រាជធានីភ្នំពេញ ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ការដោះស្រាយពិតប្រាកដ គឺការផ្តល់ប្រាក់កម្ចីឲ្យរោងម៉ាស៊ីន ទិញស្រូវពីកសិករ ក្នុងតម្លៃ…
រាជធានីភ្នំពេញ ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ការដោះស្រាយពិតប្រាកដ គឺការផ្តល់ប្រាក់កម្ចីឲ្យរោងម៉ាស៊ីន ទិញស្រូវពីកសិករ ក្នុងតម្លៃ ដែលបានចំណេញទាំងអស់គ្នា ។
ការលើកឡើងរបស់ឯកឧត្តម ឌិត ទីណា រដ្ឋមន្ត្រីក្រសួងកសិកម្ម ឆ្លើយតបទៅកាន់អ្នក ដែលធ្វើប្រជាភិថុតិ ដែលលើកឡើងចង់រាជរដ្ឋាភិបាល បញ្ចេញលុយធានាទិញស្រូវរបស់កសិករ ក្នុងពេលធ្លាក់ថ្លៃ។ ឯកឧត្តម បានបញ្ជាក់ថា មិនអាចទៅរួចឡើយ ការធ្វើបែបនេះ គឺជាការបង្ខូចថ្លៃ ធ្វើឱ្យប៉ះពាល់ដល់ទីផ្សារទៅវិញ ។
ថ្លែងក្នុងសន្និសីទសារព័ត៌មាន ស្តីពីស្ថានភាពថ្លៃស្រូវ និងការប្រមូលផលស្រូវប្រាំង នៅរសៀលថ្ងៃទី១៥ ខែមករា ឆ្នាំ២០២៥ នៅទីស្តីការគណៈរដ្ឋមន្ត្រី ឯកឧត្តម ឌិត ទីណា បានលើកឡើងថា ការបង្ខំឱ្យរដ្ឋបញ្ចេញលុយទិញស្រូវ ក្នុងតម្លៃខ្ពស់ជាការធ្វើប្រជាភិថុតិ តែផ្ទុយទៅវិញការ ដែលរដ្ឋផ្តល់ប្រាក់កម្ចីឱ្យរោងម៉ាស៊ីន ដើម្បីទិញស្រូវពីកសិករកិនកែច្នៃសម្រាប់នាំចេញ គឺជាដំណោះស្រាយល្អ ។
ឯកឧត្តមបានបញ្ជាក់ថា «វាមិនអាចទៅរួចទេ បើយើងជារដ្ឋ យកថវិកាទៅទិញហើយអត់មានហេដ្ឋារចនាសម្ព័ន្ធសម្រាប់ទទួលស្តុកទុកនោះទេ គឺស្មើនឹងយកទៅបោះចោល ហើយអត់មាននិរន្តរភាពនោះទេ» ។
ជាមួយគ្នានោះដែរ ឯកឧត្តមបានលើកឡើងថា ទោះបីមិននិយាយចំឈ្មោះ តែគេដឹងថាចង់សំដៅទៅក្រុមប្រឆាំង ដែលពូកែធ្វើប្រជាភិថុតិ ឯកឧត្តមរដ្ឋមន្ត្រី បញ្ជាក់ថា អ្នកប្រជាភិថុតិមួយចំនួនមិនចេះសេដ្ឋកិច្ចទេ មិនមែនអាចបោះពុម្ពលុយបាន ចេះតែបោះលុយទិញនោះទេ ។
ក្នុងឱកាសនោះដែរ ឯកឧត្តមក៏បានលើកឡើងថា បន្ទោសគ្នាក៏មិនមែនជាដោះស្រាយនោះទេ អ្វីគួរធ្វើត្រូវរួមគ្នារកដំណោះស្រាយទើបជាការប្រសើរឡើយ ។
ទាក់ទិននឹងបញ្ហាស្រូវនេះដែរ រដ្ឋមន្ត្រីក្រសួងកសិកម្ម បានឲ្យដឹងថា ការចូលក្នុងសហគមន៍កសិកម្មទំនើប មានផលប្រយោជន៍ ៣ ដូចជា ការកាត់បន្ថយថ្លៃដើមផលិត ការផលិតស្រូវមានគុណភាពត្រូវស្តង់ដារ និងធនាគារអភិវឌ្ឍន៍ជនបទ និងកសិកម្ម ត្រៀម ចូលរួម ផងដែរ ដើម្បីជួយផ្នែកឥណទាន ។
