អ្នកភ្នំពេញ ក្នុងមួយឆ្នាំស្លា.ប់ជាង៥ពាន់នាក់ រៀបការជិត២ម៉ឺនគូ និងកើតជាង៥ម៉ឺននាក់
រាជធានីភ្នំពេញ ៖ ភ្នំពេញ គឺជារាជធានី នៃព្រះរាជាណាចក្រកម្ពុជា ជាមជ្ឈមណ្ឌលនយោបាយ សេដ្ឋកិច្ច សង្គមកិច្ច ទេសចរណ៍ វប្បធម៌…
រាជធានីភ្នំពេញ ៖ ភ្នំពេញ គឺជារាជធានី នៃព្រះរាជាណាចក្រកម្ពុជា ជាមជ្ឈមណ្ឌលនយោបាយ សេដ្ឋកិច្ច សង្គមកិច្ច ទេសចរណ៍ វប្បធម៌ និងការទូត ដែលមានការអភិវឌ្ឍលើគ្រប់វិស័យ។ រាជធានីភ្នំពេញ មានផ្ទៃដីសរុប ៦៩៥,៤៦គីឡូមម៉ែត្រ មាន១៤ខណ្ឌ, ១០៥សង្កាត់ និង៩៥៣ភូមិ មានប្រជាពលរដ្ឋរស់នៅសរុប ១.៨៤១.៦៦៦ ស្រី ៩៥៤.៤៧២ ស្ថិតនៅភាគខាងត្បូង នៃប្រទេសកម្ពុជា ត្រង់ទន្លេចតុមុខ ជាចំណុចប្រសព្វរវាង ទន្លេមេគង្គលើ ទន្លេមេគង្គក្រោម ទន្លេសាប និង ទន្លេបាសាក់ ដែលមានព្រំប្រទល់ខាងលិចទល់នឹងស្រុកអង្គស្នួល ខាងកើតទល់នឹងក្រុងអរិយក្សត្រ ស្រុកគៀនស្វាយ ខាងជើងទល់នឹងស្រុកមុខកំពូល ស្រុកពញាឮ ខាងត្បូងទល់នឹងស្រុកកណ្តាលស្ទឹង ក្រុងតាខ្មៅ ខេត្តកណ្តាល ។
យោងតាមរបាយការណ៏របស់រដ្ឋបាលរាជធានីភ្នំពេញ បានឲ្យដឹងថា ក្នុងរយៈពេលមួយឆ្នាំ គិតចាប់ពីថ្ងៃទី០១មករា ដល់ថ្ងៃទី៣១ ធ្នូ ឆ្នាំ២០២៤កន្លងមក ប្រជាពលរដ្ឋ ដែលបានចុះបញ្ជីអត្រានុកូលដ្ឋានគ្រប់ប្រភេទមានចំនួន ៥៥.៣៥៩នាក់ ក្នុងនោះ ចុះបញ្ជីកំណើត ៤៣.៣៤៣នាក់ បញ្ជាក់កំណើត ១២.០១៦នាក់ អាពាហ៍ពិពាហ៍រវាងពលរដ្ឋខ្មែរ និងខ្មែរ ចំនួន ១៦.០៤៥គូ រវាងខ្មែរ និងបរទេស ចំនួន ២៨១គូ និងមរណភាព ចំនួន ៥.៤១១នាក់ ។
របាយការណ៍ដដែលបានឱ្យដឹងទៀតថា ស្ថិតិប្រជាពលរដ្ឋរាជធានីភ្នំពេញ ដែលបានចុះបញ្ជីស្នាក់នៅសៀវភៅគ្រួសារ ចំនួន៦.៦៣៩ក្បាល ធ្វើអត្តសញ្ញាណប័ណ្ណសញ្ជាតិខ្មែរ ចំនួន១១.៧៥៥នាក់។ មានគ្រួសារសរុប ៣៨០.៨៩៦ គ្រួសារអចិន្ត្រៃយ៍ចំនួន ៣១៣.០៦១ និងគ្រួសារបណ្តោះអាសន្ន សរុប ៦៧.៨៣៥គ្រួសារ ដែលមានស្ត្រីជាមេគ្រួសារប្រមាណ១៥,៣៥% ។
គួររំលឹកថា រយៈពេលមួយឆ្នាំដូចគ្នា កាលពីឆ្នាំ២០២៣កន្លងមក ប្រជាពលរដ្ឋដែលបានចុះបញ្ជីអត្រានុកូលដ្ឋានគ្រប់ប្រភេទ បានចំនួន ៧៨.៥៧៣នាក់ (ស្រី៣៧.៨៩១នាក់) ក្នុងនោះ ចុះបញ្ជីសំបុត្រកំណើត ចំនួន ២០.០៩៥នាក់ (ស្រី ៩.៤០៨នាក់) បញ្ជាក់កំណើត ចំនួន២២.៩៦១នាក់ (ស្រី ១១.០១១នាក់) អាពាហ៍ពិពាហ៍រវាងពលរដ្ឋខ្មែរ និងខ្មែរចំនួន ១៤.៧១៣គូ រវាងខ្មែរ និងបរទេស ចំនួន ២៥០គូ និងមរណភាព ចំនួន ៥.៤៨៤នាក់ (ស្រី២.៤៩៤នាក់) ព្រមទាំងបានចុះបញ្ជីកំណើតជនបរទេស ចំនួន ៤៩នាក់ (ស្រី ៦នាក់) អាពាហ៍ពិពាហ៍ជនបរទេស ចំនួន៨គូ និងមរណភាពជនបរទេស ចំនួន ៤២នាក់ (ស្រី ១នាក់) ។
សូមបញ្ជាក់ថា បើមិនប្រែប្រួលទេនោះ រដ្ឋបាលរាជធានីភ្នំពេញ គ្រោងនឹងធ្វើពិធីសន្និបាតបូកសរុបលទ្ធផលការងារប្រចាំឆ្នាំរបស់ខ្លួនសម្រាប់ឆ្នាំ២០២៤ និងលើកទិសដៅបន្តឆ្នាំ២០២៥ មានរយៈពេលពីរថ្ងៃ គីថ្ងៃទី២១ និងថ្ងៃទី២២ ខែមករា នៅសណ្ឋាគារសុខាភ្នំពេញ ដែលពិធីបើកស្ថិតក្នុងអធបតីភាពលោក ឃួង ស្រេង អភិបាលរាជធានីភ្នំពេញ និងលោក ម៉ប់ សារិន ប្រធានក្រុមប្រឹក្សារាជធានីភ្នំពេញ ចំណែកពិធីបិទសន្និបាត ស្ថិតក្នុងអធបតីភាពឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ៕
ចែករំលែកព័តមាននេះ