ទីក្រុងប៉េកាំង ៖ ប្រទេសចិនបានអំពាវនាវឱ្យសហរដ្ឋអាមេរិកលុបចោលការដំឡើងពន្ធលើទំនិញរបស់ខ្លួន ដើម្បីជាសញ្ញាបង្ហាញថា លោកប្រធានាធិបតីអាមេរិក ដូណាល់ ត្រាំ (Donald Trump) ពិតជាមានការយកចិត្តទុកដាក់ខ្លាំងចំពោះការដោះស្រាយសង្គ្រាមពាណិជ្ជកម្មរវាងប្រទេសយក្សសេដ្ឋកិច្ចទាំងពីរ។…
ទីក្រុងប៉េកាំង ៖ ប្រទេសចិនបានអំពាវនាវឱ្យសហរដ្ឋអាមេរិកលុបចោលការដំឡើងពន្ធលើទំនិញរបស់ខ្លួន ដើម្បីជាសញ្ញាបង្ហាញថា លោកប្រធានាធិបតីអាមេរិក ដូណាល់ ត្រាំ (Donald Trump) ពិតជាមានការយកចិត្តទុកដាក់ខ្លាំងចំពោះការដោះស្រាយសង្គ្រាមពាណិជ្ជកម្មរវាងប្រទេសយក្សសេដ្ឋកិច្ចទាំងពីរ។ នេះបើយោងតាមប្រភពពីសារព័ត៌មាន BBC បានចេញផ្សាយ។
អ្នកនាំពាក្យក្រសួងបរទេស និងក្រសួងពាណិជ្ជកម្មចិន កាលពីថ្ងៃទី២៤ ខែមេសា ឆ្នាំ២០២៥ បានថ្លែងចំពោះមុខបណ្តាអ្នកសារព័ត៌មានថា រហូតមកទល់ពេលនេះ មិនមានកិច្ចចរចាពាណិជ្ជកម្មណាមួយជាមួយសហរដ្ឋអាមេរិកកើតឡើងនោះទេ បើទោះបីជាមានការផ្ដល់សញ្ញាបន្ធូរបន្ថយសង្គ្រាមពាណិជ្ជកម្មពីរដ្ឋបាលលោក ត្រាំ យ៉ាងណាក៏ដោយ។
សង្គ្រាមពាណិជ្ជកម្មរវាងប្រទេសសេដ្ឋកិច្ចធំបំផុតទាំងពីររបស់ពិភពលោកបាននឹងកំពុងកើនឡើងប្រៀបដូចភ្នំភ្លើងរង់ចាំតែពេលផ្ទុះទៅហើយ ប៉ុន្តែកាលពីពេលថ្មីៗនេះ ស្រាប់លោក ត្រាំ ហាក់បន្ទន់ជំហររបស់លោកចំពោះចិន ដោយបង្ហើបថា ពន្ធដែលលោកបានដាក់លើការនាំចូលទំនិញរបស់ចិននឹងត្រូវកាត់បន្ថយច្រើន ប៉ុន្តែមិនធ្លាក់ដល់អត្រាសូន្យឡើយ។ សង្គ្រាមពាណិជ្ជកម្មរវាងចិន និងសហរដ្ឋអាមេរិកកំពុងស្ថិតក្នុងសភាពធ្ងន់ធ្ងរ ដោយលោក ត្រាំ បានដាក់ពន្ធនាំចូលរហូតដល់ ១៤៥% លើទំនិញចិន ហើយជាការឆ្លើយតបទីក្រុងប៉េកាំងបានវាយបកវិញជាមួយនឹងពន្ធសងសឹក ១២៥% លើទំនិញនាំចូលពីអាមេរិក។
នៅក្នុងសេចក្តីថ្លែងការណ៍ដ៏រឹងមាំបំផុតមួយរបស់ចិន កាលពីថ្ងៃទី២៤ ខែមេសា កន្លងទៅ អ្នកនាំពាក្យក្រសួងពាណិជ្ជកម្ម លោក He Yadong បានថ្លែងថា សហរដ្ឋអាមេរិកគួរតែដកចេញនូវវិធានការពន្ធឯកតោភាគីទាំងអស់ប្រឆាំងនឹងប្រទេសចិនជាមុនសិន ប្រសិនបើពួកគេពិតជាចង់ដោះស្រាយបញ្ហា។ លោកបានបន្ថែមថា «អ្នកដែលចងកណ្ដឹងត្រូវតែស្រាយវាដោយខ្លួនឯង»។
ដោយឡែក អ្នកនាំពាក្យក្រសួងការបរទេស លោក Guo Jiakun ក៏បានគូសបញ្ជាក់ផងដែរថា ប្រទេសចិន និងសហរដ្ឋអាមេរិកមិនបានធ្វើការពិភាក្សា ឬចរចាណាមួយលើបញ្ហាពន្ធគយនោះទេ ដោយលោកបានបន្ថែមថា រាល់របាយការណ៍ណាមួយដែលអះអាងអំពីដំណើរការចរចារវាងប្រទេសទាំងពីរ គឺជារឿងមិនពិត។
កាលពីមុន លោក ត្រាំ បានលើកឡើងថា ការចរចាររវាងប្រទេសទាំងពីរគឺលេចរូបរាង ហើយ ប៉ុន្តែត្រូវបានបដិសេធដោយរដ្ឋមន្ត្រីក្រសួងរតនាគារអាមេរិក លោក Scott Bessent ដែលបានឱ្យដឹងកាលពីថ្ងៃទី២៣ ខែមេសាថា ពួកគេមិនទាន់បានចាប់ផ្តើមការចរចាជាមួយចិននៅឡើយទេ៕
ចែករំលែកព័តមាននេះ