រាជធានីភ្នំពេញ ៖ យ៉ាងហោចណាស់ប្រជាពលរដ្ឋប្រុសស្រី៤នាក់ស្លាប់បាត់បង់ជីវិត និង៥នាក់ទៀត ត្រូវបានសង្គ្រោះបន្ទាន់ ខណៈមានអាការៈខ្យល់គរស្លាប់បន្តបន្ទាប់ ពេលដណ្តើមប្រជ្រៀតគ្នាពពាក់ពពូន ចាំទទួលអាំងប៉ាវជាលុយចំនួន ៤ម៉ឺនរៀល និងអង្ករ២គីឡូក្រាម…
រាជធានីភ្នំពេញ ៖ យ៉ាងហោចណាស់ប្រជាពលរដ្ឋប្រុសស្រី៤នាក់ស្លាប់បាត់បង់ជីវិត និង៥នាក់ទៀត ត្រូវបានសង្គ្រោះបន្ទាន់ ខណៈមានអាការៈខ្យល់គរស្លាប់បន្តបន្ទាប់ ពេលដណ្តើមប្រជ្រៀតគ្នាពពាក់ពពូន ចាំទទួលអាំងប៉ាវជាលុយចំនួន ៤ម៉ឺនរៀល និងអង្ករ២គីឡូក្រាម នៅមុខភូមិគ្រឹះអ្នកឧកញ៉ា សុខ គង់ ដែលស្ថិតនៅតាមបណ្តោយមហាវិថីព្រះនរោត្តម សង្កាត់ផ្សារថ្មីទី៣ ខណ្ឌដូនពេញ ។
ហេតុការណ៍ដែលស្មានមិនដល់នេះបង្កភ្ញាក់ផ្អើលយ៉ាងខ្លាំងកាលពីវេលាម៉ោង១០និង៣០នាទីព្រឹកថ្ងៃទី២៣ ខែមករា ឆ្នាំ២០២៥ ។បើតាមប្រភពព័ត៌មានពីប្រជាពលរដ្ឋដែលប្រមូលផ្តុំគ្នានៅកន្លែងកើតហេតុ បានឱ្យដឹងថា ព្រឹកមិញនេះពួកគាត់បានទទួលព័ត៌មានថា អ្នកឧកញ៉ា សុខ គង់ ចែកអាំងប៉ាវអបអរថ្ងៃបុណ្យចូលឆ្នាំចិន-វៀតណាមខាងមុខនេះ ។ ដោយឮដូច្នេះពួកគេក៏នាំគ្នាមក ក៏ឃើញមានមនុស្សម្នាប្រមាណជាង១ពាន់នាក់ បានឈរប្រជ្រៀតគ្នាណែនណាន់តាន់តាប់រង់ចាំយកអាំងប៉ាវ ។ ខណៈនោះដែរ ក្រុមអង្គរក្សការពារនៅភូមិគ្រឹះអ្នកឧកញ៉ាបានបើកទ្វាររបងចេញមកដោយយកអាំងប៉ាវ និងអង្ករចែកដល់ពលរដ្ឋ ដោយក្នុងម្នាក់ទទួលបានអាំងប៉ាវម្នាក់៤ម៉ឺនរៀល ជាមួយអង្ករ២គីឡូក្រាម ។
ស្របពេលចាប់ផ្តើមចែកអាំងប៉ាវនោះបានប្រហែលជាង៣០នាទីក្រោយ ក៏ស្រាប់តែមានការរុញច្រានដណ្តើមគ្នាទៅមុខទៅក្រោយៗ នឹងប្រជ្រៀតគ្នាណែនប៉ែស បណ្តាលឱ្យមានការថប់ខ្យល់ ដកដង្ហើម រហូតមានមនុស្សដួលសន្លប់ជាបន្តបន្ទាប់តែម្តង ក៏បង្កការភ្ញាក់ផ្អើលយ៉ាងខ្លាំងបានកើតឡើង ដោយចរាចរណ៍លើកំណាត់ផ្លូវនេះក៏មិនអាចធ្វើដំណើរបានដែរ ។
ភ្លាមៗនោះ ក៏មានរថយន្តសង្គ្រោះរបស់មន្ទីរពេទ្យកាល់ម៉ែត និងរថយន្តសង្គ្រោះរបស់មន្ទីរពេទ្យព្រះអង្គឌួង បានចេញជាច្រើនគ្រឿងមកកាន់ទីតាំងកើតហេតុផងដែរ ។ តាមការបញ្ជាក់ពីលោកវរសេនីយ៍ឯក សំ វិច្ឆិកា អ្នកនាំពាក្យនៃស្នងការដ្ឋាននគរបាលរាជធានីភ្នំពេញបានឱ្យដឹងថា មនុស្សដែលបាត់បង់ជីវិត គឺបានស្លាប់បន្តបន្ទាប់គ្នា ដំបូង២នាក់ ក្រោយមក៣នាក់ ទីបំផុតស្លាប់ដល់៤នាក់ និង៥នាក់ផ្សេងទៀតកំពុងសង្គ្រោះ ។ ជនរងគ្រោះ គឺភាគច្រើនជាមនុស្សចាស់ ដែលមានបញ្ហាខ្សោយសុខភាព ក្នុងនោះមានមនុស្សប្រុស២នាក់ និងស្រី២នាក់ ។
តាមសេចក្ដីរាយការណ៍បន្ថែមពីភ្នាក់ងារព័ត៌មានបានឲ្យដឹងថា ក្នុងចំណោមអ្នកខ្យល់គហើយបញ្ជូនទៅសង្គ្រោះនៅមន្ទីរពេទ្យកាល់ម៉ែតស្លាប់២នាក់ និងនៅមន្ទីរពេទ្យអង្គឌួងស្លាប់២នាក់ ។
