ខេត្តបាត់ដំបង ៖ ក្មេងទំនើងចំនួន០៤នាក់ (ភាគីម្ខាង) ត្រូវកម្លាំងជំនាញនៃអធិការក្រុងបាត់ដំបង កសាងសំណុំរឿងបញ្ជូនទៅកាន់ការិយាល័យជំនាញនៃស្នងការខេត្តចាត់ការបន្តតាមនីតិវិធី នៅរសៀលថ្ងៃទី ១៣ មករា ក្រោយពីផ្ទុះហឹង្សាដេញវាយគ្នាផ្អើលទាំងយប់នៅក្នុងក្រុងបាត់ដំបង…
ខេត្តបាត់ដំបង ៖ ក្មេងទំនើងចំនួន០៤នាក់ (ភាគីម្ខាង) ត្រូវកម្លាំងជំនាញនៃអធិការក្រុងបាត់ដំបង កសាងសំណុំរឿងបញ្ជូនទៅកាន់ការិយាល័យជំនាញនៃស្នងការខេត្តចាត់ការបន្តតាមនីតិវិធី នៅរសៀលថ្ងៃទី ១៣ មករា ក្រោយពីផ្ទុះហឹង្សាដេញវាយគ្នាផ្អើលទាំងយប់នៅក្នុងក្រុងបាត់ដំបង ។
តាមរយៈរបាយការណ៍ លោក ពេជ្រ សារ៉ែន អធិការក្រុងបាត់ដំបងបានឲ្យដឹងថា ពួកក្មេងទំនើងមាន០២ក្រុមបានដេញវាយតប់គ្នា តែក្រោយកើតហេតុកម្លាំងជំនាញរបស់លោកបានធ្វើការស្រាវជ្រាវតាមឃាត់ខ្លួនបានម្នាក់ទាំងយប់ និងតាមឃាត់ខ្លួនបានចំនួន០៣នាក់ទៀតនៅថ្ងៃបន្ទាប់ ។
លោកបានបញ្ជាក់ថា ក្រុមដែលឃាត់ខ្លួនបាន០៤នាក់នេះ ជាភាគីម្ខាង រីឯភាគីម្ខាងទៀតកំពុងរត់គេចខ្លួន ។ យោងតាមរបាយការណ៍អធិការក្រុងបាត់ដំបងបានឲ្យដឹងថា ក្រុមជនអន្ធពាលទាំង០២ក្រុមនេះ ដែលភាគីម្ខាងៗ មានគ្នា០៤នាក់ បានផ្ទុះហិង្សាដេញវាយគ្នាទៅវិញទៅមកយ៉ាងអនាធិបតេយ្យ កាលពីយប់ថ្ងៃទី១១ មករា នៅក្បែរអាហារដ្ឋានមួយកន្លែង ស្ថិតក្នុងភូមិរំចេក៤ សង្កាត់រតនៈ ក្រុងបាត់ដំបង ។
នៅក្នុងឃ្លីបវីដេអូដែលមហាជនថតបានពីសកម្មភាពពួកជនអន្ធពាលនេះដេញវាយគ្នា គេឃើញភាគីម្ខាង ដែលសមត្ថកិច្ចចាប់ខ្លួនបាននាំគ្នារត់ឡើងជិះម៉ូតូ០២គ្រឿងបែកហ្វូងគ្នាជាមួយនឹងភាគីម្ខាងទៀត មុនពេលកម្លាំងសមត្ថកិច្ចចុះទៅដល់ ។ បើតាមសមត្ថកិច្ចបានប្រាប់ថា ក្រុមជនអន្ធពាលទាំង០២ក្រុមនេះ គ្មានភាគីណាជាជនរងគ្រោះទេ គឺវាយគ្នាទៅវិញទៅមក ។ ដើមចមដែលនាំឲ្យផ្ទុះហិង្សាយ៉ាងកំរោលនេះ គឺ ភាគីម្ខាងដែលកំពុងរត់គេចខ្លួនបានស្ដោះទឹកមាត់ដាក់លើម៉ូតូភាគីដែលត្រូវចាប់ខ្លួន ។
ក្រោយពីដឹងរឿងថា គូរសត្រូវស្ដោះទឹកមាត់ដាក់លើម៉ូតូខ្លួន ក្រុមនេះក៏ជិះម៉ូតូតាមទៅសួរនាំ ទើបប៉ះសម្ដីគ្នា បង្កជាអំពើហិង្សាវាយតប់គ្នាទៅវិញទៅមកផ្អើលទាំងយប់តែម្ដង ។ ប៉ុន្តែនៅថ្ងៃបន្ទាប់ កម្លាំងជំនាញ នៃអធិការក្រុងបាត់ដំបង ធ្វើការស្រាវជ្រាវរហូតខ្លួនបានចំនួន០៤នាក់ជាបន្តបន្ទាប់ (ភាគីជិះម៉ូតូរត់) រីឯភាគីម្ខាងទៀតកំពុងសម្ងំលាក់ខ្លួន ។
ជនសង្ស័យដែលត្រូវសមត្ថកិច្ចឃាត់ខ្លួនបានចំនួន០៤នាក់មាន ១-ឈ្មោះ សាន ស៊ីតុលា អាយុ១៥ឆ្នាំ ២-ឈ្មោះ ស៊ីម វាសនា អាយុ២៤ឆ្នាំ ជនទាំង០២នាក់នេះ នៅភូមិអូរចា សង្កាត់អូរចា ក្រុងបាត់ដំបង ៣-ឈ្មោះ មួង វណ្ណថេត អាយុ១៧ឆ្នាំ និង៤-ឈ្មោះ ខុង ឆវិន អាយុ១៧ឆ្នាំ ជនទាំង០២នាក់ នៅភូមិចម្ការសំរោង សង្កាត់ចម្ការសំរោង ក្រុងបាត់ដំបង ។
លោក ពេជ្រ សារ៉ែន អធិការក្រុងបាត់ដំបងបានបញ្ជាក់ថា ជនអន្ធពាល់ទាំង០៤នាក់ ដែលបានឃាត់ខ្លួននេះ ជាភាគីម្ខាង រីឯភាគីម្ខាងទៀត កម្លាំងជំនាញ កំពុងតាមរក ព្រោះពេលនេះពួកគេកំពុងសម្ងំលាក់ខ្លួនុ៕
ចែករំលែកព័តមាននេះ