ប្រទេសប្រេស៊ីល ៖ កីឡាករបាល់ទាត់ឆ្នើមប្រេស៊ីល Neymar បានត្រលប់ទៅចូលរួមជាមួយក្លិប Santos ដែលជាក្លិបអាជីពដំបូងបំផុតរបស់ខ្លួនវិញ បន្ទាប់ពីចាកចេញអស់ពេល១២ឆ្នាំ ស្របពេលក្លិបដ៏ល្បីនៅប្រេស៊ីលមួយនេះ រៀបចំពិធីស្វាគមន៍ដ៏ធំសម្រាប់កីឡាករដ៏ឆ្នើមរបស់ខ្លួន ក្រោមក្រសែភ្នែកអ្នកគាំទ្ររាប់ម៉ឺននាក់ នៅឯកីឡដ្ឋាន Vila Belmiro កាលពីថ្ងៃទី១ ខែកុម្ភៈ ឆ្នាំ២០២៥។

អតីតខ្សែប្រយុទ្ធឆ្នើមក្រុម Al Hilal នៃលីគកំពូលអារ៉ាប៊ីសាអូឌីតវ័យ៣២ឆ្នាំរូបនេះ បានសម្រក់ទឹកភ្នែកពេលថ្លែងទៅកាន់ហ្វូងអ្នកគាំទ្រ ខណៈអ្នកគាំទ្រអបអរ និងរីករាយចំពោះវត្តមានការវិល​ត្រលប់របស់កីឡាករជានិមិត្តរូបរបស់ពួកគេ។

ក្លិប Al-Hilal បានយល់ព្រមបញ្ចប់កុងត្រា Neymar មុនពេលកំណត់ ដោយអនុញ្ញាតឱ្យខ្សែប្រយុទ្ធជម្រើសជាតិប្រេស៊ីលរូបនេះ ត្រលប់ទៅកាន់ទឹកដីកំណើតរបស់ខ្លួនវិញ។ Al-Hilal បានចំណាយប្រាក់៩៥លានអឺរ៉ូ ដើម្បីចុះហត្ថលេខានាំយក Neymar ពីក្លិបសេដ្ឋីបារាំង PSG កាលពីខែសីហា ឆ្នាំ២០២៣ ជាមួយកុងត្រារយៈពេល២ឆ្នាំ ដោយផ្តល់ថ្លៃពលកម្មរហូតដល់៣លានដុល្លារក្នុងមួយសប្តាហ៍ ឬ ១៥០លានដុល្លារក្នុងមួយឆ្នាំ។ បើតាមប្រភពពីកាសែត The Sun បានរាយការណ៍ថា Neymar រកបានប្រមាណ ២៥០លានដុល្លារពីក្លិប Al-Hilal នៅក្នុងរយៈពេល១៨ខែ តាមរយៈការបង្ហាញខ្លួនសរុបត្រឹម៧ប្រកួត និងស៊ុតបញ្ចូលទីបានត្រឹមតែ១គ្រាប់ប៉ុណ្ណោះ។

ខ្សែប្រយុទ្ធក្រុមសាំបាប្រេស៊ីលរូបនេះ បានរងរបួសដាច់សរសៃពួរជង្គង់ឆ្វេង ដោយត្រូវចំណាយពេលព្យាបាល១២ខែ ក្រោយបង្ហាញខ្លួនបានត្រឹមតែ៥ប្រកួតប៉ុណ្ណោះ នៅក្នុងខែតុលា ឆ្នាំ២០២៣។ លុះជាសះស្បើយ និងបានបង្ហាញត្រឹម២ប្រកួតជាមួយក្រុម នៅខែវិច្ឆិកា ឆ្នាំ២០២៤ Neymar ជួបបញ្ហារបួសសាច់ដុំធ្ងន់ធ្ងរ ដោយបង្ខំឃ្លាតឆ្ងាយពីទីលានរយៈពេលយូរជាថ្មីម្តងទៀត មុនពេលឈានទៅដល់ការបញ្ចប់កុងត្រាជាមួយក្លិប Al-Hilal ហើយផ្លាស់ត្រលប់មកចូលរួមជាមួយក្លិប Santos វិញ។

គួររំលឹកថា Neymar ចូលហ្វឹកហាត់បាល់ទាត់ជាមួយនឹងសាលាថ្នាលក្លិប Portuguesa Santista និង Santos មុនក្លាយជាកីឡាករអាជីពជាមួយក្រុមឈុតធំក្លិប Santos នៅឆ្នាំ ២០០៩ ដោយបង្ហាញខ្លួនសរុប ២២៥ប្រកួត ស៊ុតបញ្ចូលទី១៣៦គ្រាប់ មុនផ្លាស់ទៅក្លិបយក្សអេស្ប៉ាញ Barcelona នៅឆ្នាំ ២០១៣ ដោយស៊ុតបញ្ចូលទីបាន១០៥គ្រាប់ពីការបង្ហាញខ្លួនសរុប ១៨៦ប្រកួត។

Neymar បានផ្លាស់ពី Barcelona ទៅចូលរួមជាមួយ PSG នៅក្នុងតម្លៃកំណត់ត្រាពិភពលោក​២២២​លានអឺរូ កាលពីឆ្នាំ ២០១៧ ខណៈតម្លៃនេះ នៅតែមិនទាន់មានកីឡាកររូបណាបំបែកបាននៅឡើយទេ។ ខ្សែប្រយុទ្ធកម្ពស់ ១.៧៥ម៉ែត្ររូបនេះ ស៊ុតបញ្ចូលទីបាន ១១៨គ្រាប់ពីការបង្ហាញខ្លួន ១៧៣​ប្រកួត មុនក្លាយជាសមាជិកក្រុម Al-Hilal នៅឆ្នាំ ២០២៣៕ ដកស្រង់ ៖ The Sun, Goal និង The Guardian