រាជធានីភ្នំពេញ ៖ ក្មេងស្រីជាសិស្សសាលា បានបើកម៉ូតូមួយគ្រឿង បានជ្រុលចង្កូតបុកចូលអាហារដ្ឋាន យីហា«វោហាតារាសាច់អាំង ស៊ុប និងគុយទាវ» បណ្តាឲ្យម្ចាស់ហាង និងអ្នកលក់បន្លែ…
រាជធានីភ្នំពេញ ៖ ក្មេងស្រីជាសិស្សសាលា បានបើកម៉ូតូមួយគ្រឿង បានជ្រុលចង្កូតបុកចូលអាហារដ្ឋាន យីហា«វោហាតារាសាច់អាំង ស៊ុប និងគុយទាវ» បណ្តាឲ្យម្ចាស់ហាង និងអ្នកលក់បន្លែ រងរបួសធ្ងន់ ចំណែកក្មេងស្រី២នាក់ ដែលជាអ្នកជិះ និងអ្នកបើកម៉ូតូ ក៏បានរងរបួសផងដែរ ។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង២និង២០នាទីរសៀលថ្ងៃទី៨ ខែមករា ឆ្នាំ២០២៥ នៅតាមផ្លូវបេតុង ក្នុងភូមិអណ្ដូង សង្កាត់គោករកា ខណ្ឌព្រែកព្នៅ រាជធានីភ្នំពេញ ។
អ្នករងរបួស ដែលជាម្ចាស់ហាងគុយទាវ មានឈ្មោះ វ៉ា ស្រីម៉ិច ភេទស្រី អាយុ៣៥ឆ្នាំ បានរងរបួសដៃជើងធ្ងន់ធ្ងរ ។ ចំណែកអ្នកលក់បន្លែ ឈ្មោះ វ៉ា លីជួន ភេទប្រុស អាយុ២៤ឆ្នាំ រងរបួសជើង ទ្រូងសន្លប់ដេកស្ដូកស្ដឹង ត្រូវបានបញ្ជូនទៅសង្គ្រោះ ។
តាមសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គេឃើញម៉ូតូ ម៉ាកហុងដាឌ្រីមសេ១២៥ មួយគ្រឿង ពណ៌ខ្មៅ ពាក់ស្លាកលេខ ភ្នំពេញ1IP-6092 ជិះគ្នា៣នាក់ (ស្រី២ ប្រុសម្នាក់) ធ្វើដំណើរតាមផ្លូវបេតុង ក្នុងទិសដៅ ពីត្បូងទៅជើង នៅពេលធ្វើដំណើរមកដល់ចំណុចកើតហេតុ ដែលជាចំណុចផ្លូវកោង ក៏ជ្រុលទៅបុកចូលហាងគុយទាវខាងលើ បណ្ដាលឲ្យអ្នកលក់បន្លែ និងម្ចាស់ហាង បានរងរបួស ហើយម៉ូតូបានជ្រុលទៅបោកនឹងទូលក់គុយទាវ និងប៉ះម៉ូតូធូដេ មួយគ្រឿងទៀត បណ្ដាឲ្យរងការខូចខាត ។
ដោយឡែកអ្នកបើកបរម៉ូតូមានឈ្មោះ រ៉េត លីហ្សា ភេទស្រី អាយុ១៥ឆ្នាំ និងរួមដំណើរម្នាក់ ឈ្មោះ ស្រី ក្រិច ភេទស្រី អាយុ១៥ឆ្នាំ ជាសិស្សទី៦ បានរងរបួសដៃ និងក្បាល (ប្រុសម្នាក់ទៀតមិនស្គាល់ឈ្មោះ)។ បន្ទាប់ពីកើតហេតុ អ្នករងរបួសជាម្ចាស់ហាង និងអ្នកលក់បន្លែ ត្រូវបានបញ្ជូនទៅសង្គ្រោះនៅមន្ទីរពេទ្យ ។ ចំណែកអ្នកបើកបរ ដែលរងរបួស ត្រូវបានម្ចាស់ហាងគុយទាវ ឃាត់ទុក ហើយទាក់ទងទៅអាណាព្យាបាល ឲ្យមកជួបដោះស្រាយ សងសំណងការខូចខាតនិងចេញថ្លៃព្យាបាលរបួស ៕
ចែករំលែកព័តមាននេះ