ខេត្តសៀមរាប ៖ សាលាដំបូងខេត្តសៀមរាប ១០ តុលា ២០២៤ បានសម្រេចចេញដីកាបង្គាប់ឱ្យចាប់ខ្លួន ស្ត្រីរូបស្រស់មួយរូប ពីបទគំរាមកំហែងហែកកេរ្តិ៍នៅលើបណ្តាញសង្គមហ្វេសប៊ុក ។…
ខេត្តសៀមរាប ៖ សាលាដំបូងខេត្តសៀមរាប ១០ តុលា ២០២៤ បានសម្រេចចេញដីកាបង្គាប់ឱ្យចាប់ខ្លួន ស្ត្រីរូបស្រស់មួយរូប ពីបទគំរាមកំហែងហែកកេរ្តិ៍នៅលើបណ្តាញសង្គមហ្វេសប៊ុក ។
តាមដីកាសាលាដំបូងខេត្តសៀមរាបបានបញ្ជាក់ថា ឈ្មោះ ចិន ស្រីដា ភេទស្រី អាយុ២៧ ឆ្នាំ ជនជាតិខ្មែរ មានទីលំនៅភូមិសាលាកន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប ប្រើប្រាស់គណនីហ្វេសបុកឈ្មោះ Vi Da (គេចខ្លួន) ត្រូវតុលាការបានចោទប្រកាន់ពីបទគំរាមកំហែងហែកកេរ្តិ៍ ប្រព្រឹត្តនៅលើបណ្តាញសង្គមហ្វេសប៊ុក កាលពីថ្ងៃទី១៨ ខែកុម្ភៈ ឆ្នាំ២០២៤ និងអំឡុងខែមីនា ឆ្នាំ២០២៤កន្លងមក បទល្មើសព្រហ្មទណ្ឌនេះ មានចែងឱ្យផ្តន្ទាទោសតាមបញ្ញត្តិមាត្រា ៣៧២ និងមាត្រា ៣៧៣ នៃក្រមព្រហ្មទណ្ឌ ។ សាលាដំបូងខេត្តសៀមរាបបានបញ្ជាក់ទៀតថា ជនត្រូវចោទត្រូវបានចោទ ប្រកាន់ពីបទមជ្ឈិម ដែលត្រូវផ្តន្ទាទោសដាក់ពន្ធនាគារ។
បើយោងតាមពាក្យបណ្ដឹងរបស់ដើមបណ្ដឹង ចុះថ្ងៃទី២២ ខែមីនា ឆ្នាំ២០២៤ បានបញ្ជាក់ថា នៅថ្ងៃទី១៨ ខែកុម្ភៈ ឆ្នាំ២០២៤ ឈ្មោះ ចិន ស្រីដា បានប្រើប្រាស់គណនីហ្វេសប៊ុករបស់គាត់ឈ្មោះ Vi Da ឆាតមកគម្រាមខ្ញុំបាទថា “ម៉េចហើយបងលុយបំណុលដែលប្រពន្ធបងជំពាក់ខ្ញុំ នឹងដោះស្រាយសងឱ្យខ្ញុំថ្ងៃណា បើមិនសងទេ ? ឬគេចវេសមិនព្រមសងឱ្យខ្ញុំ ប្រាប់មួយមាត់មក ស្រួលខ្ញុំដាក់ពាក្យបណ្ដឹង ហើយឱ្យសារព័ត៌មានរកដំណោះស្រាយតាមយុត្តិធម៌ឱ្យខ្ញុំ”វិញ ។
ពាក្យបណ្ដឹងបានបន្តទៀតថា ស្ត្រីរូបនេះ បានគំរាមទៀតថា ខ្ញុំមានទាំងសំឡេងនិយាយទូរស័ព្ទជាមួយប្រពន្ធរបស់បង វាខ្ចីលុយខ្ញុំបង្គ្រប់ឱ្យប្តីឡើងផ្កាយ១នៅខេត្តបន្ទាយមានជ័យទៀតផង បើបងនិងប្រពន្ធបងមិនព្រមដោះស្រាយរឿងលុយឱ្យខ្ញុំទេ ខ្ញុំដាក់ពាក្យបណ្ដឹងហើយផ្ញើសំឡេងឱ្យអ្នកសារព័ត៌មានជួយចុះផ្សាយ ពីរឿងប្រពន្ធលោកផ្កាយ១ខេត្ត បន្ទាយមានជ័យ ខ្ចីលុយគេឱ្យប្តីឡើងផ្កាយហើយគេចវេសមិនសង មិនចេញមុខដោះស្រាយ គឺអាចនឹងល្បីខ្លាំង ។
ក្នុងដីកាតុលាការបានកំណត់ថា ដើម្បីធានាដល់ការស៊ើបសួរស្វែងរកការពិត គប្បីសម្រេចចេញដីកាបង្គាប់ឱ្យចាប់ខ្លួនជនត្រូវចោទរូបនេះ យកមកកាន់តុលាការសាម៉ីជាបន្ទាន់ ។
តុលាការសម្រេចដូចខាងក្រោម ៖
១-បង្គាប់ទៅភ្នាក់ងារមានសមត្ថកិច្ចឱ្យចាប់ខ្លួនជនត្រូវចោទឈ្មោះ ចិន ស្រីដា ភេទស្រី អាយុ២៧ឆ្នាំ ជនជាតិខ្មែរ ដែលមានអត្តសញ្ញាណដូចបានរៀបរាប់ខាងលើនេះ មកប្រគល់ជូនតុលាការសាម៉ីចាត់ការតាមផ្លូវច្បាប់ ។
២-ក្នុងករណីមានកាលៈទេសៈ ដែលមិនអាចនាំជនត្រូវចោទមកជូនតុលាការសាម៉ីទាន់ពេលវេលា បង្គាប់ឱ្យប្រធានមន្ទីរឃុំឃាំងខេត្ត-រាជធានី ទទួលនិងឃុំខ្លួនឈ្មោះខាងលើ តាមដីកាបង្គាប់ឱ្យចាប់ខ្លួននេះ ។ បុគ្គលដែលបានឃុំខ្លួននេះ ត្រូវនាំមកបង្ហាញខ្លួនដល់ចៅក្រមស៊ើបសួរ ក្នុងរយៈពេលយ៉ាងខ្លីបំផុត ។
ជុំវិញករណីខាងលើនេះ កោះសន្តិភាពមិនអាចទាក់ទងសុំការបំភ្លឺពីលោកស្រី ចិន ស្រីដា នៅរសៀលថ្ងៃទី១៣ ខែមករា ឆ្នាំ២៩២៥នេះបានទេ ព្រោះគ្មានលេខទូរស័ព្ទសាកសួរ ៕
ចែករំលែកព័តមាននេះ