ខេត្តស្វាយរៀង ៖ មានករណីប្រជាពលរដ្ឋ​ប្រទះឃើញ​បុរសម្នាក់បើករថយន្តម៉ាកហាយឡែនឌ័រមួយគ្រឿង មកផ្លុងចោល នៅលើចិញ្ចើមផ្លូវជាតិលេខ១ ត្រង់ចំណុចខាងកើតរោងចក្រចម្ងាយប្រមាណជិត១០០​ម៉ែត្រ ស្ថិតនៅភូមិដើមពោធិ ឃុំកណ្តៀងរាយ ស្រុកស្វាយទាប រយៈពេល៤ទៅ៥ថ្ងៃមកហើយ មិនឃើញម្ចាស់​ត្រឡប់​មក​យកវិញទេ ។

បើតាមប្រជាពលរដ្ឋរស់នៅកន្លែងកើតហេតុខាងលើបានឲ្យដឹងថា ករណីគេបើករថយន្តមកទុកផ្លុងចោលនេះកើតឡើងនៅវេលាម៉ោងប្រហែលជា៩យប់ថ្ងៃទី៧មករា២០២៥ ។

តាមប្រភពបន្តថា គេឃើញបុរស់ម្នាក់បើករថយន្ត១គ្រឿង​ម៉ាក HIGHLANDER ពណ៌ទឹកប្រាក់ ពាក់ស្លាកលេខ ភ្នំពេញ 2AD-1033 យកមកទុក នៅលើចិញ្ចើមផ្លូវជាតិលេខ១ ត្រង់ចំណុចខាងកើតរោងចក្រចម្ងាយជិត១០០ម៉ែត្ររួចទៅបាត់មិនឃើញត្រឡប់មកយកវិញទេ ទើបរាយការណ៍ជូនសមត្ថកិច្ចឲ្យមកពិនិត្យមើលនិងប្រកាសរកម្ចាស់រថយន្ត ឲ្យមកទទួលរថយន្តត្រឡប់ទៅផ្ទះវិញ ឬបើមានម្ចាស់រថយន្តដែលមានលេខដូចខាងលើ បានបាត់រថយន្ត សូមឲ្យមកទំនាក់ទំនងជាមួយសមត្ថកិច្ចនៃអធិការនគបាលស្រុកស្វាយទាបដើម្បីយករថយន្តទៅវិញ ៕