ខេត្តត្បូងឃ្មុំ ៖ សេចក្តីរាយការណ៍បានបន្តឱ្យដឹងថា គិតត្រឹមម៉ោង១០យប់ថ្ងៃទី០៧ កុម្ភៈ ២០២៥ ពាក់ព័ន្ធករណីបាញ់ប្រហារទាំងគ្រួសាររបស់មន្ត្រីអាវុធហត្ថម្នាក់ គឺបានអ្នកស្លាប់កើនដល់៤នាក់ និងរងរបួស២នាក់ ។…
ខេត្តត្បូងឃ្មុំ ៖ សេចក្តីរាយការណ៍បានបន្តឱ្យដឹងថា គិតត្រឹមម៉ោង១០យប់ថ្ងៃទី០៧ កុម្ភៈ ២០២៥ ពាក់ព័ន្ធករណីបាញ់ប្រហារទាំងគ្រួសាររបស់មន្ត្រីអាវុធហត្ថម្នាក់ គឺបានអ្នកស្លាប់កើនដល់៤នាក់ និងរងរបួស២នាក់ ។
ប្រភពឱ្យដឹងទៀតថា មុនពេលហេតុការណ៍បាញ់រះប្តីប្រពន្ធនេះ គឺពួកគេទាំង២នាក់ធ្លាប់បានលែងលះគ្នានៅឃុំ កាលពីថ្ងៃទី១០ វិច្ឆិកា ឆ្នាំ២០២៤ តែភាគីប្តី (ជនបង្ក) មិនបានព្រមផ្តិតមេដៃលែងនោះទេ ។
សូមរំលឹកថា រឿងរ៉ាវក្នុងគ្រួសារមួយរហូតឈានដល់ផ្ទុះអាវុធបាញ់ប្រហារពីសំណាក់បុរសជាប្ដី មកលើអតីតប្រពន្ធ ឪពុកក្មេក ម្ដាយក្មេក និងសមាជិកក្នុងក្រុមគ្រួសារ បណ្ដាលឱ្យស្លា.ប់ភ្លាមៗ ចំនួន០៣នាក់ និងរបួស៣នាក់ កាលពីយប់ថ្ងៃដដែល ។ ក្រោយបាញ់ប្រហាររួច បុរសជាប្ដីបានធ្វើបញ្ចប់ជីវិត ដោយយកកាំភ្លើងអាកាបាញ់សម្លា.ប់ខ្លួនតាមក្រោយ ។ ហេតុការណ៍បាញ់ប្រហារនេះ បានកើតឡើងនៅវេលាម៉ោង០៥និង៥៥នាទីល្ងាចថ្ងៃទី០៧ ខែកុម្ភៈ ឆ្នាំ២០២៥ នៅចំណុចភូមិអំពុក ឃុំក្រែក ស្រុកពញាក្រែក ។
លោកឧត្តមសេនីយ៍ទោ ចិន នី ស្នងការនគរបាលខេត្ត មានប្រសាសន៍ហើយដឹងថា បន្ទាប់ពីមានហេតុការណ៍អំពើបាញ់ប្រហារនេះរួចមកភ្លាមៗ អធិការនគរបាលស្រុកពញាក្រែក បានរាយការណ៍បន្ទាន់មករូបលោក ហើយលោកក៏បានចាត់លោកឧត្តមសេនីយ៍ត្រី ចក់ សុខកៅ ស្នងការរង ទទួលផែនព្រហ្មទណ្ឌ ចុះទៅកន្លែងកើតហេតុ ដើម្បីត្រួតពិនិត្យ និងកោសល្យវិច័យសាកសព ។
លោកឧត្តមសេនីយ៍ ស្នងការមានប្រសាសន៍បន្តឲ្យដឹងទៀតថា ករណីឃា.តកម្មបាញ់សម្លា.ប់នេះ បង្កឡើងដោយជនសង្ស័យជាប្តី មានឈ្មោះ ហ៊ីង សុវណ្ណរិទ្ធ ភេទប្រុស ជនជាតិខ្មែរ មុខរបរជាកងរាជអាវុធហត្ថ បណ្តាលអោយមានមនុស្សស្លា.ប់ និងរងរបួស សរុប ចំនួន០៦នាក់ រួមមាន ៖
១.ឈ្មោះ ឈឿង ប៊ុនធឿន ភេទប្រុស អាយុ៦៤ឆ្នាំ ជាតិខ្មែរ មុខរបរកសិករ ត្រូវជាឪពុកក្មេក (ស្លាប់កន្លែងកើតហេតុ)