ថ្លែងប្រាប់បណ្តាញព័ត៌មានក្នុងស្រុក លោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានបញ្ជាក់ថា ជនរងគ្រោះ៤នាក់បានស្លាប់ (ប្រុស២នាក់ និងស្រី២នាក់) ហើយជនរងគ្រោះទាំង៤នាក់ មានអាយុច្រើនហើយប្រហែលជាខ្សោយខ្លាំងទើបបណ្តាលឲ្យស្លាប់ពេលប្រជ្រៀតគ្នា ។
ក្រោយមានហេតុការណ៍នេះកើតឡើងគួរឱ្យភ្ញាក់ផ្អើលនេះ គេឃើញមានវត្តមានរបស់ឯកឧត្តម ឃួង ស្រេង អភិបាលរាជធានីភ្នំពេញ និងលោក សុខ ពេញវុធ អភិបាលរងរាជធានីភ្នំពេញ បានដឹកនាំកម្លាំងសមត្ថកិច្ច និងរថយន្ដសង្គ្រោះបន្ទាន់ ដើម្បីជួយអន្ដរាគមន៍ដឹកប្រជាពលរដ្ឋទៅសង្គ្រោះ និងសម្រួលចរាចរណ៍ព្រមទាំងបំបែកការជួបជុំដ៏អាក្រក់នេះដើម្បីស្តារបរិយាកាសឱ្យវិលមកប្រក្រតីវិញ ។
លោក ចាប ឌីណា អភិបាលរងខណ្ឌដូនពេញបញ្ជាក់ពីអត្តសញ្ញាណជនរងគ្រោះរួមមាន៖
សង្គ្រោះនៅមន្ទីរពេទ្យព្រះអង្គឌួង ចំនួន៤នាក់ ស្លាប់ចំនួន២នាក់ (ស្រី១នាក់ ប្រុស១នាក់) ។
អ្នកស្លាប់ទាំង២មាន ម្នាក់ឈ្មោះ ម៉ាន់ ស៊ីយ៉ាន ភេទប្រុស អាយុ៧១ឆ្នាំ នៅភូមិដើមចាន់ សង្កាត់ច្បារអំពៅទី២ ខណ្ឌច្បារអំពៅ និងម្នាក់ទៀតឈ្មោះ គង់ វ៉ាន់ថា ភេទស្រី អាយុ៦៧ឆ្នាំ នៅឃុំឈើកាច់ ស្រុកបាភ្នំ ខេត្តព្រៃវែង ។
ចំពោះអ្នកសង្គ្រោះបន្ទាន់៖
១-ឈ្មោះ ជិន តុន ភេទប្រុស អាយុ៧៥ឆ្នាំ ភូមិអណ្តូង សង្កាត់គោករការ ខណ្ឌព្រែកព្នៅ ។
២-មិនទាន់ស្គាល់អត្តសញ្ញាណ ។
សង្គ្រោះនៅពេទ្យកាល់ម៉ែតចំនួន៥នាក់ សង្គ្រោះបន្ទាន់៣នាក់រួមមាន៖
១-ឈ្មោះ កែវ ភឿន អាយុ៦៥ឆ្នាំ ភេទប្រុស ។
២-ឈ្មោះ ហេង សានី ភេទប្រុស អាយុ១៣ឆ្នាំ ។
៣-ឈ្មោះ នូ ស៊ី ភេទស្រី អាយុ៣៥ឆ្នាំ ។
ករណីនេះពួកគាត់ប្រាប់ថា គាត់ទៅមើលគេ ហើយបានឮថាបងខ្លួនស្លាប់ក៏ដួលសន្លប់តែម្តង ។
ករណីស្លាប់ចំនួន២នាក់(ស្រី១នាក់ ប្រុស១នាក់) ម្នាក់ឈ្មោះ រឿន ចេក ភេទស្រី អាយុប្រហែល៣៧ឆ្នាំ ស្រុកកំណើត ស្រុកកំពង់ត្របែក ខេត្តព្រៃវែង និងម្នាក់ទៀតឈ្មោះ យស់ សារឿន ភេទប្រុស អាយុ៤៥ឆ្នាំ ស្រុកកំណើត ភូមិកន្សោមអក ស្រុកកំពង់ត្របែក ខេត្តព្រៃវែង ។
អំណោយជួយអ្នកស្លាប់និងរបួស
ការកើតមានហេតុការណ៍គួរឱ្យរន្ធត់នឹកស្មានមិនដល់នេះ អ្នកឧកញ៉ា សុខ គង់ និងកូនប្រុស គឺអ្នកឧកញ៉ា សុខ ហុង បានចូលរួមឧបត្ថម្ភ សម្រាប់សពម្នាក់ ៦ពាន់ដុល្លារ និងអ្នករបួសម្នាក់៤លានរៀល ។
ដោយឡែកឯកឧត្តម ឃួង ស្រេង អភិបាលរាជធានីភ្នំពេញ បានឧបត្ថម្ភដល់សពម្នាក់ៗ ចំនួន៥លានរៀល ព្រមទាំងមឈូសសម្រាប់អ្នកស្លាប់ និងអ្នករបួសចំនួន២លានរៀល ។ ថវិកាទាំងនេះត្រូវបានលោក សុខ ពេញវុធ អភិបាលរងរាជធានីភ្នំពេញ នាំយកទៅប្រគល់ជូនគ្រួសារជនរងគ្រោះនៅក្នុងមន្ទីរពេទ្យ ៕
ចែករំលែកព័តមាននេះ