សម្តេចបវរធិបតី ចាត់ទុកភាពជោគជ័យក្រុមហ៊ុន NCX ជាគំរូមួយ ដែលវិស័យឯកជនបានចូលរួមចំណែកសំខាន់ជាមួយរដ្ឋាភិបាល
រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានលើកឡើងថា ភាពជោគជ័យរបស់ក្រុមហ៊ុន NCX…
រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានលើកឡើងថា ភាពជោគជ័យរបស់ក្រុមហ៊ុន NCX គឺជាគំរូមួយ ដែលវិស័យឯកជន បានចូលរួមចំណែកយ៉ាងសំខាន់ជាមួយរាជរដ្ឋាភិបាល ក្នុងការជំរុញកំណើនសេដ្ឋកិច្ច និងបង្កើតការងារជំនាញជូនប្រជាពលរដ្ឋខ្មែរ ។
តាមរយៈបណ្ដាញសង្គម នៅថ្ងៃទី៥ ខែកុម្ភៈ ឆ្នាំ២០២៥ សម្តេចបវរធិបតី ហ៊ុន ម៉ាណែត បានឱ្យដឹងថា ការជំរុញកំណើនសេដ្ឋកិច្ច និងបង្កើតការងារជូនប្រជាពលរដ្ឋជាអាទិភាពចម្បងរបស់រាជរដ្ឋាភិបាល ។
សម្តេចបវរធិបតី បន្ដថា ផលិតកម្ម គឺជាមធ្យោបាយមួយ ដើម្បីសម្រេចបានគោលដៅទាំងនេះ ដែលក្នុងនោះ ការពង្រឹង និងលើកស្ទួយវិស័យឧស្សាហកម្ម និងកម្មន្តសាល គឺជាគោលនយោបាយដ៏សំខាន់របស់រាជរដ្ឋាភិបាល ។
ជាមួយគ្នានោះដែរ សម្តេចបវរធិបតី ក៏បានអបអរសាទរ ចំពោះការរីកលូតលាស់របស់ក្រុមហ៊ុន NCX ដែលក្នុងរយៈពេល២៦ឆ្នាំនេះ បានប្រែក្លាយពីក្រុមហ៊ុន ដែលនៅឆ្នាំ១៩៩៩ មានបុគ្គលិក ៧៤នាក់ និងមានសមត្ថភាពត្រឹមតែនាំចូលគ្រឿងបង្គំ គ្រប់មុខពីក្រៅប្រទេស មកផ្គុំនិងដំឡើងម៉ូតូ Honda លក់ក្នុងទីផ្សារកម្ពុជា ទៅជាក្រុមហ៊ុនមួយ ដែលបច្ចុប្បនមានបុគ្គលិកជំនាញជាង ១,២២០នាក់ និងមានសមត្ថភាព ផលិតគ្រឿងបង្គំច្រើនមុខ និងដំឡើងម៉ូតូលក់នៅទីផ្សារកម្ពុជា និងនាំគ្រឿងបង្គំម៉ូតូមួយចំនួន ទៅលក់នៅក្រៅប្រទេស ផងដែរ។
សម្តេចបវរធិបតី នាយករដ្ឋមន្ដ្រី បានគូបញ្ជាក់ថា «ភាពជោគជ័យរបស់ក្រុមហ៊ុន គឺជាគំរូមួយ ដែលវិស័យឯកជនបានចូលរួមចំណែកយ៉ាងសំខាន់ជាមួយរាជរដ្ឋាភិបាល ក្នុងការជំរុញកំណើនសេដ្ឋកិច្ច និងបង្កើតការងារជំនាញជូនប្រជាពលរដ្ឋខ្មែរ ក៏ដូចជាលើកកម្ពស់ភាពម្ចាស់ការរបស់កម្ពុជា ក្នុងការផលិតដោយខ្លួនឯង នូវផលិតផល ដើម្បីផ្គត់ផ្គង់ទីផ្សារក្នុងស្រុក» ៕
ចែករំលែកព័តមាននេះ