ទីក្រុងម៉ានីឡា៖ ហ្វ៊ីលីពីនបញ្ជាក់ជំហរតាមរយៈរដ្ឋមន្ត្រីរបស់ខ្លួនជាមួយអ្នកសារព័ត៌មាន។ លោករដ្ឋមន្ត្រីអឹនរីក ម៉ាណាឡូ (Enrique Manalo) ថ្លែងថារដ្ឋាភិបាលរបស់លោកចង់ពិភាក្សា និងដោះស្រាយជម្លោះរវាងហ្វ៊ីលីពីន និងចិនតាមមធ្យោបាយការទូត។ ប៉ុន្តែលោកថាហ្វ៊ីលីពីនមិនធ្វើសម្បទាននៅក្នុងការចរចាដើម្បីធ្វើឱ្យខាតបង់ប្រយោជន៍ជាតិរបស់ខ្លួនជាដាច់ខាត។…
ទីក្រុងម៉ានីឡា៖ ហ្វ៊ីលីពីនបញ្ជាក់ជំហរតាមរយៈរដ្ឋមន្ត្រីរបស់ខ្លួនជាមួយអ្នកសារព័ត៌មាន។ លោករដ្ឋមន្ត្រីអឹនរីក ម៉ាណាឡូ (Enrique Manalo) ថ្លែងថារដ្ឋាភិបាលរបស់លោកចង់ពិភាក្សា និងដោះស្រាយជម្លោះរវាងហ្វ៊ីលីពីន និងចិនតាមមធ្យោបាយការទូត។ ប៉ុន្តែលោកថាហ្វ៊ីលីពីនមិនធ្វើសម្បទាននៅក្នុងការចរចាដើម្បីធ្វើឱ្យខាតបង់ប្រយោជន៍ជាតិរបស់ខ្លួនជាដាច់ខាត។
ការថ្លែងដូច្នេះនៅពេលទំនាក់ទំនងរវាងប្រទេសទាំង២ចាប់ផ្ដើមល្អក់កករនឹងគ្នាកាន់តែខ្លាំងពាក់ព័ន្ធនឹងជម្លោះបូរណភាពទឹកដី។ ភាគីទាំង២ក៏ប៉ះទង្គិចគ្នាជាហូរហែរវាងឆ្មាំសមុទ្រចិន និងទូកដឹកជញ្ជូនឥវ៉ាន់របស់ហ្វ៊ីលីពីនទៅឱ្យគ្នារបស់គេប្រចាំនៅកណ្ដាលសមុទ្រ។ ហ្វ៊ីលីពីនចោទថាចិនចូលចិត្តប្រើហិង្សា រីឯចិនចោទថាហ្វ៊ីលីពីនបន្តជ្រៀតចូលក្នុងដែនទឹករបស់ចិន។
រឿងនេះគ្មានពាក់ព័ន្ធនឹងអាមេរិកទេ
នៅក្នុងជម្លោះចិន-ហ្វ៊ីលីពីន ទីក្រុងប៉េកាំងសម្លឹងឃើញថានេះជា «សង្គ្រាមខ្ចីដៃ»។ មានន័យថាជម្លោះពិតប្រាកដគឺរវាងចិន និងអាមេរិក។ គ្រាន់តែថាអាមេរិកខ្ចីដៃហ្វ៊ីលីពីនដើម្បីប្រើប្រាស់។ ប៉ុន្តែប្រមុខការទូតហ្វ៊ីលីពីនថ្លែងថារឿងនេះមិនពាក់ព័ន្ធនឹងអាមេរិកទេ។ ហ្វ៊ីលីពីនខិតខំការពារសិទ្ធិអធិបតេយ្យភាពនៅលើតំបន់សេដ្ឋកិច្ចផ្ដាច់មុខរបស់ខ្លួនស្របទៅតាមផ្លូវច្បាប់។
