រាជធានី​ភ្នំពេញ ៖ មនុស្សចំនួន៥នាក់បានស្លាប់បាត់បង់ជីវិតយ៉ាងអាណោចអធ័ម នៅក្នុងភ្នក់ភ្លើង និង៥នាក់ទៀតបានរងរបួសធ្ងន់ធ្ងរ នៅក្នុងគ្រោះអគ្គិភ័យឆេះក្លិបកំសាន្តរាត្រីមួយកន្លែងយីហោ«មីតណាយព្រីមៀរក្លិប» យ៉ាងសន្ធោសន្ធៅ ហើយអ្នករងរបួសកំពុងត្រូវបានគ្រូពេទ្យសង្រ្គោះបន្ទាន់ នៅមន្ទីពេទ្យ ។

ក្លិបកំសាន្តខាងលើនេះមានទីតាំងស្ថិតនៅតាមផ្លូវ៥០ម៉ែត្រជិតស្តុបឫស្សីផ្អែម ក្នុងភូមិប្រកា សង្កាត់ព្រៃស ខណ្ឌដង្កោ រាជាធានីភ្នំពេញ ហើយបានបង្កឲ្យមានការភ្ញាក់ផ្អើលនៅវេលាម៉ោង១០និង៤០នាទីព្រឹកថ្ងៃទី០៥ ខែកុម្ភៈ ឆ្នាំ២០២៥ ។ ក្នុងនោះលោកឃួង ស្រេង អភិបាលរាជធានីភ្នំពេញ ក៏បានដឹកនាំក្រុមការងារចុះទៅកាន់កន្លែងកើតហេតុពិនិត្យមើលស្ថានការណ៍ជាក់ស្ដែងដោយផ្ទាល់ផងដែរ ។

សមត្ថកិច្ចបានប្រាប់ឲ្យដឹងថា ក្លិបកំសាន្ត «មីតណាយព្រីមៀរក្លិប» នេះបើកដំណើរការតែពេលយប់ទេ ចំណែលពេលថ្ងៃមិនបានបើកទទួលភ្ញៀវនោះទេ ប៉ុន្តែពេលថ្ងៃមានបុគ្គលិកច្រើននាក់ ក្នុងនោះមានជនរងគ្រោះទាំង១០នាក់ខាងលើសម្រាកនៅក្នុងនោះ ។ ជនរងគ្រោះដែលស្លាប់និងរងរបួសនោះមិនទាន់ត្រូវបានស្គាល់អត្តសញ្ញាណនៅឡើយទេ អ្នកស្លាប់ត្រូវបានភ្លើងឆេះខ្លោច ហើយរបួសក៏ត្រូវភ្លើងឆេះរលេះរលួយផងដែរ ជារៀងរាល់ថ្ងៃអ្នកទាំងនោះសុទ្ធតែធ្វើការពេលយប់និងដេកនៅពេលថ្ងៃ ។

សមត្ថកិច្ចបានប្រាប់ឲ្យដឹងបន្តទៀតថា ដោយឡែកនៅវេលាព្រឹកថ្ងៃកើតហេតុ ខណៈដែលជនរងគ្រោះខាងលើកំពុងដេកលង់លក់នៅក្នុងបន្ទប់ផ្នែកខាងក្រោយនក្លិប ស្រាប់តែមានភ្លើងឆាបឆេះយ៉ាងសន្ធោសន្ធៅ នៅផ្នែកខាងមុខ ហើយដោយនៅក្នុងក្លិបសម្បូរទៅដោយគ្រឿងជ័រផងនោះបានធ្វើឲ្យភ្លើងឆេះលឿនណាស់ ។ ខណៈនោះបណ្ដាលឲ្យបាក់ដំបូលក្លិប បិទជិតច្រកចេញ ទើបធ្វើឲ្យក្រុមជនរងគ្រោះរកច្រកចេញអត់ឃើញក៏ស្លាប់និងរងបួសធ្ងន់​ច្រើន​នាក់នៅក្នុងភ្នក់ភ្លើង ដោយក្នុងនោះ៣នាក់ត្រូវបានរកឃើញស្លាប់នៅនឹងកន្លែង និង៧នាក់បញ្ជូនទៅសង្រ្គោះនៅមន្ទីរពេទ្យព្រះកុសុមៈ មន្ទីរពេទ្យកាល់ម៉ែត និងមន្ទីរពេទ្យរស្ស៊ី ប៉ុន្តែក្រោយមកបានស្លាប់២នៅមន្ទីរពេទ្យ២នាក់ទៀតជាបន្តបន្ទាប់ ។

សមត្ថកិច្ចខាងលើបានបញ្ជាក់ប្រាប់ឲ្យដឹងបន្ថែមទៀតថា នៅក្នុងពេលនោះអគារក្លិបទាំងមូលគ្របដណ្ដប់ទៅដោយអណ្ដាតភ្លើងសន្ធោសន្ធៅ និងផ្សែងឃ្មួលខ្មាញ់ ហើយពុំទាន់ដឹងថា បណ្ដាលមកពីមូលហេតុអ្វីនៅឡើយទេ ដោយមានការអះអាងមិនច្បាស់លាស់ខុសៗគ្នា ។ ក្នុងនោះអ្នកខ្លះសង្ស័យបណ្ដាលមកពីជាងផ្សាដែកធ្លាក់កម្ទេចផ្កាភ្លើង រីឯអ្នកខ្លះសង្ស័យឆ្លងចរន្តអគ្គិសនី ប៉ុន្តែការសង្ស័យនោះមិនអាចយកជាការបាននៅឡើយទេ ខណៈមន្រ្តីជំនាញកំពុងធ្វើការស្រាវជ្រាវស៊ើបអង្កេតរកមូលហេតុនេះហើយ យ៉ាងណាៗនិងដឹងនៅពេលក្រោយ ។

ប្រភពដដែលបានឲ្យដឹងបន្តទៀតថា ប្រសិនបើអគ្គិភ័យនេះកើតឡើងពេលយប់ក្នុងពេលដែលមនុស្សកំពុងចូលទៅកំសាន្តច្រើនវិញ អាចនិងមានអ្នកស្លាប់និងរងរបួសមិនតិចឡើយ ប៉ុន្តែនេះឆេះពេលថ្ងៃ ដែលបណ្ដាលឲ្យស្លាប់និងរងរបួសតែបុគ្គលិកធ្វើការទីនោះប៉ុណ្ណោះ ។

ក្រោយពេលមានអគ្គិឆាបឆេះភ្លាមៗកម្លាំងអាជ្ញាធរនិងសមត្ថកិច្ចមូលដ្ឋានបានចុះទៅអន្តរាគមន៍ ហើយក៏មានរថយន្តពន្លត់អគ្គិភ័យច្រើនគ្រឿង និងកម្លាំងអ្នកពន្លត់អគ្គិភ័យច្រើននាក់បានទៅពន្លត់ភ្លើង ហើយបានប្រើប្រាស់ទឹកអស់ជាច្រើនរថយន្ត និងរហូតដល់វេលាម៉ោង ១១និង៤៦នាទី រសៀលថ្ងៃខែឆ្នាំដដែលទើបរលត់ទៅវិញទាំងស្រុង ៕