បរទេស ៖ រាប់រយឆ្នាំមកហើយ កម្ពុជាតែងតែប្រារព្ធព្រះរាជពិធីច្រត់ព្រះនង្គ័លរៀងរាល់ថ្ងៃ៤រោច ខែពិសាខ ដែលឆ្នាំនេះ ត្រូវនឹងថ្ងៃព្រហស្បតិ៍ ទី១៥ ខែឧសភា ឆ្នាំ២០២៥…
បរទេស ៖ រាប់រយឆ្នាំមកហើយ កម្ពុជាតែងតែប្រារព្ធព្រះរាជពិធីច្រត់ព្រះនង្គ័លរៀងរាល់ថ្ងៃ៤រោច ខែពិសាខ ដែលឆ្នាំនេះ ត្រូវនឹងថ្ងៃព្រហស្បតិ៍ ទី១៥ ខែឧសភា ឆ្នាំ២០២៥ ខណៈប្រទេសថៃ ក៏បានចាប់ផ្តើមធ្វើពិធីនេះដូចគ្នា នាប៉ុន្មានឆ្នាំចុងក្រោយនេះ គ្រាន់តែរៀបចំមុនកម្ពុជាជាងកន្លះខែ ប៉ុន្តែបើយើងក្រឡេកទៅមើលប្រទេសជិតខាងកម្ពុជាមួយទៀត ពោលគឺប្រទេសវៀតណាម ក៏តែងតែប្រារព្ធពិធីស្រដៀងគ្នានិងកម្ពុជាថៃដែរ ដោយពិធីមួយនេះមានឈ្មោះជាភាសាវៀតណាមថា បុណ្យ Tich Dien ឬ «ស្តេចច្រត់ព្រះនង្គ័ល»ដែលធ្វើឡើងរៀងរាល់ដើមឆ្នាំថ្មី ពោលគឺចំថ្ងៃទី៧នៃបុណ្យចូលឆ្នាំថ្មីប្រពៃណីវៀតណាម ដើម្បីបួងសួងសុំអោយអាកាសធាតុអំណោយផល និងផលដំណាំដ៏ច្រើនសន្ធឹកសន្ធាប់។
សារព័ត៌មាន VN Express បានផ្សាយថា នាព្រឹកថ្ងៃទី៤ ខែកុម្ភៈ នៅវាលស្រែភូមិ Doi Tin ឃុំ Tien Son គណៈកម្មាធិការប្រជាជនខេត្ត Ha Nam និងទីក្រុង Duy Tien បានរៀបចំពិធីបុណ្យ Tich Dien ឆ្នាំ២០២៥ ប្រកបដោយភាពទាក់ទាញ និងមានការចូលរួមពីប្រជាជន និងភ្ញៀវទេសចររាប់ពាន់នាក់មកពីគ្រប់ទិសទីទូទាំងប្រទេស ។ ពិធីបុណ្យ Tich Dien គឺជាអត្តសញ្ញាវប្បធម៌ដ៏ពិសេសរបស់អ្នកភូមិDoi Son និងខេត្ត Ha Nam ទាំងមូល ហើយពិធីបុណ្យប្រពៃណីមួយនេះត្រូវបានគេចាប់ផ្តើមប្រារព្ធឡើងវិញតាំងពីឆ្នាំ២០០៩ រហូតដល់បច្ចុប្បន្ន។
ឆ្នាំនេះ លោកតា ង្វៀន ង៉ុកអាន អាយុ ៧៥ឆ្នាំ ដែលជាចាស់ព្រឹទ្ធាចារ្យប្រចាំនៅភូមិLinh Trung បានដើរតួរជាស្តេច Le Dai Hanh ដោយពាក់របាំងមុខ និងអាវផាយ។ នេះជាលើកទី៦ ដែលលោកតារូបនេះ បានដើរតួជាស្តេចសម្រាប់ពិធីបុណ្យ Tich Dien ដើម្បីកាន់នង្គ័លទឹមក្របីភ្ជួររាស់ដី បើករដូវដាំដុះថ្មី។ ព្រឹទ្ធាចារ្យ ដែលត្រូវបានគេជ្រើសរើសឲ្យដើរតួជាស្តេច ដាច់ខាតត្រូវជាកសិករវ័យចំណាស់ ដែលជាមនុស្សមានគុណធម៌ សុខភាពល្អ មាននិងបទពិសោធន៍ក្នុងការភ្ជួរស្រែ។ ក្រោយពីតួអង្គស្តេចភ្ជួរស្រែចំនួនបី គេឃើញយុវជនប្រុសស្ត្រីបាននាំគ្នាសាបព្រោះគ្រាប់ពូជដំណាំជាច្រើនប្រភេទ ដូចជា ស្រូវ ពោត សណ្តែកជាដើម។
ពីមួយឆ្នាំទៅមួយឆ្នាំពិធីបុណ្យ Tich Dien ដែលពិធីប្រចាំឆ្នាំរបស់ខេត្ត Ha Nam បានក្លាយទៅជាព្រឹត្តការណ៍វប្បធម៌ប្រពៃណីដ៏ស្រស់បំព្រង និងទាក់ទាញប្រចាំសហគមន៍ ដោយបង្ហាញពីភាពសម្បូរសម្រាប់របស់កសិករ លើកស្ទួយវិស័យកសិកម្ម សម្តែងការដឹងគុណចំពោះបុព្វការីជន និងសាម្គីភាពរបស់ប្រជាជន។ តាមរយៈពិធីបុណ្យនេះដែរ បានរៀបចំការប្រលងគូរគំនូរលើពោះក្របីថ្នាក់ជាតិ រួមទាំងសកម្មភាពជាច្រើនទៀតដូចជា៖ ការវេចនំអន្សមប្រពៃណី ការប្រកួតវាយកូនបាល់ ការប្រកួតភ្ជួរស្រែ ប្រកួតចំបាប់ សកម្មភាពវប្បធម៌និងកម្សាន្តជាច្រើនទៀត ដែលបង្កើតបរិយាកាសរីករាយ និងស្នាមញញឹម។
យោងតាមសៀវភៅប្រវត្តិសាស្ត្រ ពិធីបុណ្យ Tich Dien មានប្រភពចេញពីរជ្ជកាលស្តេច Le Dai Hanh ជាស្តេចមួយអង្គផ្តោតសំខាន់លើវិស័យកសិកម្ម និងយកចិត្តទុកដាក់លើសុខទុក្ខប្រជារាស្ត្រ។ តាមការដំណាល ក្នុងនិទាឃរដូវឆ្នាំ៩៨៧ ស្តេច Le Dai Hanh និងជនជាតិចិន បានភ្ជួររាស់ស្រែនៅភូមិ Doi Son ហើយបានរកឃើញផើងមាសមួយ។ មួយឆ្នាំក្រោយមក ស្តេចរូបនេះ បានភ្ជួរស្រែនៅភូមិ Ban Hai ហើយបានរកឃើញផើងប្រាក់ ហើយចាប់តាំងពីពេលនោះមក ពិធីបុណ្យ Tich Dien តែងតែត្រូវបានប្រារព្ធធ្វើដោយស្ដេចក្រោយៗមកជាច្រើនជំនាន់៕
ចែករំលែកព័តមាននេះ