ទន្ទឹមនឹងនោះ ហ្វ៊ីលីពីន និងអាមេរិកជាសម្ព័ន្ធមិត្តនឹងគ្នាជាយូរមកហើយ ហើយបានចុះហត្ថលេខាលើសន្ធិសញ្ញាការពារសន្តិសុខជាតិគ្នាទៅវិញទៅមក។ កាលពីសប្ដាហ៍មុន ហ្វ៊ីលីពីនប្រកាសអំពីគម្រោងទិញប្រព័ន្ធមីស៊ីលម៉ាកថាយហ្វុនរបស់អាមេរិក (Typhon)។ ប្រទេសចិនរិះគន់ខ្លាំងៗ និងចាត់ទុកថាជាការញុះញង់ឱ្យមានការរត់ប្រណាំងសព្វាវុធនៅក្នុងតំបន់។
មុននឹងហ្វ៊ីលីពីនទទួលបានមីស៊ីលទាំងនេះត្រូវការពេលយ៉ាងតិច២ឆ្នាំទៅមុខទៀត។ ហ្វ៊ីលីពីនថ្លែងថាខ្លួនមិនចង់បានសង្គ្រាមទេ។ ខ្លួនទិញមីស៊ីលនេះគ្រាន់តែដើម្បីធ្វើទំនើបកម្មវិស័យការពារជាតិតែប៉ុណ្ណោះ។ យើងគាំទ្រការរក្សាសន្តិភាពនៅក្នុងតំបន់។ ដូច្នេះ រាល់ការធ្វើទំនើបកម្មយោធា ឬគ្រឿងសម្ភារៈសឹកគ្រាន់តែដើម្បីពង្រឹងសមត្ថភាពរបស់យើងតែប៉ុណ្ណោះ។
ទំនាក់ទំនងហ្វ៊ីលីពីន-អាមេរិកនៅតែរឹងមាំនៅក្នុងសម័យកាលលោកត្រាំ
រដ្ឋមន្ត្រីការបរទេសហ្វ៊ីលីពីនសង្ឃឹមថាទំនាក់ទំនងជាមួយអាមេរិកនៅតែរឹងមាំជានិច្ចនៅក្នុងសម័យកាលរបស់លោកត្រាំ។ ប្រធានាធិបតីហ្វ៊ីលីពីន លោកម៉ាកូស បានហៅទូរស័ព្ទទៅលោកត្រាំកាលពីខែវិច្ឆិកាដើម្បីអបអរសាទរការទទួលជ័យជម្នះនៅក្នុងការបោះឆ្នោត។ កាលនោះ ថ្នាក់ដឹកនាំទាំង២បានពិភាក្សាគ្នាអំពីការពង្រឹងសម្ព័ន្ធភាពឱ្យកាន់តែរឹងមាំបន្ថែមទៀត។
កិច្ចសហការមិនមែនត្រឹមតែវិស័យយោធា និងការពារជាតិទេ ប៉ុន្តែរួមទាំងវិស័យសេដ្ឋកិច្ច និងឯកជនផងដែរ។ កាលពីអាណត្តិទី១របស់លោកត្រាំពីឆ្នាំ២០១៧-២០២១ ប្រទេសទាំង២ពង្រឹងទំនាក់ទំនងនឹងគ្នាយ៉ាងខ្លាំង។ លោកត្រាំជាមនុស្សមិនប្រកាន់ច្រើនអំពីលទ្ធិប្រជាធិបតេយ្យ ឬសិទ្ធិមនុស្សទេ។ ទោះបីមេដឹកនាំផ្ដាច់ការ ឬបុរសខ្លាំងដូចលោកគីមជុងអ៊ុនក៏លោកអាចសេពគប់ជាមួយបានដែរ។ អតីតប្រធានាធិបតីហ្វ៊ីលីពីន លោកឌូតឺតេ ត្រូវលោកត្រាំកោតសរសើរមិនដាច់ពីមាត់៕
ចែករំលែកព័តមាននេះ