ឯកឧត្តមបានបញ្ជាក់យ៉ាងដូច្នេះថា «សហគមន៍កសិកម្មទំនើប ល្អយ៉ាងម៉េច ? ទី១-កាត់បន្ថយថ្លៃដើម គ្រប់គ្រងបរិមាណ គ្រប់គ្រងថ្លៃតាមរយៈផលិតកម្មតាមកិច្ចសន្យា ទី២-ស្រូវមានគុណភាព ដោយសាររបៀបដាក់ជី និងថ្នាំ មានសណ្ឋានតែមួយ» ។
ឯកឧត្តមបានបន្តថា ឥឡូវនេះ ទើបតែមានសហគមន៍កសិកម្មទំនើបតិចណាស់ ព្រោះនៅពេល ដែលស្រូវបានថ្លៃ ប្រជាពលរដ្ឋសប្បាយចិត្ត និងធ្វើតាមទម្លាប់ ហើយពេលហៅគាត់ទៅចូលរួម គាត់បដិសេធ ប៉ុន្តែឥឡូវស្ថានភាពវាខុសគ្នា។ សព្វថ្ងៃនេះ កម្ពុជាឈានដល់វិបត្តិតម្លៃស្រូវ បន្ទាប់ពីឥណ្ឌាបានបញ្ចេញស្រូវទៅលើទីផ្សារ ខណៈពេលឥណ្ឌូនេស៊ី ក៏កាត់បន្ថយការនាំចូល ដោយសារឥណ្ឌូនេស៊ី ក៏ជំរុញការផលិតរបស់ខ្លួន។ បញ្ហានេះ ទាំងកម្ពុជា ទាំងវៀតណាម និងថៃ សុទ្ធតែចាល់ស្រូវដូចគ្នា ។
សូមជម្រាបថា សហគមន៍កសិកម្មទំនើប គឺប្រៀបដូចជាការរួមគ្នា ប្រែក្លាយការធ្វើកសិកម្មនៅកម្ពុជា ពីលក្ខណៈគ្រួសារ ទៅជាទម្រង់សហគ្រាសសេដ្ឋកិច្ចរឹងមាំ និងមានសមត្ថភាពប្រកួតប្រជែងខ្ពស់ ទាំងលើផ្នែកថ្លៃដើម បរិមាណ និងគុណភាព ។
ជាមួយនឹងប្រព័ន្ធគ្រប់គ្រងច្បាស់លាស់ ថ្លៃដើមផលិតទាប ការគាំទ្រជាប្រចាំខាងផ្នែកបច្ចេកទេស និងការធានាទីផ្សារទុកជាមុនតាមរយៈកិច្ចសន្យាកសិកម្ម ជាពិសេសការទទួលបានទុនកម្ចីការ ប្រាក់ទាប សហគមន៍កសិកម្មទំនើបផ្តល់ភាពច្បាស់លាស់មួយ នៅក្នុងខ្សែច្រវាក់ផលិតកម្ម ដែលនឹងចូលរួមដោយផ្ទាល់ដល់ការអភិវឌ្ឍវិស័យកសិកម្មកម្ពុជា នាពេលអនាគត ។
រាជរដ្ឋាភិបាល អាណត្តិទី៧ បានដាក់ចេញកម្មវិធីគោលនយោបាយ ការអភិវឌ្ឍសហគមន៍កសិកម្មទំនើប ដែលជាចក្ខុវិស័យនៃការ
អនុវត្តផលិតកម្មកសិកម្មរួមគ្នា ក្នុងទ្រង់ទ្រាយធំនៅ ក្នុងវិស័យកសិកម្ម និងមានគោលបំណងប្រែក្លាយវិស័យកសិកម្មកម្ពុជា ពីលក្ខណៈគ្រួសារឱ្យ ទៅជាសហគ្រាសសេដ្ឋកិច្ចកសិកម្មដ៏រឹងមាំ មានសមាហរណកម្មខ្ពស់ មានសេដ្ឋកិច្ចមាត្រដ្ឋាន និងមានសមត្ថភាពប្រកួតប្រជែងទាំងបរិមាណ និងគុណភាព ។
កម្មវិធីគោលនយោបាយនេះ ត្រូវបានរំពឹងទុកថា នឹងជួយលើកកម្ពស់កម្រិតជីវភាពប្រជាកសិករ ក៏ដូចជានឹងបង្កើនប្រសិទ្ធភាពផលិតកម្មប្រកបដោយភាតរបរិស្ថាន និងចីរភាព ៕
ចែករំលែកព័តមាននេះ