រាជធានីភ្នំពេញ ៖ ក្នុងរយៈពេល១ឆ្នាំមកនេះ អគ្គលេខាធិការដ្ឋាន នៃគណៈកម្មការដឹកនាំយុទ្ធនាជំរុញ និងពន្លឿនការដោះស្រាយរឿងក្តីនៅតាមតុលាការ បានទទួលសំណើរសុំអន្តរាគមន៍លើសំណុំរឿងក្តីពីប្រជាពលរដ្ឋ បានចំនួន២,៤១៣ករណី ដែលគិតជាមធ្យម ចំនួនស្នើសុំនេះមានអត្រាប្រមាណ…
រាជធានីភ្នំពេញ ៖ ក្នុងរយៈពេល១ឆ្នាំមកនេះ អគ្គលេខាធិការដ្ឋាន នៃគណៈកម្មការដឹកនាំយុទ្ធនាជំរុញ និងពន្លឿនការដោះស្រាយរឿងក្តីនៅតាមតុលាការ បានទទួលសំណើរសុំអន្តរាគមន៍លើសំណុំរឿងក្តីពីប្រជាពលរដ្ឋ បានចំនួន២,៤១៣ករណី ដែលគិតជាមធ្យម ចំនួនស្នើសុំនេះមានអត្រាប្រមាណ ៦.៥២សំណើរ ក្នុងមួយថ្ងៃ ដែលមានចំនួនថយចុះ បើធៀបនឹងការចាប់ផ្តើមដំបូងមានរហូត ដល់១១ ឬ១២សំណើរក្នុងមួយថ្ងៃ នេះបើតាមលោក កេង សុម៉ារិទ្ធ រដ្ឋលេខាក្រសួងយុត្តិធម៌ និងជាប្រធានលេខាធិការរដ្ឋាន នៃគណៈកម្មការដឹកនាំយុទ្ធនាការជំរុញនិងពន្លឿនការដោះស្រាយរឿងក្តីនៅតាមតុលាការ និងយុទ្ធនាការត្រួតពិនិត្យ និងដោះស្រាយភាពមិនប្រក្រតីនៅតាមតុលាការ ។
ការលើកឡើងរបស់រដ្ឋលេខាធិការក្រសួងយុត្តិធម៌ នៅក្នុងសន្និសីទសារព័ត៌មានអំពី “លទ្ធផលរយៈពេល១ឆ្នាំ នៃការអនុវត្តយុទ្ធនាការជំរុញនិងពន្លឿនការដោះស្រាយរឿងក្តី នៅតាមតុលាការ និងយុទ្ធនាការត្រួតពិនិត្យ និងដោះស្រាយភាពមិនប្រក្រតី នៅតាមតុលាការ” នារសៀលថ្ងៃទី១៣ ខែមករា ឆ្នាំ២០២៥ នៅទីស្តីការក្រសួង ។
លោក កេង សុម៉ារិទ្ធ បានលើកឡើងទៀតថា រាល់សំណើរ ដែលទទួលបាន ទាំងគណៈកម្មការជំនាញ បានពិនិត្យប្រមូលព័ត៌មានរួចហើយបានទាក់ទងទៅម្ចាស់សំណើរវិញ គឺមានសំណើរចំនួន១៧ មិនមានព័ត៌មានគ្រប់គ្រាន់ និងមិនអាចចាត់ការបាន។ ហើយក៏មានសំណើរសុំអន្តរាគមន៍ចំនួន ២,៣៤៦ករណី បានពិនិត្យឃើញមានមូលដ្ឋានគ្រប់គ្រាន់ និងបានបញ្ជូនទៅកាន់យុទ្ធនាការពាក់ព័ន្ធទាំងពីរ ដែលនៅក្នុងនោះ បានបញ្ជូនទៅយុទ្ធនាការ ជំរុញ និងពន្លឿនការដោះស្រាយរឿងក្តីនៅតាមតុលាការសរុបចំនួន១,១៧៥ករណី ស្មើនឹង៤៩.០% នៃចំនួនស្នើសុំអន្តរាគមន៍។ លើសពីនេះ ក៏បានបញ្ជូនទៅកាន់គណៈកម្មការយុទ្ធនាការត្រួតពិនិត្យ និងដោះស្រាយភាពមិនប្រក្រតី នៅតាមតុលាការមានពាក្យបណ្តឹងសរុប ចំនួន១,២២១ករណី ស្មើនឹង៥០.៩៦% នៃចំនួនបណ្តឹងសរុបទាំងអស់ ។
