រាជធានីភ្នំពេញ ៖ ក្រុមកីឡាបាល់ទាត់ព្រះខ័នរាជស្វាយរៀង បានត្រឹមខកចិត្តរបូត៣ពិន្ទុក្នុងដី ក្រោយចាញ់ក្រុមជើងខ្លាំងមកពីឥណ្ឌូណេស៊ី PSM Makassar នៅពុហកីឡដ្ឋានជាតិ (អូឡាំពិក) ដោយលទ្ធផល ០ទល់នឹង១ នៅប្រកួតទី៣របស់ខ្លួន វគ្គសន្សំពិន្ទុពូល A ពានរង្វាន់ ASEAN Club Championship Shopee Cup 2024-25 កាលពីយប់ថ្ងៃទី៨ ខែមករា ឆ្នាំ២០២៥។

ជ័យជម្នះរបស់ក្រុមភ្ញៀវ PSM Makassar សម្រេចបានដោយខ្សែប្រយុទ្ធសញ្ជាតិស្លូវេនី Nermin Haljeta តាំងពីនាទីទី១ នៃការប្រកួត។ ចំណែកការប្រកួតគូផ្សេងទៀតក្នុងពូល A ម្ចាស់ផ្ទះ Shan United ចាញ់ក្រុមភ្ញៀវ Terengganu លទ្ធផល ០ទល់នឹង៥ ស្របពេលម្ចាស់ផ្ទះ BG Pathum United បានត្រឹមស្មើក្រុមភ្ញៀវ Dong A Thanh Hoa លទ្ធផល ១ទល់នឹង១។

ព្រះខ័នរាជស្វាយរៀង (កម្ពុជា) ស្ថិតក្នុងពូល A ជាមួយក្រុម PSM Makassar (ឥណ្ឌូណេស៊ី), BG Pathum United (ថៃ), Dong A Thanh Hoa (វៀតណាម), Terengganu (ម៉ាឡេស៊ី) និង Shan United (មីយ៉ាន់ម៉ា)។ ឆ្លងកាត់៣ប្រកួតកន្លងមក PSM Makassar បន្តឈរកំពូលតារាងមាន៧ពិន្ទុ តាមពីក្រោយដោយ Dong A Thanh Hoa និង BG Pathum មាន៥ពិន្ទុ។ ចំណែក Terengganu ឈរនៅលេខ៤ មាន៤ពិន្ទុ ព្រះខ័នរាជស្វាយរៀងឈរនៅលេខ៥ មាន៣ពិន្ទុ និង Shan United នៅបាតតារាងគ្មានពិន្ទុរាប់។

ការប្រកួតបន្ទាប់ ដែលជាប្រកួតទី៤ ក្នុងពូល A ធ្វើឡើងនៅថ្ងៃទី២២ ខែមករា ៖
-Dong A Thanh Hoa ប៉ះ ព្រះខ័នរាជស្វាយរៀង នៅកីឡដ្ឋាន Thanh Hoa ម៉ោង ០៦:០០នាទីល្ងាច
-Shan United ប៉ះ BG Pathum United នៅកីឡដ្ឋាន Thuwunna ម៉ោង ០៧:០០នាទីយប់
-Terengganu ប៉ះ PSM Makassar នៅកីឡដ្ឋាន Sultan Mizan Zainal Abidin ម៉ោង ០៨:០០នាទីយប់៕ រូបភាព ៖ Preah Khan Reach Svay Rieng FC និង ASEAN United FC