រាជធានីភ្នំពេញ ៖ បុរសពីរនាក់ បានរងរបួសធ្ងន់ នៅក្នុងគ្រោះថ្នាក់ចរាចរណ៍ដ៏រន្ធត់មួយ រវាងរថយន្តនីស្សាន់ ណាវ៉ារ៉ា មួយគ្រឿង បើកក្នុងល្បឿនលឿន ជ្រុលបុកម៉ូតូសណ្តោងរ៉ឺម៉កមួយគ្រឿង…
រាជធានីភ្នំពេញ ៖ បុរសពីរនាក់ បានរងរបួសធ្ងន់ នៅក្នុងគ្រោះថ្នាក់ចរាចរណ៍ដ៏រន្ធត់មួយ រវាងរថយន្តនីស្សាន់ ណាវ៉ារ៉ា មួយគ្រឿង បើកក្នុងល្បឿនលឿន ជ្រុលបុកម៉ូតូសណ្តោងរ៉ឺម៉កមួយគ្រឿង បើកឆ្លងផ្លូវ ពេញទំហឹង បណ្ដាលឱ្យរ៉ឺម៉កម៉ូតូដាច់កង់ចេញពីគ្នា ។
ហេតុការណ៍គ្រោះថ្នាក់នេះ បានកើតឡើងនៅវេលាម៉ោង៣និង៣០នាទីរសៀលថ្ងៃទី០៥ ខែកុម្ភៈ ២០២៥ ស្ថិតនៅតាមបណ្តោយផ្លូវជាតិលេខ៥ ក្នុងភូមិ១ សង្កាត់ច្រាំងចំរេះទី១ ខណ្ឌឬស្សីកែវ ។
តាមសាក្សី បានឱ្យដឹងថា មុនពេលកើតហេតុ គេឃើញរថយន្តម៉ាកនីស្សាន់ណាវ៉ារ៉ា ពណ៌ស ពាក់ផ្លាកលេខ ភ្នំពេញ 2BE-5552 បើកបរដោយបុរសម្នាក់ បានធ្វើដំណើរតាមបណ្តោយផ្លូវជាតិលេខ៥ ក្នុងទិសដៅពីជើងទៅត្បូង ក្នុងល្បឿនលឿន ខណៈពេល មកដល់ចំណុចកើតហេតុក៏បានបុកម៉ូតូសណ្តោងរ៉ឺម៉កមួយគ្រឿង ជិះដោយបុរស២នាក់ ធ្វើដំណើរក្នុងទិសដៅបញ្ច្រាសគ្នាហើយបត់ឆ្លងផ្លូវ ។
តាមសាក្សី ឲ្យដឹងទៀតថា ហេតុការណ៍គ្រោះថ្នាក់ចរាចរណ៍នោះ គឺបុកពេញទំហឹងចំពីមុខ បណ្ដាឲ្យរ៉ឺម៉កម៉ូតូខ្ទេច ដាច់កង់ចេញពីគ្នា ហើយបុរសពីរនាក់ ដែលជាអ្នកបើកបរ និងអ្នករួមដំណើរ បានប៉ើងចេញរងរបួសធ្ងន់ធ្ងរ ត្រូវបានប្រជាពលរដ្ឋហៅរថយន្តសង្គ្រោះ ដឹកបញ្ជូនទៅកាន់មន្ទីរពេទ្យ ។
បន្ទាប់ពីកើតមានគ្រោះថ្នាក់ អ្នកបើកបររថយន្ត ត្រូវបានប្រជាពលរដ្ឋ ឃាត់ប្រគល់ឱ្យសមត្ថកិច្ចនគរបាលប៉ុស្តិ៍ ។ រថយន្ត និងអ្នកបើកបរព្រមទាំងរ៉ឺម៉កម៉ូតូ ត្រូវបាននគរបាលចរាចរណ៍ ចុះទៅវាស់វែង បញ្ជូនទៅកាន់ការិយាល័យចរាចរណ៍ផ្លូវគោក ដើម្បីដោះស្រាយ ៕
ចែករំលែកព័តមាននេះ