ខេត្តប៉ៃលិន ៖ មានសេចក្តីរាយការណ៍ពីប្រជាពលរដ្ឋជាច្រើននាក់ រស់នៅក្នុងភូមិផ្សារព្រំ ខេត្តប៉ៃលិន កាលពីរសៀលថ្ងៃទី០៧ ខែកុម្ភៈ ឆ្នាំ២០២៥ ថា ពួកគាត់ពិតជាការព្រួយបារម្ភខ្លាំងពីសុវត្ថិភាព…
ខេត្តប៉ៃលិន ៖ មានសេចក្តីរាយការណ៍ពីប្រជាពលរដ្ឋជាច្រើននាក់ រស់នៅក្នុងភូមិផ្សារព្រំ ខេត្តប៉ៃលិន កាលពីរសៀលថ្ងៃទី០៧ ខែកុម្ភៈ ឆ្នាំ២០២៥ ថា ពួកគាត់ពិតជាការព្រួយបារម្ភខ្លាំងពីសុវត្ថិភាព ចំពោះបញ្ហាគ្រោះធម្មជាតិ ដែលនឹងកើតឡើងដោយសារទឹកជំនន់លិចលង់លំនៅឋាន ដែលបណ្តាលមកពីជំនន់ទឹកភ្លៀងនារដូវវស្សា ខណៈពេលដែលសង្កេតឃើញអ្នកមានលុយម្នាក់ បានសាងសង់អគារដ៏ខ្ពស់ត្រដែត កំពុងរំលោភលើចំណីអូរធម្មជាតិ ដែលស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
បើតាមប្រជាពលរដ្ឋរស់នៅក្នុងភូមិខាងលើ បានរៀបរាប់ឱ្យភ្នាក់ងារសារព័ត៌មានកាសែតកោះសន្តិភាពដឹងថា អស់រយៈពេលជាច្រើនខែមកហើយ ដែលមានគេយកគ្រឿងសំណង់ទៅសង់អគាររំលោភលើចំណីអូរធម្មជាតិក្បែរច្រកទ្វារអន្តរជាតិ កម្ពុជាថៃ ដោយមិនគិតខ្វល់ដល់បញ្ហាកកស្ទះប្រព័ន្ធផ្លូវទឹកហូរនារដូវភ្លៀងធ្លាក់ខ្លាំង ខណៈដែលកាលពីចុងឆ្នាំ២០២៤កន្លងទៅ បញ្ហាកកស្ទះប្រព័ន្ធផ្លូវទឹកត្រង់ចំណុចអូរខាងលើ បានបណ្តាលឱ្យលិចលង់ផ្ទះសម្បែងរបស់ពួកគាត់ បណ្តាលឱ្យអណ្តែតអស់សម្ភារៈផ្ទះបាយ សម្លៀកបំពាក់ ឆ្នាំងចាន ធ្វើឱ្យខូចខាតគ្រឿងសម្ភារៈប្រើប្រាស់ផ្សេងៗ ជាដើម ហើយប៊ិះតែនឹងរងគ្រោះបាត់បង់អាយុជីវិតមនុស្សក្មេងចាស់ថែមទៀតផង ធ្វើឱ្យម្នាក់ៗព្រលឹងចុងសក់ លុះក្រោយមកទឹកជំនន់ក៏ស្រកទៅវិញ។
ពួកគាត់បន្តទៀតថា ចាប់តាំងពីបុកគ្រឹះរហូតមកដល់ពេលនេះ មិនទាន់ឃើញមានមន្ត្រីជំនាញណាចុះទៅធ្វើការណែនាំ ឬហាមឃាត់កុំឱ្យបន្តការសាងសង់នោះឡើយ ដោយឃើញទៅមើលហើយត្រឡប់មកវិញ ពោលគឺពួកគេដាក់កម្មករឱ្យសាងសង់យ៉ាងរលូន ដោយមិនគិតពីហានីភ័យខ្ពស់នាខែវស្សា ខណៈដែលមានភ្លៀងផ្គរបង្កជាទឹកជំនន់លិចលង់ផ្ទះពួកគាត់នោះឡើយ។
ពួកគាត់បានសំណូមពរឱ្យអាជ្ញាធរមូលដ្ឋាន មេត្តាចុះទៅពិនិត្យ វាស់វែងឱ្យបានត្រឹមត្រូវតាមលក្ខណៈបច្ចេកទេស នៃការរក្សាចំណីអូរ ឬស្ទឹងឱ្យបានត្រឹមត្រូវ ដើម្បីរក្សាផ្លូវទឹកហូរឱ្យបានលឿន ឆាប់រហ័ស និងទាន់ពេលវេលា។
ពាក់ព័ន្ធទៅនឹងបញ្ហានេះ លោក គឹម សុខា អភិបាលរងស្រុកសាលាក្រៅបានឱ្យដឹងថា អ្នកសាងសង់អគារខាងលើ ជាជនជាតិខ្មែរ ដោយគេមានច្បាប់ទម្លាប់ត្រឹមត្រូវអស់ហើយ។ លោកបន្តទៀតថា ការដែលគេសង់អគារនេះ មិនទាន់ដឹងថា ចេញឬចូលចំណីអូរនោះទេ បើចង់ដឹងច្បាស់ទាល់តែខាងមន្ត្រីជំនាញយកម៉ាស៊ីនទៅវាស់វែងផ្ទៀងផ្ទាត់ ទើបបានដឹងពិតប្រាកដ។
បើតាមប្រភពព័ត៌មានពីលោក ង៉ា លីហុង ប្រធានមន្ទីរធនធានទឹក និងឧត្តុនិមខេត្តប៉ៃលិន បានឱ្យដឹងថា ៖ នៅរសៀលថ្ងៃដដែលនេះ ខាងលោក និងលោកអភិបាលស្រុកសាលាក្រៅ ព្រមទាំងលោកប្រធានមន្ទីរសុរិយោដីខេត្តប៉ៃលិន កំពុងចុះទៅពិនិត្យមើលនៅក្នុងអគារខាងលើ ដើម្បីវាស់វែងនៅថ្ងៃបន្ទាប់ រួចដាក់របាយការណ៍នេះ ជូនលោកជំទាវអភិ បាលខេត្តពិនិត្យផងដែរ។
លោកបន្តទៀតថា កាលពីមុន ខាងមន្ត្រីជំនាញបានចុះទៅត្រួតពិនិត្យរួចរាល់ម្តងហើយ ដោយវាស់វែង និងអនុញ្ញាតឱ្យកាយចេញ និងវាស់ចំណីរួចរាល់។ តែកាលពីព្រឹកមិញនេះ មានគេរាយការណ៍ជូនខាងលោក ពាក់ព័ន្ធនឹងបញ្ហានេះថា គេសាងសង់រំលោភចំណីអូរ ដូច្នេះខាងលោកនឹងសហការជាមួយមន្ត្រីជំនាញពិនិត្យមើលម្តងទៀត៕
ចែករំលែកព័តមាននេះ