រាជធានីភ្នំពេញ ៖ គ្រោះថ្នាក់ចរាចរណ៍មួយបានកើតឡើងកាលពីវេលាម៉ោង២រំលងអធ្រាត្រឈានចូលថ្ងៃទី២៥ មិថុនា បណ្តាលឱ្យមានការផ្ទុះអាវុធជាច្រើនគ្រាប់ធ្វើឱ្យភាគីម្ខាងត្រូវរបួសជើងខាងឆ្វេង១គ្រាប់។
ហេតុការណ៍នោះត្រូវបានគេដឹងថា មានរថយន្តម៉ាកឡង់គ្រីស្ស័រ ពណ៌ស្ករ ពាក់ស្លាកលេខ ខេមរភូមិន្ទ 2-6279 ចង្កូតស្តាំ ជិះគ្នា២នាក់ គឺម្នាក់លោក វ៉ា គឹមចាន់ពិសី អាយុ២៤ឆ្នាំ ជាមន្រ្តីនគរបាលក្រសួងមហាផ្ទៃ និងមានមុខរបរបើកកន្លែងលាងរថយន្តឈ្មោះពិសី ស្ថិតនៅក្បែរស្តង់បុរីកីឡាសង្កាត់វាលវង់ ខណ្ឌ៧មករា និងម្នាក់ទៀតគឺលោកសុង ង៉ ភេទប្រុស អាយុ៣៧ឆ្នាំ ត្រូវជាមិត្តភក្តិ។ រថយន្តម៉ាកឡង់គ្រីស្ស័រ នោះបានបើកទៅឈប់មុខផ្ទះទំនងជាដាក់មនុស្សចុះម្នាក់ ប៉ុន្តែរៀបបើកទ្វាររថយន្តចុះ ត្រូវរថយន្តម៉ាកឡិចស៊ីសកូនកាត់ RX300 ពណ៌ខ្មៅ បើកបរដោយយុវជនតុល រ៉ាឌី អាយុ២២ឆ្នាំ មានមិត្តភក្តិរួមដំណើរប្រមាណ៤ទៅ៥នាក់ បានបើកទៅប៉ះទ្វាររថយន្តម៉ាកឡង់គ្រីស្ស័រ។
ភ្លាមនោះរថយន្តឡិចស៊ីសកូនកាត់ ដែលប៉ះរថយន្តឡង់គ្រីស្ស័រមិនបានឈប់ទេ គឺបើកជ្រុលទៅមុខបន្តិច។ បន្ទាប់ពីរថយន្តឡិចស៊ីសបានឈប់លោកសុង ងឺ ភាគីខាងរថយន្តឡង់គ្រីស្ស័រ បានចុះពីរថយន្ត ទៅសួរភាគីម្ខាងទៀតនោះ ទើបកើតមានការឈ្លោះប្រកែកគ្នា និងឈានដល់ការវាយតប់ បណ្តាលឱ្យលោកសុខ ងឺ ត្រូវភាគីម្ខាងវាយឱ្យដេកដួលនៅដី និងបាក់ជើងម្ខាងងើបលែងរួច។ ឃើញដូច្នោះក្នុងនាមមិត្តភក្តិរួមដំណើរជាមួយ លោកវ៉ា គឹមចាន់ពិសី បានស្រែកប្រាប់អ្នកនៅផ្ទះឱ្យយកកាំភ្លើងខ្លីឱ្យគេដើម្បីជួយធ្វើអន្តរាគមន៍មិត្តក្នុងគ្រាអាសន្ន។ ពេលបានកាំភ្លើងនៅដៃហើយបានប្រើសិទ្ធបាញ់ការពារខ្លួន និងជួយរំដោះសុខ ងឺ គេក៏បាញ់ឡើងលើជាច្រើនគ្រាប់ ប៉ុន្តែភាគីម្ខាងនៅមិនដកថយ ពេលនោះបានបាញ់ភ្ជុចដីថែមទៀត ស្រាប់តែត្រូវនគរបាលដែនដីមកឃាត់ខ្លួន។ ក្រោយពីមានការផ្ទុះអាវុធទើបដឹងថា លោកតុល រ៉ាឌី ភាគីម្ខាងរងរបួសដោយគ្រាប់កាំភ្លើងរបស់លោកវ៉ា គឹមចាន់ពិសី។
នៅអធិការដ្ឋាននគរបាលខណ្ឌ៧មករា លោកវ៉ាគឹមចាន់ពិសី បានសារភាពថា លោកពិតជាបានបាញ់មែន ដើម្បីការពារខ្លួនផង និងមិត្តភក្តិត្រូវភាគីម្ខាងរំលោភផង តែគ្មានបំណងបាញ់ឱ្យស្លាប់ ឬរងរបួសនោះទេ។ វ៉ា គឹមចាន់ពិសី អះអាងថា ពេលបាញ់បើដឹងថា ភាគីម្ខាងនោះរងគ្រោះម៉្លេះមិនបាននៅឱ្យសមត្ថកិច្ចចាប់ខ្លួនទេ។ គោលបំណងបាញ់ឡើងលើជាការគំរាម កុំឱ្យភាគីម្ខាងវាយមិត្តភក្តិ និងខ្លួនតែប៉ុណ្ណោះ។ ទោះជាយ៉ាងណា អំពើដែលភាគីលោកវ៉ា គឹមចាន់ពិសី ធ្វើនេះ ពិតជាខុសច្បាប់ហើយ ព្រោះទំនាស់រឿងគ្រោះថ្នាក់ចរាចរណ៍សោះធ្វើឱ្យផ្ទុះអាវុធ របួសស្នាមដល់អ្នកដទៃ។ នៅអធិការដ្ឋាននគរបាល ខណ្ឌ៧មករា ភាគីលោកវ៉ា គឹមចាន់ពិសី បានយកប្រាក់ចំនួន១.៦០០ដុល្លារ ទៅជួយសង្គ្រោះលោកតុល រ៉ាឌី ដើម្បីពន្លត់បណ្តឹងរដ្ឋប្បវេណី។ ប៉ុន្តែបើទោះសំណងនោះបានសងដល់ដៃភាគីរងគ្រោះក៏ដោយ ក៏លោកវ៉ា គឹមចាន់ពិសី ត្រូវបានសមត្ថ កិច្ចនគរបាលខណ្ឌ៧មករាឃាត់ខ្លួន និងកសាងសំណុំរឿងទៅតាមនីតិវិធីដែរ៕
ចែករំលែកព័តមាននេះ