រាជធានីភ្នំពេញ ៖ ក្រុមការងារដ្ឋបាលខណ្ឌកំបូល ដឹកនាំដោយលោក គន់ ចាន់សុភារី អភិបាលរងខណ្ឌ បានចុះទៅផ្អាកការសាងសង់សំណង់អាគាររោងចក្រ សម្រាប់ជួលមួយកន្លែង ដោយអះអាងថា…
រាជធានីភ្នំពេញ ៖ ក្រុមការងារដ្ឋបាលខណ្ឌកំបូល ដឹកនាំដោយលោក គន់ ចាន់សុភារី អភិបាលរងខណ្ឌ បានចុះទៅផ្អាកការសាងសង់សំណង់អាគាររោងចក្រ សម្រាប់ជួលមួយកន្លែង ដោយអះអាងថា អត់ច្បាប់អនុញ្ញាតសាងសង់ និងបានចុះណែនាំ ២លើកហើយ ប៉ុន្តែម្ចាស់ទីតាំងមិនស្ដាប់។ លុះលើកទី៣ ក៏បានអនុវត្តន៍វិធានការរដ្ឋបាល ដកហូតយកសម្ភារៈសំណង់មួយចំនួន ដើម្បីយកទៅកាន់សាលាខណ្ឌ ស្រាប់តែម្ចាស់ទីតាំងខាងលើ យករថយន្ត១គ្រឿង ទៅឈប់ពាំងផ្លូវមិនឲ្យក្រុមការងារបើករថយន្តដឹកសម្ភារៈ ចេញពីទីតាំងរបស់ខ្លួនឡើយ ដោយម្ចាស់ទីតាំងបានអះអាងថា មានច្បាប់អនុញ្ញាតសាងសង់ពីក្រសួងរៀបចំដែនដី នគរូបនីយកម្ម និងសំណង់ ហើយបើទោះជាខំបង្ហាញឲ្យមើលរួចហើយ ក្ដីក៏អាជ្ញាធរនៅតែហាមឃាត់មិនឲ្យសាងសង់ទៀត។ ខណៈនោះ ម្ចាស់ទីតាំង ក៏បានទារសំណងជាង១លានរៀល ពីអាជ្ញាធរផងដែរ ដោយគាត់ចោទថា អាជ្ញាធរបានចុះទៅផ្អាកក្រុមជាងរបស់គាត់ជិត៤០នាក់ ធ្វើឲ្យខកខានមិនបានធ្វើការកន្លះថ្ងៃ ហើយគាត់ខាតថ្លៃឈ្នួលជាងអស់ជាង១លានរៀល ទទេៗ ។
ហេតុការណ៍នោះ បានកើតឡើងកាលពីវេលាម៉ោង២និង៣០នាទីរសៀលថ្ងៃទី០៦ ខែមករា ឆ្នាំ២០២៥ នៅក្នុងទីតាំងការដ្ឋានសំណង់ខាងលើ ស្ថិតនៅក្នុងភូមិកប់អំបិល សង្កាត់កំបូល ខណ្ឌកំបូល រាជធានីភ្នំពេញ ។
បើតាមក្រុមការងាររដ្ឋបាលខណ្ឌកំបូល បានប្រាប់ថា ម្ចាស់ទីតាំងសំណង់ខាងលើនោះឈ្មោះ ឈួន គឹមស្រៀង ភេទស្រី អាយុ៣៩ឆ្នាំ មានទីលំនៅភូមិតាភេម សង្កាត់កំបូល ខណ្ឌកំបូល រាជធានីភ្នំពេញ។ គាត់ពុំទាន់មានច្បាប់អនុញ្ញាតឲ្យសាងសង់សំណង់អគាររោងចក្រខាងលើនោះទេ គឺមានតែពាក្យស្នើសុំលិខិតអនុញ្ញាតសាងសង់ ដែលគាត់បានដាក់ចូលទៅកាន់ក្រសួងរៀបចំដែនដី នគរូបនីយកម្ម និងសំណង់ប៉ុណ្ណោះ ហើយក្រសួងនៅមិនទាន់ចេញលិខិតអនុញ្ញាតឲ្យសាងសង់នៅឡើយ ប៉ុន្តែគាត់នៅតែសាងសង់ ។