២.ឈ្មោះ អោក ចាន់សាទ ភេទស្រី អាយុ៦៥ឆ្នាំ ជាតិខ្មែរ មុខរបរកសិករ ត្រូវជាម្តាយក្មេក (ស្លាប់កន្លែងកើតហេតុ)
៣.ឈ្មោះ ប៊ុន រតនា ភេទប្រុស អាយុ៣៨ឆ្នាំ ជាតិខ្មែរ ត្រូវជាបងថ្លៃ (រងរបួស)
៤.ឈ្មោះ ប៊ុន លក្ខណា ភេទស្រី អាយុ៣២ឆ្នាំ ជាតិខ្មែរ ត្រូវជាប្រពន្ធ (រងរបួស)
៥.ឈ្មោះ សេង ហន ភេទប្រុស អាយុ៥៤ឆ្នាំ ជាតិខ្មែរ អនុប្រជាការពារ (រងរបួសភ្នែកកម្រិតធ្ងន់)។ ទាំងអស់គ្នារស់នៅភូមិកើតហេតុខាងលើ ។
និង៦. ជនដៃដល់ឈ្មោះ ហ៊ីង សុវណ្ណរិទ្ធ ភេទប្រុស ជនជាតិខ្មែរ មុខរបរជាកងរាជអាវុធហត្ថ ក្រោយពីធ្វើសកម្មភាពរួច ក៏បានបាញ់សម្លា.ប់ខ្លួនឯងតាមក្រោយ ។ចំពោះអ្នករងរបួស បានយកមកសង្គ្រោះ នៅមន្ទីរពេទ្យ ។
សមត្ថកិច្ចមូលដ្ឋាន បានប្រាប់ឲ្យដឹងថា បុរសជាប្ដី ដែលលើកដៃបាញ់ប្រហារសម្លា.ប់អតីតប្រពន្ធ និងឪពុកម្ដាយក្មេកនេះ គឺជាមន្ត្រីអាវុធហត្ថនៅខេត្តក្រចេះ ។
បើតាមព័ត៌មានផ្ទៃក្នុង បានឲ្យដឹងថា គេបានឮសំឡេង ឈ្លោះប្រកែកគ្នាតាមទូរសព្ទដៃ រវាងប្រពន្ធ និងប្ដី ។ មួយរយៈចុងក្រោយនេះ បុរសជាប្ដី បានសុំជានា ជាមួយនឹងប្រពន្ធវិញ តែប្រពន្ធមិនព្រមទទួលយកធ្វើជាប្ដីវិញទេ ។
ព័ត៌មានផ្ទៃក្នុងដដែល បានឲ្យដឹងបន្តថា បុរសជាប្ដី ធ្លាប់មានប្រពន្ធ និងកូនកំលោះក្រមុំជាច្រើននាក់នៅខេត្តក្រចេះ ហើយបានយកស្ត្រីរងគ្រោះឈ្មោះ ប៊ុន លក្ខណា ធ្វើជាប្រពន្ធចុង ។ តាមដំណឹងថា ប្រពន្ធចុងរូបនេះ គឺជាស្ត្រីមេម៉ាយ មានកូនរួចទៅហើយ និងយកបុរសនេះ ធ្វើជាប្ដី បានកូនម្នាក់ទៀត។ មុនពេលហេតុការណ៍កើតឡើង បុរសជាប្ដី បានបើករថយន្ត ពណ៌ស ម៉ាក់អ៊ីស៊ុយស៊ុយ ពាក់ស្លាកលេខ ខេមរៈភូមិន្ទ ចេញពីខេត្តក្រចេះ មកដល់ផ្ទះកើតហេតុ មិនបានសួរនាំអ្វីនោះទេ គឺទាញកាំភ្លើង AK47 បាញ់ប្រហារមនុស្សទាំងកំរោល តែម្ដង ។
ករណីបាញ់ប្រហារនេះ មិនដែលកើតមានឡើងនៅក្នុងទឹកដីស្រុកពញាក្រែក នាពេលកន្លងទៅ អាចចាត់ទុកថា នេះជាលើកទីមួយ។ កម្លាំងនគរបាលបច្ចេកទេស រួមនិងក្រុមគ្រូពេទ្យ បានធ្វើកោសល្យវិច័យសាកសព រួចរាល់ ក៏បានប្រគល់ទៅឲ្យសាច់ញាតិ ដើម្បីរៀបចំធ្វើបុណ្យតាមប្រពៃណី ៕
ចែករំលែកព័តមាននេះ