ខេត្តបាត់ដំបង ៖ យោងតាមសេចក្ដីរាយការណ៍បានឲ្យដឹងថា លំនៅឋានរបស់ប្រជាកសិករម្នាក់នៅឆ្ងាយដាច់សង្វែងត្រូវបានអគ្គិភ័យលេបត្របាក់អស់គ្មានសល់ កាលពីវេលាម៉ោង១១និង៥០នាទីថ្ងៃត្រង់ ថ្ងៃទី០៥ កុម្ភៈ នៅចំណុចអូរតាតឹងលើ ស្ថិតក្នុងភូមិស្រែអណ្ដូង ឃុំសំឡូត…
ខេត្តបាត់ដំបង ៖ យោងតាមសេចក្ដីរាយការណ៍បានឲ្យដឹងថា លំនៅឋានរបស់ប្រជាកសិករម្នាក់នៅឆ្ងាយដាច់សង្វែងត្រូវបានអគ្គិភ័យលេបត្របាក់អស់គ្មានសល់ កាលពីវេលាម៉ោង១១និង៥០នាទីថ្ងៃត្រង់ ថ្ងៃទី០៥ កុម្ភៈ នៅចំណុចអូរតាតឹងលើ ស្ថិតក្នុងភូមិស្រែអណ្ដូង ឃុំសំឡូត ស្រុកសំឡូត នៅពេលម្ចាស់ផ្ទះបិទទ្វារទុកចោល ហើយទៅផ្សារបាត់ ។
របាយការណ៍សមត្ថកិច្ចបានឲ្យដឹងថា លំនៅឋាននោះធ្វើពីឈើ ប្រក់ស័ង្កសី មានទំហំ៥ម៉x៧ម៉ (ផ្ទះតៀម) ម្ចាស់ឈ្មោះ ជ័យ រ៉េន ភេទស្រី អាយុ៤០ឆ្នាំ ជាប្រជាកសិកររស់នៅដាច់សង្វែងពីទីប្រជុំជន។ របាយការណ៍បានបញ្ជាក់ថា ពេលមានអគ្គិភ័យកើតឡើង ម្ចាស់ផ្ទះមិនបាននៅទេ គឺចាក់សោទ្វារ រួចចេញទៅផ្សារបាត់ ។
បើតាមសាក្សីនានាដែលបានដឹងរឿងនេះបានបំភ្លឺថា មុនពេលមានអគ្គិភ័យនេះកើតឡើង គេឮសម្លេងផ្ទុះ លុះបន្តិចក្រោយមក ស្រាប់តែមានផ្សែងហុយលាយឡំនឹងអណ្ដាតភ្លើងយ៉ាងសន្ធោសន្ធៅភ្លាមរំពេច ដោយពុំមាននរណាជួយអន្តរាគមន៍បានទាន់ពេលឡើយ ព្រោះផ្ទះជនរងគ្រោះនៅឆ្ងាយដាច់ពីគេឯងពេក ។
មន្ត្រីមូលដ្ឋានបានប្រាប់ថា នៅតំបន់នោះគ្មានទឹកសម្រាប់ប្រើប្រាស់ជួយពន្លត់ ហើយរថយន្តពន្លត់អគ្គិភ័យរបស់សមត្ថកិច្ចក៏ពិបាកចូល និងនៅឆ្ងាយទៅមិនទាន់ ។ ដូច្នេះហើយទើបគេមិនអាចជួយរំដោះទ្រព្យសម្បត្តិ ឬសម្ភារប្រើប្រាស់ផ្សេងៗនៅក្នងផ្ទះនោះបាន ។
នៅក្នុងរបាយការណ៍សមត្ថកិច្ចដែលបានស្រង់សម្ដីជនរងគ្រោះបានឲ្យដឹងថា ក្រៅពីបាត់បង់ផ្ទះមួយខ្នង ទ្រព្យសម្បត្តិ និងសម្ភារប្រើប្រាស់ទាំងអស់នៅក្នងផ្ទះ ក៏ត្រូវហិនហោចដែរ ។ ដូចជា ម៉ាស៊ីនកាត់ស្មៅ ម៉ាស៊ីនអារឈើ ម៉ាស៊ីនបាញ់ថ្នាំ ពូជដំណាំកសិកម្ម រួមទាំងទ្រព្យសម្បត្តិដទៃទៀត។ ពោល គឺខូចខាតទាំងស្រុងតែម្ដង ។
ពាក់ព័ន្ធនឹងអគ្គភ័យនេះ បើតាមសមត្ថកិច្ចដែលបានចម្លើយបឋមពីសាក្សីនានា បានធ្វើការសន្និដ្ឋានជំហានដំបូងថា អគ្គិភ័យនេះ អាចបណ្ដាលមកពីការផ្ទុះអាគុយសូឡា ពីព្រោះនៅក្នុងផ្ទះនេះ មិនមានប្រើប្រាស់ភ្លើងអគ្គិសនីទេ ហើយក៏ពុំមានភ្លើងទៀន ធូប ឬ ភ្លើងចង្ក្រានដុតទុកចោលដែរ ។ នេះបើតាមការបំភ្លឺច្បាស់លាស់ពីម្ចាស់ផ្ទះ។
ប៉ុន្តែយ៉ាងណា គេមិនទាន់បានវាយតំលៃសរុបពីតុល្យការនៃការខូចខាតនៅឡើយទេ។ សូមបញ្ជាក់ថា កាលពីវេលាម៉ោង៩ និង៣០នាទីយប់ថ្ងៃទី ០៤ កុម្ភៈ ក៏មានអគ្គិភ័យកើតឡើង បង្កឲ្យមានការភ្ញាក់ផ្អើលមួយលើកដែរនៅលើកំពូល«ភ្នំក្ដោង» ស្ថិតនៅប៉ែកខាងត្បូង នៃជួរ«ភ្នំសំពៅ» ក្នុងឃុំភ្នំសំពៅ ស្រុកបាណន់ ។ គេមិនបាននិយាយពីដើមចម ដែលនាំឲ្យមានអគ្គីភ័យឆេះកំពូល«ភ្នំក្ដោង»នេះទេ។ ប៉ុន្តែមានប្រភពខ្លះអះអាងថា បង្កឡើងដោយភ្លើងព្រៃ ដែលជាស្នាដៃជនមិនស្គាល់មុខ ។
មន្ត្រីមូលដ្ឋានបាននិយាយថា កម្លាំងសមត្ថកិច្ច រួមជាមួយកម្លាំងប្រជាការពារច្រើននាក់ផង បានសម្រុកចូលពន្លត់ភ្លើងឆេះ «ភ្នំក្ដោង»នេះ ខណៈដែលរថយន្តពន្លត់អគ្គិភ័យរបស់សមត្ថកិច្ច ដែលបានចុះទៅដល់ហើយ តែមិនអាចបើកឡើងភ្នំជួយបាញ់ទឹកពន្លត់ភ្លើងបាន ។
ប្រភពដដែលបានបញ្ជាក់ថា ភ្លើងព្រៃឆេះកំពូលភ្នំនេះ ត្រូវបានកម្លាំងចម្រុះជាង៣០នាក់ ឡើងវាយពន្លត់ ដែលត្រូវចំណាយជាច្រើនម៉ោងទើបអស់ភ្លើងពីលើកំពូលភ្នំ តែមិនបង្កឲ្យមានគ្រោះថ្នាក់ដល់មនុស្ស ឬផ្ទះសម្បែងប្រជាពលរដ្ឋ ដែលនៅក្បែរៗជើងភ្នំនោះទេ៕
ចែករំលែកព័តមាននេះ