ក្រុងប៉េកាំង៖ នៅក្នុងដំណើរទស្សនកិច្ចរបស់នាយករដ្ឋថៃ លោកស្រីផែថងថាន ទៅកាន់ប្រទេសចិន ថ្នាក់ដឹកនាំប្រទេសទាំង២ឯកភាពគ្នាថានឹងខិតខំពង្រឹងកិច្ចសហប្រតិបត្តិការដើម្បីបង្ក្រាបក្រុមឆបោកតាមអនឡាញ និងបទល្មើសឆ្លងដែនដទៃទៀត។ លោកស៊ីជីនពីងស្នើឱ្យប្រទេសទាំង២បន្តសហការគ្នាបង្ក្រាបរាល់បទល្មើសដែលកំពុងផ្ទុះឡើងនៅក្នុងតំបន់។
លោកស្រីផែថងថានជម្រាបជូនថ្នាក់ដឹកនាំចិនថារដ្ឋាភិបាលរបស់លោកស្រីត្រៀមខ្លួនសហការគ្នាជាមួយប្រទេសចិន និងប្រទេសជិតខាងថៃដើម្បីចាត់ការទៅលើអំពើឆបោក ល្បែងអនឡាញ និងសកម្មភាពខុសច្បាប់ដទៃទៀត។ លោកស៊ីជីនពីងអរគុណលោកស្រីផែថងថានចំពោះការចាត់វិធានការក្ដៅប្រឆាំងនឹងក្រុមម៉ាស់ផ្ចាសដែលដាក់ផែនការបោកជនជាតិចិន។
ថ្មីៗនេះ ថៃផ្ដាច់ភ្លើងអគ្គិសនីនៅទីតាំងបីកន្លែងតាមព្រំដែនថៃ-ភូមាដែលជាសម្បុកក្រុមឆបោក។ លោកស៊ីជីនពីងថ្លែងថាប្រទេសទាំង២ត្រូវតែបន្តសហការនៅក្នុងវិស័យសន្តិសុខ, ការពង្រឹងការអនុវត្តច្បាប់ និងប្រព័ន្ធយុត្តាធិការដើម្បីការពារអាយុជីវិត និងវិបុលភាពរបស់ប្រជាជន។ នៅពេលថ្នាក់ដឹកនាំទាំង២កំពុងជួបប្រជុំគ្នានៅទីក្រុងប៉េកាំងនោះ នៅឯប្រទេសថៃឯណេះវិញ អាជ្ញាធរទើបតែជួយសង្គ្រោះមនុស្ស៦១នាក់ទៀតពីមជ្ឈមណ្ឌលឆបោកតាមអនឡាញនៅប្រទេសភូមា។
នៅក្នុងចំណោមនោះ ៣៤នាក់ជាជនជាតិចិន។ ក្រៅពីនេះមានជនជាតិឥណ្ឌូណេស៊ី, អេត្យូពី និងជនជាតិដទៃទៀតនៅអាហ្វ្រិក។ នេះបើយោងតាមអ្នកនាំពាក្យក្រសួងការពារជាតិថៃ។ លោកស្រីផែថងថានថ្លែងថាប្រទេសថៃចង់ផ្ដោតសំខាន់ទៅលើការទប់ស្កាត់មិនឱ្យក្រុមឆបោកប្រើប្រាស់ទឹកដីថៃធ្វើជាមូលដ្ឋាន ឬទីសំចតរបស់ពួកគេដើម្បីបន្តបើកប្រតិបត្តិការរបស់ពួកគេនៅប្រទេសដទៃទៀត។ ថៃនឹងអនុវត្តវិធានការនេះដោយសហការជាមួយអាជ្ញាធរចិន។ ចិនជាអ្នកបោះដៃឱ្យអាជ្ញាធរថៃដើម្បីតាមប្រមាញ់ក្រុមឆបោក។ លោកស្រីសូមធានាការពារសុវត្ថិភាពជូនអ្នកទេសចរចិនដែលទៅកម្សាន្តនៅប្រទេសថៃ។
នៅក្នុងដំណើរទស្សនកិច្ចជាផ្លូវការរយៈពេល៤ថ្ងៃនេះ ប្រទេសទាំង២ក៏ត្រៀមចុះហត្ថលេខាលើអនុស្សារណៈយោគយល់គ្នាចំនួន១៤។ ក្នុងនោះក៏មានគម្រោងសាងសង់ផ្លូវរថភ្លើងល្បឿនលឿនដែលឆ្លងកាត់ពីប្រទេសចិនចូលទៅឡាវ និងថៃ។ ក្រៅពីនេះមានគម្រោងអភិវឌ្ឍនៅថៃភាគខាងត្បូង និងកិច្ចសហការនៅក្នុងវិស័យពាណិជ្ជកម្ម និងវិនិយោគ។ ប្រទេសទាំង២ក៏នឹងជជែកគ្នាអំពីការផ្ដល់សត្វខ្លាឃ្មុំផេនដាជាលក្ខណៈខ្ចីជើងដើម្បីឱ្យប្រទេសថៃយកទៅចិញ្ចឹម និងបង្កើតកូនផងដែរ។
លោកស្រីនឹងចាកចេញពីទីក្រុងប៉េកាំងនៅថ្ងៃសុក្រ រួចបន្តដំណើរទៅទីក្រុងហាប៊ីន (Harbin) ដើម្បីចូលរួមការប្រកួតកីឡាអាស៊ីហ្គេមរដូវរងា។ លោកស្រីនឹងជួបសំណេះសំណាលជាមួយអត្តពលិកជនជាតិថៃនៅទីនោះ។ ចំណុចសំខាន់មួយទៀតនោះគឺកិច្ចសហការរវាងចិន និងថៃដើម្បីប្រើប្រាស់បច្ចេកវិទ្យានុយក្លេអ៊ែរនៅក្នុងន័យសន្តិភាព។ ប្រទេសទាំង២នឹងចុះហត្ថលេខាលើអនុស្សារណៈយោគយល់គ្នានៅល្ងាចថ្ងៃព្រហស្បតិ៍៕
ចែករំលែកព័តមាននេះ