ប្រទេសអង់គ្លេស ៖ ក្លិបបាល់ទាត់ Manchester City កាលពីថ្ងៃទី២០ ខែមករា បានសម្រេចការចុះហត្ថលេខាលើខ្សែការពារកណ្តាល Abdukodir Khusanov ពីក្លិបលីគកំពូលបារាំង Lens ក្នុងកិច្ចសន្យារយៈពេល៤ឆ្នាំកន្លះ រហូតដល់ឆ្នាំ ២០២៩។ ប្រភពពីក្លិបបានឱ្យដឹងថា តម្លៃផ្ទេរសម្រាប់ខ្សែការពារឆ្នើមក្រុមជម្រើសជាតិអ៊ូសបេគីស្ថាន វ័យ២០ឆ្នាំរូបនេះ នៅក្នុងតម្លៃ៤០លានអឺរ៉ូ ឬ ៤១លានដុល្លារអាមេរិក ជាមួយនឹងលក្ខខណ្ឌបូកបន្ថែមនៅពេលក្រោយរវាងក្លិបទាំងពីរ។

ជាមួយនឹងការចុះហត្ថលេខាដ៏ភ្ញាក់ផ្អើលនេះ ខ្សែការពារ Abdukodir Khusanov ដែលបង្ហាញខ្លួន១៨លើកសម្រាប់ក្រុមជម្រើសជាតិនោះ ក្លាយជាកីឡាករអ៊ូសបេគីស្ថានដំបូងគេ ដែលប្រកបអាជីពនៅលីគកំពូលអង់គ្លេស Premier League។ Khusanov ថ្លែងដោយក្តីរីករាយ ក្រោយចុះហត្ថលេខាជាមួយ Man City ថា «ក្រុមមួយនេះ ពោរពេញទៅដោយកីឡាករល្អបំផុតលើពិភពលោក ហើយខ្ញុំមិនអាចរង់ចាំក្នុងការជួបពួកគេ និងលេងជាមួយពួកគេនោះទេ»។ ខ្សែការពារកម្ពស់១,៨៦ម៉ែត្ររូបនេះ បន្តទៀតថា «ពិតណាស់ លោក Pep Guardiola គឺជាគ្រូបង្វឹកដ៏អស្ចារ្យបំផុតដែលមិនធ្លាប់មាន ហើយខ្ញុំពិតជារំភើបណាស់ដែលបានរៀនសូត្រពីគាត់ និងធ្វើសមត្ថភាពរបស់ខ្ញុំកាន់តែប្រសើរឡើងបន្ថែមទៀត»។

វត្តមានរបស់ Khusanov នឹងក្លាយជាកម្លាំងការពារដ៏សំខាន់របស់ក្រុមមេឃខៀវ Man City ដែលធ្លាក់ទម្រង់លេងគួរឱ្យភ្ញាក់ផ្អើល ខណៈក្រុមលោក Pep Guardiola មួយនេះ បច្ចុប្បន្នកំពុងឈរនៅចំណាត់ថ្នាក់ទី៥ នៃក្របខណ្ឌ Premier League និងចំណាត់ថ្នាក់ទី២២ នៅពានរង្វាន់ UEFA Champions League។

ក្លិប Lens ទទួលបានផលចំណេញយ៉ាងច្រើនពីការផ្ទេរខ្សែការពារកណ្តាល Khusanov របស់ខ្លួន ព្រោះតែពួកគេចំណាយត្រឹមតែ១០ម៉ឺនអឺរ៉ូនាំយកពីក្លិប Energetik-BGU នៅប្រទេសបេឡារុស កាលពីខែកក្កដា ឆ្នាំ ២០២៣។

គួរបញ្ជាក់ថា ខ្សែការពារ Abdukodir Khusanov បានចូលហ្វឹកហាត់នៅសាលាបាល់ទាត់ក្លិប Bunyodkor នៅប្រទេសកំណើតក្នុងឆ្នាំ ២០២០ ហើយក្លាយជាកីឡាករអាជីព ក្រោយផ្លាស់មកចូលរួមជាមួយក្លិប Energetik-BGU នៅឆ្នាំ ២០២២។ Khusanov ចូលរួមជាមួយ Lens នៅឆ្នាំ ២០២៣ ដោយបង្ហាញខ្លួនសរុប ៣១ប្រកួតនៅទីនោះ។

ភារកិច្ចជាមួយក្រុមជម្រើសជាតិអ៊ូសបេគីស្ថាន Khusanov ចាប់ផ្តើមជាមួយក្រុមយុវជន U17 U19 U20 និង U23 មុនពេលត្រូវបានកោះហៅចូលក្រុមឈុតធំ ក្រោមការដឹកនាំរបស់គ្រូបង្វឹកសញ្ជាតិស្លូវេនី លោក Srecko Katanec៕ ដកស្រង់ ៖ BBC និង The Guardian