាលពីឆ្នាំ២០២១។
កាលពីថ្ងៃសៅរ៍ រដ្ឋមន្ត្រីពាណិជ្ជកម្មកាណាដា លោកស្រីម៉ារី ង៉ (Mary Ng) បានជួបពិភាក្សាជាមួយប្រធានកិច្ចការពាណិជ្ជកម្មរបស់សហភាពអឺរ៉ុបបន្ទាប់ពីលោក និងលោកស្រីជួបប្រជុំជាមួយនាយកអង្គការពាណិជ្ជកម្មពិភពលោកនៅទីក្រុងហ្សឺណែវ ប្រទេសស្វីស។ លោកស្រីបញ្ជាក់ថាដំណើរការចរចាគ្នាដើម្បីសម្រេចឱ្យបានកិច្ចព្រមព្រៀងរវាងភាគីទាំង២កំពុងបន្ត។
អ្វីដែលសំខាន់គឺភាគីទាំង២ខិតខំជួយវិស័យធុរកិច្ចរបស់កាណាដាដើម្បីបណ្ដាក់ទុនវិនិយោគនៅអឺរ៉ុប។ ក៏ដូចគ្នា យើងត្រូវខិតខំជួយវិស័យធុរកិច្ចរបស់អឺរ៉ុបដើម្បីវិនិយោគនៅកាណាដាវិញ។ លោកស្រីថ្លែងថាបញ្ហាធនធានរ៉ែសំខាន់ៗ និងអាជីវកម្មខ្នាតតូចជាប្រធានបទសំខាន់ដែលកាណាដាត្រូវជជែកគ្នាជាមួយអឺរ៉ុប។ ជាពិសេស អឺរ៉ុបចង់ចាប់ដៃគូជាមួយកាណាដាដើម្បីផ្គត់ផ្គង់លោហធាតុសំខាន់ៗដូចជាកូបាល់, លីចូម និងនីកែល (cobalt, lithium & nickel) ដើម្បីកាត់បន្ថយការនាំចូលពីប្រទេសចិន។
កាណាដាកំពុងធ្វើពិពិធកម្មលើមុខទំនិញដែលនាំចេញ និងធ្លាប់បានកំណត់គោលដៅកាលពីឆ្នាំ២០១៨ដើម្បីធ្វើយ៉ាងណាជំរុញអត្រានាំចេញទៅប្រទេសផ្សេងពីអាមេរិកឱ្យបានលើសមុន៥០%ត្រឹមឆ្នាំ២០២៥។ ដើម្បីសម្រេចគោលដៅនេះ កាណាដាទើបតែចុះកិច្ចព្រមព្រៀងពាណិជ្ជកម្មជាមួយឥណ្ឌូណេស៊ីកាលពីខែធ្នូ ឆ្នាំ២០២៤ និងជាមួយអេក្វាឌ័រកាលពីសប្ដាហ៍មុន។
ឥឡូវនេះណាដាកំពុងដាក់ជើងចូលតំបន់ឥណ្ឌូ-ប៉ាស៊ីហ្វិចយ៉ាងពេញទំហឹងទៀត។ នៅសប្ដាហ៍ក្រោយ, កាណាដាត្រៀមដឹកនាំគណៈប្រតិភូ និងថ្នាក់ដឹកនាំធុរកិច្ចជាង២០០នាក់ទៅអូស្ត្រាលី, សិង្ហបុរី និងប្រ៊ុយណេ។ តាមមើលទៅ កាណាដាប្រហែលជាមិនអាចរំពឹងថាចាប់ដៃឱ្យបានស្អិតល្មួតជាមួយអាមេរិកនៅក្នុងសម័យកាលរបស់លោកត្រាំបានឡើយ។
កាណាដាព្រមានថាខ្លួននឹងចាត់វិធានការវាយបកទៅលើការដំឡើងពន្ធរបស់លោកត្រាំ។ រដ្ឋមន្ត្រីពាណិជ្ជកម្មកាណាដាថ្លែងថារដ្ឋាភិបាលរបស់លោកស្រីត្រៀមដាក់ពាក្យប្ដឹងទៅអង្គការពាណិជ្ជកម្មពិភពលោកបើសិនផុតកំណត់៣០ថ្ងៃ លោកត្រាំចាប់ផ្ដើមដំឡើងពន្ធ។ ប្រទេសចិនបានដាក់ពាក្យប្ដឹងរួចហើយ។ ប៉ុន្តែ WTO ប្រហែលជាមិនអាចធ្វើអ្វីបានទេនៅចំពោះមុខនៃសង្គ្រាមពាណិជ្ជកម្មដ៏ក្ដៅគគុករវាងប្រទេសមហាអំណាច។ ជាគោលការណ៍ បើ WTO មានចៅក្រមតិចជាង៣រូប មានន័យថាមិនអាចកាត់សេចក្ដីបានឡើយ។ អាមេរិកតាំងពីជំនាន់លោកត្រាំអាណត្តិទី១ ឆ្លងចូលដល់ជំនាន់លោកបៃដិន បានបិទខ្ទប់ស្ថាប័នមួយនេះមិនឱ្យតែងតាំងចៅក្រមថ្មីទេ៕
ចែករំលែកព័តមាននេះ