រាជធានីភ្នំពេញ ៖ ឃាត់ខ្លួនក្មេងទំនើង០៥នាក់ ក្រោយប្រដាប់ដោយកាំបិតផ្គាក់ និងកាវ ដែលធ្វើសកម្មភាពកាប់ម៉ូតូជនរងគ្រោះចំនួន០២គ្រឿង ផ្អើលច្បារអំពៅ កាលពីយប់មិញ ។

ហេតុការណ៍នេះដែលបានកើតទ្បើងកាលពីវេលាម៉ោង១១និង៣០ នាទីព្រឹក ថ្ងៃទី១៤ ខែមករា ឆ្នាំ២០២៥ នៅចំណុចដីឡូត៍មួយកន្លែង ក្នុងសង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ។

តាមយោងតាមប្រភពព័ត៌មានពីប្រជាពលរដ្ឋ បានអោយដឹងថា មុនពេលកើតហេតុ គេឃើញក្មេងទំនើងមួយក្រុមគ្នា ៩នាក់ ប្រដាប់ដោយដាវ កែច្នៃ និង កាំបិតផ្គាក់ ធ្វើសកម្មភាពដេញកាប់ទៅលើយុវជន មួយក្រុមទៀត ខណៈដល់ចំណុចកើតខាងមុខផ្សារច្បារអំពៅ យុវជនរងគ្រោះបានផ្តួលម៉ូតូរត់ រកគេជួយស្របពេលនោះ ក្រុមក្មេងទំនើងបានចុះពីលើម៉ូតូ ប្រដាប់ដោយកែច្នៃ កាប់ម៉ូតូ ស៊ុយសូគីនិច ពណ៌ស មិនចាំស្លាកលេខ និង ម៉ូតូស្កុបពី ពណ៌ ឈាមជ្រូក បណ្តាលអោយរងការខូចខាតយ៉ាងដំណំ ។ ភ្លាមៗក្រុមក្មេងទំនើងបានទ្បើងជិះម៉ូតូរត់គេចខ្លួនបាត់ស្រមោល ។

បន្ទាប់ពីទទួលបានពាក្យបណ្តឹងពីជនរងគ្រោះ សមត្ថកិច្ចបានបើកការស្រាវជ្រាវ រហូតមកដល់ព្រឹកថ្ងៃទី១៤ ខែមករា ឆ្នាំ២០២៥ វេលាម៉ោង១១ និង៣០នាទីព្រឹក នៅចំណុចដីឡូត៍មួយកន្លែង ក្នុងសង្កាត់ព្រែកប្រា ឃាត់ខ្លួនបានជនសង្ស័យចំនួន០៣នាក់ និងបន្តទៅយកជនសង្ស័យចំនួន២នាក់បន្ថែមទៀត នៅក្រុងតាខ្មៅ ។

ជាលទ្ធផលសមត្ថកិច្ចបានធ្វើការការដកហូត ដាវកែច្នៃចំនួន១ដើម , កាំបិតផ្គាក់ចំនួន១ដើម និងម៉ូតូឌ្រីមសង់ ពណ៍ខ្មៅ ចំនួន០១គ្រឿង ។

ក្រោយឃាត់ខ្លួន សមត្ថកិច្ចបានបញ្ជូនជនសង្ស័យទាំង០៥នាក់ទៅកាន់ អធិការដ្ឋាននគរបាលខណ្ឌច្បារអំពៅ ដើម្បីកសាងសំណុំរឿងចាត់ការតាមផ្លូវច្បាប់។ ចំណែកបក្ខពួក ដែលសេសសល់ សមត្ថកិច្ចកំពុងស្រាវជ្រាវស្វែងរកបន្ត មិនអោយរួចខ្លួននោះទ្បើយ៕