រាជធានីភ្នំពេញ ៖ នៅរយៈពេលមួយឆ្នាំ២០២៤ ក្រុមប្រឹក្សាអភិវឌ្ឍន៍កម្ពុជា(CDC) បានអនុម័តគម្រោងវិនិយោគចំនួន៤១៤ ដែលមានទុនវិនិយោគសរុបប្រមាណ៦,៩ពាន់លានដុល្លារអាមេរិក ។ នេះបើតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា ។ សេចក្តីប្រកាសព័ត៌មានរបស់…
រាជធានីភ្នំពេញ ៖ នៅរយៈពេលមួយឆ្នាំ២០២៤ ក្រុមប្រឹក្សាអភិវឌ្ឍន៍កម្ពុជា(CDC) បានអនុម័តគម្រោងវិនិយោគចំនួន៤១៤ ដែលមានទុនវិនិយោគសរុបប្រមាណ៦,៩ពាន់លានដុល្លារអាមេរិក ។ នេះបើតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា ។
សេចក្តីប្រកាសព័ត៌មានរបស់ CDC ចេញផ្សាយ នៅថ្ងៃទី១៣ មករា ឆ្នាំ២០២៥បានឲ្យដឹងថា គម្រោងវិនិយោគចំនួន៤១៤ ដែលមានទុនវិនិយោគសរុបប្រមាណ៦,៩ពាន់លានដុល្លារអាមេរិកត្រូវបានអនុម័តដោយក្រុមប្រឹក្សាអភិវឌ្ឍន៍កម្ពុជាក្នុងឆ្នាំ២០២៤ ។
ប្រភពបានលើកឡើងទៀតថា ក្នុងឆ្នាំ២០២៤ កន្លងទៅថ្មីៗនេះក្រុមប្រឹក្សាអភិវឌ្ឍន៍កម្ពុជាបានបំបែកកំណត់ត្រាប្រចាំឆ្នាំតាមរយៈការអនុម័តគម្រោងវិនិយោគសរុបចំនួន៤១៤គម្រោង ក្នុងនោះគម្រោងវិនិយោគថ្មីចំនួន៣៨៧គម្រោង និងគម្រោងពង្រីកផលិតកម្មចំនួន២៧គម្រោង ដែលមានទុនវិនិយោគសរុបប្រមាណ៦,៩ពាន់លានដុល្លារ អាមរិក និងអាចបង្កើតការងារបានប្រមាណជិត៣២ម៉ឺនកន្លែង ។ ក្នុងចំណោមគម្រោងវិនិយោគទាំង៤១៤ គម្រោង គម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេសមានចំនួន២៦៤គម្រោង និងគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ចពិសេសមានចំនួន១៥០គម្រោង ។
ប្រភពបញ្ជាក់ថា ជារួមក្នុងឆ្នាំ២០២៤ ការអនុម័តគម្រោងវិនិយោគមានការកើនឡើងចំនួន១៤៦គម្រោង ខណៈទុនវិនិយោគមានការកើនឡើងប្រមាណជិត២ពាន់លានដុល្លារអាមេរិកស្មើនឹងប្រមាណជិត៤០% ធៀបនឹងរយៈពេលដូចគ្នាក្នុងឆ្នាំ២០២៣ ហើយក្នុងនោះគម្រោងពង្រីកផលិតកម្មបានកើនពី២១គម្រោងឡើងមក២៧គម្រោង ។
ជាមួយគ្នានោះដែរ CDC បានឲ្យដឹងទៀតថា ក្នុងឆ្នាំ២០២៤ វិស័យឧស្សាហកម្ម នៅតែបន្តជាវិស័យលេចធ្លោជាងគេដោយបានស្រូបទាញគម្រោងវិនិយោគ ចំនួន៣៩៤គម្រោងស្មើនឹងប្រមាណ៩៥% នៃចំនួនគម្រោងវិនិយោគសរុប ខណៈទុនវិនិយោគ ក្នុងវិស័យនេះមានប្រមាណ៤,៨ ពាន់លានដុល្លារអាមេរិក ដែលចូលរួមចំណែក៦៩% នៃទុនវិនិយោគ សរុប និងមានកំណើនដល់ទៅប្រមាណ១១០% ធៀបនឹងឆ្នាំ២០២៣ ។
ទន្ទឹមនេះ វិស័យកសិកម្ម និងកសិ- ឧស្សាហកម្ម មានចំនួន៨គម្រោង ក្នុងទុនវិនិយោគសរុបជាង ១២១លានដុល្លារអាមេរិកស្មើនឹង២%, វិស័យទេសចរណ៍ មានចំនួន៤គម្រោង ក្នុងទុនវិនិយោគសរុបប្រមាណ ៧៣៨លានដុល្លារអាមេរិក ស្មើនឹង១១%, វិស័យហេដ្ឋារចនាសម្ព័ន្ធ និងផ្សេងៗ មានគម្រោងវិនិយោគចំនួន ៨គម្រោង ក្នុងទុនវិនិយោគសរុប ប្រមាណជាង ១,៣ពាន់លានដុល្លារអាមេរិកស្មើនឹងប្រមាណ ១៨% នៃទុនវិនិយោគសរុប ៕
ចែករំលែកព័តមាននេះ