ទីក្រុងវ៉ាស៊ីនតោន៖ បន្ទាប់ពីអាមេរិកប្រើធម៌ក្ដៅដោយដំឡើងពន្ធ២៥%រួចមក ម៉ិកស៊ីកូចាប់ផ្ដើមត្រង់កន្ទុយភ្លឹង និងចាប់ផ្ដើមខំប្រឹងធ្វើទៅតាមការទាមទាររបស់លោកត្រាំនៅក្នុងសម័យអន្តរកាល។ លោកត្រាំទុកពេល៣០ថ្ងៃឱ្យម៉ិកស៊ីកូកែខ្លួន។ បើមិនដូច្នេះទេពន្ធ២៥%ដែលកំពុងព្យួរទុកនោះនឹងចាប់ផ្ដើមអនុវត្តដោយគ្មានការយោគយល់តទៅទៀតទេ។
ថ្ងៃនេះ គេឃើញថារដ្ឋាភិបាលម៉ិកស៊ីកូប្រកាសប្រើកម្លាំងយោធាមួយម៉ឺននាក់ដាក់ពង្រាយនៅតាមច្រកព្រំដែនសំខាន់ៗរវាងអាមេរិក និងម៉ិកស៊ីកូដែលមានជនអន្តោប្រវេសន៍ខុសច្បាប់ និងគ្រឿងញៀនហូរចូលច្រើន។ នៅក្នុងដំណាក់កាលទីមួយ ម៉ិកស៊ីកូដឹកទាហានជាច្រើនរយនាក់ទៅដាក់ពង្រាយនៅទីតាំងក្ដៅៗជាច្រើនកន្លែង។ ក្នុងនោះមានច្រកបាចា (Baja) នៅព្រំដែនប្រទល់រដ្ឋកាលីហ្វ័រញ៉ា, និងរដ្ឋសូណូរ៉ា (Sonora) និងថាម៉ូលីប៉ាស់របស់ម៉ិកស៊ីកូ (Tamaulipas)។
ផែនការដាក់ពង្រាយកម្លាំងទ័ពមួយម៉ឺននាក់នេះជាវិធានការដ៏ក្ដៅគគុក និងជាផ្នែក១នៃកិច្ចព្រមព្រៀងរវាងវ៉ាស៊ីនតោន និងម៉ិកស៊ីកូនៅនាទីចុងក្រោយនៅពេលប្រទេសទាំង២ចរចាគ្នាទាំងប្រញាប់ប្រញាល់ដើម្បីព្យួរទុកការដំឡើងពន្ធ។ ម៉ិកស៊ីកូមិនអាចលេងសើចបានទេព្រោះការដំឡើងពន្ធនេះនឹងប៉ះពាល់យ៉ាងធ្ងន់ធ្ងរចំពោះសេដ្ឋកិច្ចជាតិរបស់ប្រទេសនេះក្នុងនាមជាប្រទេសនាំទំនិញទៅលក់នៅអាមេរិកច្រើនជាងគេលើពិភពលោកនៅក្នុងទំហំទឹកប្រាក់៤៧៥ពាន់លានដុល្លារកាលពីឆ្នាំ២០២៣។
ទោះបីម៉ិកស៊ីកូប្រកាសថាខ្លួននឹងចាត់វិធានការវាយបកទៅលើការដំឡើងពន្ធនោះ ប៉ុន្តែខ្លួនសុខចិត្តជ្រើសរើសយកការចរចាគ្នាជាមុនសិន។ យោងតាមកិច្ចព្រមព្រៀងនោះ អាមេរិកក៏បានសន្យាថាខ្លួននឹងខិតខំទប់ស្កាត់ការហូរចូលនៃអាវុធជាតិផ្ទុះតាមច្រកព្រំដែនចូលម៉ិកស៊ីកូ។ នេះបើយោងតាមការបញ្ជាក់ពីប្រធានាធិបតីម៉ិកស៊ីកូ លោកស្រីសេនបូម (Sheinbaum)។
អ្នកវិភាគយល់ថាម៉ិកស៊ីកពិបាករើខ្លួនរួចពីការគាបសង្កត់របស់អាមេរិកដោយសារកត្តាភូមិសាស្ត្រនៅកៀកនឹងប្រទេសអាមេរិក, ដោយសារឥទ្ធិពលនយោបាយ និងដោយសារកត្តាសេដ្ឋកិច្ច។ អ្នកសិក្សាស្រាវជ្រាវនៅម៉ិកស៊ីកូយល់ថាមេដឹកនាំម៉ិកស៊ីកូមិនអាចធ្វើអ្វីផ្សេងក្រៅពីសម្របសម្រួលតាមការទាមទាររបស់លោកត្រាំទេ។ «លោកស្រីប្រៀបបាននឹងជិះនៅលើខ្នងខ្លា ឬត្រូវលោកត្រាំយកកាំភ្លើងភ្ជង់ក្បាលជាប់ទៅហើយ។ ឧបមាថាម៉ិកស៊ីកូហ៊ានធ្វើខ្លាំងដាក់អាមេរិកប្រាកដជាសេដ្ឋកិច្ចប្រទេសនេះនឹងធ្លាក់ចុះដុនដាបមួយរំពេច»៕
ចែករំលែកព័តមាននេះ