រាជធានីភ្នំពេញ ៖ អគ្គស្នងការនគរបាលជាតិបានសម្រេចបញ្ជូនខ្លួនខ្មាន់កាំភ្លើងជនជាតិថៃឈ្មោះ អេកាឡាក់ ផែណយ(Ekalak Paenoi) ដែលបានបាញ់សម្លាប់អតីតតំណាងរាស្ត្រគណបក្សសង្គ្រោះជាតិលោក លឹម គឹមយ៉ា ឱ្យទៅអាជ្ញាធរថៃ…
រាជធានីភ្នំពេញ ៖ អគ្គស្នងការនគរបាលជាតិបានសម្រេចបញ្ជូនខ្លួនខ្មាន់កាំភ្លើងជនជាតិថៃឈ្មោះ អេកាឡាក់ ផែណយ(Ekalak Paenoi) ដែលបានបាញ់សម្លាប់អតីតតំណាងរាស្ត្រគណបក្សសង្គ្រោះជាតិលោក លឹម គឹមយ៉ា ឱ្យទៅអាជ្ញាធរថៃ បន្ទាប់ពីមានសំណើភាគីថៃ ។ ចំណែកជនសង្ស័យ ជាជនជាតិខ្មែរឈ្មោះ ពេជ្រ គឹមស្រុិន ដែលតុលាការព្រហ្មទណ្ឌថៃ ចេញដីកាចាប់ខ្លួននោះ មិនទាន់ដឹងថា សមត្ថកិច្ចកម្ពុជាចាត់ការបែបណានៅឡើយទេ ។
សមត្ថកិច្ចកម្ពុជា ដែលបានប្រគល់ខ្មាន់កាំភ្លើងជនជាតិថៃឈ្មោះ អេកាឡាក់ ផែណយ (Ekalak Paenoi) ដែលធ្វើឃាតលោក លឹម គឹមយ៉ា នៅទីក្រុងបាងកក ត្រូវបានធ្វើឡើង នៅថ្ងៃទី១១ ខែមករា នៅច្រកព្រំដែនអន្តរជាតិប៉ោយប៉ែត ក្នុងខេត្តបន្ទាយមានជ័យ ក្រោយការចាប់ខ្លួន ជននេះនៅឃុំព្រៃស្វាយ ស្រុកមោងឫស្សី ខេត្តបាត់ដំបង កាលពីយប់ថ្ងៃទី៨ ខែមករា បន្ទាប់ពីខ្មាន់កាំភ្លើងរូបនេះ បានគេចខ្លួនចេញពីប្រទេសថៃចូលមកកម្ពុជា ។
ខ្មាន់កាំភ្លើងថាខ្លួនសារភាពត្រឹមស៊ីឈ្នួលសម្លាប់មនុស្សប៉ុណ្ណោះ
តាមក្រុមអ្នកសារព័ត៌មានបានព្យាយាមសាកសួរទៅកាន់ខ្មាន់កាំភ្លើងរកអត្តសញ្ញាណអ្នករួមគំនិត និងអ្នកពាក់ព័ន្ធខ្មាន់កាំភ្លើងបានឆ្លើយថា «រូបគេទទួលស្គាល់កំហុសត្រឹមតែជាអ្នកស៊ីឈ្នួលសម្លាប់ប៉ុណ្ណោះ» ទោះបីជាបែបណា ពាក្យថា ស៊ីឈ្នួលគឺពិតណាស់ថា ជននេះត្រូវតែសារភាពថា តើខ្លួនស៊ីឈ្នួលនរណា ?
ភ្លាមៗ ពេលជនជាប់ចោទត្រូវបានប្រគល់និងឈានជើងចូលដីថៃ នគរបាលថៃបានអានសេចក្ដីចោទប្រកាន់ និងដីកាចាប់ខ្លួនឱ្យខ្មាន់កាំភ្លើងស្ដាប់ ក្នុងបទចោទ «សម្លាប់មនុស្សដោយចេតនា និងគិតទុកជាមុន យកអាវុធទៅទីសាធារណៈដោយគ្មានហេតុផល និងបាញ់កាំភ្លើងដែលប្រើរំសេវផ្ទុះបង្កហេតុនៅទីសាធារណៈ» ។
ភ្ជាប់ជាមួយការចោទប្រកាន់នេះ ប៉ូលិសថៃបានប្រាប់ពីសិទ្ធិដល់ខ្មាន់កាំភ្លើង ចំពោះការផ្ដល់ចម្លើយ និងផ្ដល់សេវាមេធាវីតតាំងក្ដីនៅតុលាការ ។ ទោះជាយ៉ាងណាក្ដី ខ្មាន់កាំភ្លើងបានសារភាពដោយគ្មានភាពស្ទាក់ស្ទើរ ចំពោះបទចោទប្រកាន់ខាងលើគ្រប់យ៉ាង ដោយគ្មានការប្រកែកនោះឡើយ ។
ក្នុងនីតិវិធីបញ្ជូនខ្លួនទៅឱ្យអាជ្ញាធរថៃនេះ ខ្មាន់កាំភ្លើងហាក់មានការបារម្ភ និងបានស្នើសុំកិច្ចការពារសុវត្ថិភាពពីអាជ្ញាធរថៃ ទើបត្រូវបានពាក់អាវក្រោះ និងមួកការពារគ្រាប់កាំភ្លើង ធ្វើដំណើរតាមឧទ្ធម្ភាគចក្រ ដោយមានកងកម្លាំងតាមការពាររហូតដល់គោលដៅចុះចតនៅនាយកដ្ឋានអាកាសចរណ៍ប៉ូលិសនាទីក្រុងបាងកក ។ អាជ្ញាធរថៃ បានបញ្ជូនខ្មាន់កាំភ្លើងយកទៅអនុវត្តនីតិវិធីស៊ើបសួរ និងឃុំខ្លួននៅស្ថានីយប៉ូលិស ឆាណាក់ ស៊ុងក្រាម ក្នុងក្រុងបាងកក ។
តាមប្រភពព័ត៌មានកាសែតថៃថា ជំនួយការស្នងការនគរបាលភូមិន្ទថៃ លោក ស៊ុមប្រាក់ស៊ុង យិនធួម (Somprasong Yenthuam) ផ្ដល់បទសម្ភាសន៍ដល់ក្រុមអ្នកសារព័ត៌មាន បន្ទាប់ពីចុះពីលើឧទ្ធម្ភាគចក្រថា ខ្មាន់កាំភ្លើងមិនបាននិយាយអ្វីនោះទេ ដោយរូបគេបានបង្ហាញទឹកមុខតប់ប្រមល់ (ស្ត្រេស) ។
លោក ស៊ុមប្រាក់ស៊ុង បញ្ជាក់ថា ការប្រគល់ខ្លួនខ្មាន់កាំភ្លើង ពីសំណាក់អាជ្ញាធរកម្ពុជា លឿនជាងការកំណត់បែបនេះ គឺដោយសារអគ្គស្នងការនគរបាលភូមិន្ទថៃ បានរាយការណ៍ពីករណីឃាតកម្មលើអតីតតំណាងរាស្ត្របក្សប្រឆាំងកម្ពុជានេះ ទៅកាន់នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត់ (Paetongtarn Shinawatra) ដោយលើកឡើងពីផលប៉ះពាល់ធ្ងន់ធ្ងរចំពោះសុវត្ថិភាព និងសន្តិសុខនៅក្នុងប្រទេសថៃ ។
ចែករំលែកព័តមាននេះ