ខេត្តស្ទឹងត្រែង ៖ ប្រភេទកូនឈើ កម្រ និងប្រណិត គ្រញូង, ធ្នង់, បេង ជាដើមមានចំនួនរាប់ម៉ឺនកូន ត្រូវបានបណ្ដុះនៅក្នុងថ្នាលបរិវេណផ្នែករដ្ឋបាលព្រៃឈើស្រុកថាឡាបរិវ៉ាត់…
ខេត្តស្ទឹងត្រែង ៖ ប្រភេទកូនឈើ កម្រ និងប្រណិត គ្រញូង, ធ្នង់, បេង ជាដើមមានចំនួនរាប់ម៉ឺនកូន ត្រូវបានបណ្ដុះនៅក្នុងថ្នាលបរិវេណផ្នែករដ្ឋបាលព្រៃឈើស្រុកថាឡាបរិវ៉ាត់ ដើម្បីត្រៀមចែកជូនទៅតាមតំបន់សហគមន៍ព្រៃឈើរិចរិល និងរងពីការកាប់បំផ្លាញខុសច្បាប់ ដើម្បីប្រែក្លាយតំបន់ទាំងនោះឱ្យទៅជាតំបន់ពណ៌បៃតងឡើងវិញ ។
បើតាមលោក ហ៊ុន សំអឿន នាយផ្នែករដ្ឋបាលព្រៃឈើស្រុកថាឡាបរិវ៉ាត់ បាននិយាយថា កាលឆ្នាំ២០២៤ មន្ត្រីជំនាញ នៃផ្នែករដ្ឋបាលព្រៃឈើថាឡាបរិវ៉ាត់ បានរៀបចំថ្នាលបណ្តុះកូនឈើមានទទឹងប្រវែង ១០ម៉ែត្រ និងបណ្តោយ ២០ម៉ែត្រ ដែលអាចបណ្តុះកូនឈើបានចំនួន១៧.០០០កូន រួមមានកូនឈើគ្រញូង, បេង, ធ្នង់, ឈើទាល និងកកោះ។ ហើយបច្ចុប្បន្នកូនឈើពូជទាំងនោះ ត្រូវបានមើលថែ ដោយយកចិត្តទុលដាក់ពីមន្ត្រីជំនាញ និងកំពុងមានការលូតលាស់ល្អផងដែរ ។
លោកនាយផ្នែករដ្ឋបាលព្រៃឈើថាឡាបរិវ៉ាត់ បានបញ្ជាក់ថា នៅឆ្នាំ២០២៥នេះ កូនឈើ៨ពាន់ដើម បានត្រៀមលក្ខណៈរួចជាស្រេចហើយ ដើម្បីចែកជូននៅតាមតំបន់សហគមន៍ព្រៃឈើរិចរិល និងតំបន់ ដែលបានដកហូតពីការកាប់បំផ្លាញព្រៃឈើខុសច្បាប់ ។ ហើយសម្រាប់ឆ្នាំ២០២៥នេះជាដំបូងមានព្រៃសហគមន៍ ចំនួន២កន្លែង ដែលជាប់ជាអតិភាព ដើម្បីទទួលយកពូជកូនឈើទៅដាំ គឺសហគមន៍ព្រៃឈើព្រៃតាម៉ៅស្ថិតនៅឃុំកាំងចាម ស្រុកថាឡាបរិវ៉ាត់ និងសហគមន៍ព្រៃឈើព្រៃតាគង់ នៅភូមិច្រប់ឃុំក្បាលរមាស ស្រុកសេសាន ស្ថិតក្នុងគម្រោងរេដបូកមេគង្គ ជំហានទី១ខេត្តស្ទឹងត្រែង ដែលមានប្រភពថវិកា បានមកពីអង្គការ AfoCo ប្រទេសកូរ៉េ ដោយមានការ សម្របសម្រួលពីរដ្ឋបាលព្រៃឈើថ្នាក់កណ្តាល ។ហើយជាមួយនោះ ក៏មានការគាំទ្រដៃគូជាមួយខាងអង្គការសេប៉ា ប្រចាំខេត្តស្ទឹងត្រែង ផងដែរ ។ គម្រោងទាំងនេះ ខណ្ឌរដ្ឋបាលព្រៃឈើចំណុះឲ្យមន្ទីរកសិកម្ម រុក្ខាប្រមាញ់ និងនេសាទ បានផ្ដោតសំខាន់ក្នុងការស្តារព្រៃឈើ ដែលបាត់បង់ទៅ ឱ្យប្រែក្លាយទៅជាគម្របព្រៃពណ៌បៃតងឡើងវិញ ។
លោក ហ៊ុន សំអឿន មានក្តីរំពឹងថា ក្រោយពីការបណ្ដុះកូនឈើ សម្រេចជាលទ្ធផលបានជោគជ័យល្អ ហើយការដាំដុះស្តារព្រៃឈើឡើងវិញ នៅក្នុងគម្រោងរេដបូកមេគង្គ ជំហានទី១ ខេត្តស្ទឹងត្រែង នឹងទទួលបានលទ្ធផលល្អ និងអាចបន្តខិតខំអនុវត្តជំហានបន្តបន្ទាប់ថែមទៀត ។
ពិតណាស់ព្រៃឈើ បានផ្តល់ផលប្រយោជន៍ជាច្រើន គឺជួយទប់ស្កាត់ការបម្រែបម្រួលអាអាសធាតុនៅលើផែនដី ការទាញយកកាបូន ស្រូបយកជាតិពុលបញ្ចេញឧស៊ីហ្សែន និងការផ្តល់ជាម្លប់ដល់មនុស្ស សត្វ ។ អាចជួយទប់ស្កាត់ការហូរច្រោះបាក់ដីពីគ្រោះធម្មជាតិ និងជួយបង្កើតជីជាតិ លើស្រទាប់ដីយ៉ាងល្អផងដែរ ។
លោកបានបញ្ជាក់ជាចុងក្រោយថា សម្រាប់ឆ្នាំ២០២៥ ផ្នែករដ្ឋបាលព្រៃឈើថាឡាបរិវ៉ាត់ គ្រោងដាំកូនឈើចំនួន៨,០០០កូន លើផ្ទៃដី២០ហិកតានិងនៅឆ្នាំ២០២៦ គ្រោងដាំចំនួន២ពាន់កូន លើផ្ទៃដី១០ហិកតាបន្ថែមទៀត។ ចំណែកកូនឈើ ដែលសេសសល់ផ្សេងទៀត រដ្ឋបាលព្រៃឈើមានគម្រោងចែកជូនទៅដល់ស្ថាប័ន អង្គភាព មន្ត្រីរាជការ សាលារៀន វត្តអារាម និងតាមដងផ្លូវទីផ្សារធារណៈ ព្រមទាំងចែកជូនទៅប្រជាពលរដ្ឋដើម្បីដាំដុះជាម្លប់ជាប្រយោជន៍ផងដែរ ៕
ចែករំលែកព័តមាននេះ