លោកបានលើកឡើងទៀតថា ចំពោះយុទ្ធនាការជំរុញ និងពន្លឿនការដោះស្រាយរឿងក្តី នៅតាមតុលាការគណៈកម្មការគណៈបញ្ជាការបានធ្វើលិខិតអន្តរាគមន៍ ទៅកាន់សាលាជម្រះក្តី និងម្ចាស់បណ្តឹងបានចំនួន៦៣៩ករណី ហើយមកដល់ពេលនេះ តុលាការបានចាត់ការចំពោះការជំរុញ និងពន្លឿន នេះបានចំនួន ១,១៦៣ករណី ស្មើ៩៨.៩៨% នៃចំនួនបណ្តឹង ដែលអគ្គលេខាធិការដ្ឋានទទួលបានសរុប ។
លោកបានបញ្ជាក់ថា ៖ «ក្រោយពីតុលាការទទួលបានលិខិតស្នើសុំអន្តរាគមន៍រួចហើយ តុលាការបានចាត់ការលើសំណើរនោះ បានចំនួន៦២៧ករណី ហើយក៏មានសំណុំរឿងចំនួន ៥៣៦ករណី ត្រូវបានតុលាការធ្វើការចាត់ដោយខ្លួនឯងផងដែរ» ។
ជាមួយគ្នានោះដែរ លោកបានឲ្យដឹងដែលថា ក្នុងរយៈពេល១ឆ្នាំមកនេះ ក្រសួងយុត្តិធម៌ ក៏បានផ្តល់សេវាមេធាវី ស្ម័គ្រចិត្តដោយមិនគិតថ្លៃដល់ប្រជាពលរដ្ឋផងដែរ ដោយសរុបមានសំណើរសុំ ពីប្រជាពលរដ្ឋ មានចំនួន១៧៦ករណី នៅក្នុងសំណើរសរុប ១៧៨ករណី ហើយសល់២ករណី កំពុងតែរៀបចំជូនពួកគាត់ ។
ទាក់ទិននឹងការណីយុទ្ធនាការត្រួតពិនិត្យ និងដោះស្រាយភាពមិនប្រក្រតី នៅតាមតុលាការ លោក កេង សុម៉ារិទ្ធ ក៏បានលើកឡើងថារយៈពេល១ឆ្នាំមកនេះ សំណុំរឿងនៅតាមសាលាដំបូង និងអយ្យការសាលាដំបូង នៅទូទាំងប្រទេស ទាំងសំណុំរឿងចាស់ និងថ្មី ទាំងសំណុំរឿងព្រហ្មទណ្ឌ និងសំណុំរឿងរដ្ឋប្បវេណី មានចំនួន២១៥,១៤១សំណុំរឿង។ នៅក្នុងចំនួនសំណុំរឿងនេះ តុលាការសាលាដំបូង និងអយ្យការសាលាដំបូង នៅទូទាំងប្រទេស បានចាត់ការសំណុំរឿងបានចំនួន១៧៨,៧៨៩សំណុំរឿង ស្មើ៨៣.១០% នៃសំណុំរឿងសរុប។ នៅក្នុងសំណុំរឿងទាំងអស់នេះ មានសំណុំរឿងព្រហ្មទណ្ឌ មានចំនួន ៩៤,៧៣២សំណុំរឿង ស្មើ៨៤.៨៥% នៃចំនួនសំណុំរឿងសរុប។ ចំពោះសំណុំរឿងរដ្ឋប្បវេណីសាលាដំបូង បានចាត់ការចំនួន៨៤,០៥៧សំណុំរឿង ស្មើ៨១.២១% នៃចំនួនសំណុំរឿងរដ្ឋប្បវេណីសរុប ៕
ចែករំលែកព័តមាននេះ