ក្រុមការងារខាងលើ បាននិយាយទៀតថា កន្លងមកក្រុមការងាររដ្ឋបាលខណ្ឌកំបូល បានចុះទៅត្រួតពិនិត្យ និងសួររកច្បាប់សាងសង់ចំនួន២លើករួចមកហើយ ពេលនោះម្ចាស់ទីតាំងរូបនេះ គ្រាន់តែប្រាប់ថា មានច្បាប់ ប៉ុន្តែមិនបានយកច្បាប់មកបង្ហាញឲ្យមើលនោះទេ ។ ពេលនោះក្រុមការងារក៏បានផ្អាកការសាងសង់ជាបណ្ដោះអាសន្ន និងណែនាំឲ្យឲ្យគាត់រៀបចំបែបបទសុំច្បាប់ទៅក្រសួងរៀបចំដែនដីនគរូបនីយកម្ម និងសំណង់ឲ្យបានរួចរាល់ជាមុនសិន ទើបអាចសាងសង់បាន ប៉ុន្តែគាត់មិនសហការនោះទេ នៅតែបន្តការសាងសង់ទាំងគ្មានច្បាប់ទៀត ទើបក្រុមការងាររដ្ឋបាលខណ្ឌ បានចុះផ្អាកជាលើកទី៣ទៀត និងបានអនុវត្តន៍វិធានការរដ្ឋបាលដកហូតសម្ភារៈជាងមួយចំនួន ដើម្បីយកទៅរក្សាទុកនៅសាលាខណ្ឌ ហើយដរាបណា គាត់ទទួលបានលិខិតអនុញ្ញាតច្បាប់សាងសង់នោះ ទើបខណ្ឌប្រគល់សម្ភារៈនោះជូនគាត់វិញ ។
ប្រភពដដែល បានប្រាប់ទៀតថា ពេលនោះម្ចាស់ទីតាំង ពុំបានចូលរួមសហការអនុវត្តន៍តាមការណែនាំរបស់រដ្ឋបាលខណ្ឌឡើយ ថែមទាំងយករថយន្តទៅបិទផ្លូវ មិនឲ្យរថយន្តគណៈបញ្ជាការឯកភាពខណ្ឌ និងរថយន្តរដ្ឋបាលខណ្ឌចេញពីទីតាំងនោះឡើយ។ ជាជម្រើចុងក្រោយក្រុមការងាររដ្ឋបាលខណ្ឌ បានសម្រេចទុករថយន្ត ដែលមានស្លាកលេខចង្កូតស្ដាំ PP-1829 មួយគ្រឿង នៅក្នុងទីតាំងសំណង់នោះ ហើយរាល់ការខូចខាត និងបាត់បង់ដោយប្រការណាមួយនោះ គឺជាការទទួលខុសត្រូវរបស់ម្ចាស់ទីតាំងខាងលើនោះ ។
ដោយឡែក ស្ត្រីជាម្ចាស់ទីតាំងសំណង់ខាងលើនោះ បាននិយាយថា គាត់បានសាងសង់អគារនេះ ដើម្បីទុកជួលបើករោងចក្រ ហើយសាងសង់បានរយៈពេល៧សប្ដាហ៍កន្លងមកហើយ ដោយគាត់មិនបានសុំច្បាប់សាងសង់ នៅសាលាខណ្ឌកំបូលនោះទេ។ មូលហេតុ គឺសំណង់ដែលគាត់សង់នេះ មានទំហំរហូតដល់ទៅ៥,០០០ម៉ែត្រការ៉េ ដែលតាមច្បាប់ គឺវាបានហួសពីដែនគ្រប់គ្រងរបស់អាជ្ញាធរខណ្ឌទៅហើយ ដោយឡែកអាជ្ញាធរខណ្ឌគ្រប់គ្រងបានត្រឹមតែទំហំ៥០០ម៉ែត្រការ៉េ ប៉ុណ្ណោះ ។
គាត់បានរៀបរាប់ប្រាប់បន្តទៀតថា ដោយសារតែបែបនេះហើយ ទើបគាត់អត់សុំច្បាប់សាលាខណ្ឌ ហើយបានទៅសុំច្បាប់អនុញ្ញាតិពីក្រសួងរៀបចំដែនដី នគរូបនីយកម្ម និងសំណង់ តាមច្បាប់កំណត់ ហើយក៏ទទួលបានច្បាប់អនុញ្ញាហើយ ទើបគាត់ហ៊ានសាងសង់។ ប៉ុន្តែអាជ្ញាធរខណ្ឌកំបូលវិញ បានចុះហាមឃាត់មិនឲ្យសាងសង់ជាបន្តបន្ទាប់ ចំនួន៣លើករួចមកហើយ ទោះបីជាគាត់ប្រាប់ថា មានច្បាប់ហើយក៏នៅតែឃាត់ដែរ និងហៅឲ្យគាត់ទៅជួបដោះស្រាយនៅសាលាខណ្ឌ ប៉ុន្តែគាត់អត់ទៅឡើយ ព្រោះពុំដឹងថា ត្រូវទៅធ្វើអី បើមិនត្រូវសុំច្បាប់នៅខណ្ឌផងនោះ ។
ស្ត្រីរូបនោះ បាននិយាយទៀតថា ដោយឡែកនៅថ្ងៃកើតហេតុ ស្រាប់តែអាជ្ញាធរចុះទៅប្រាប់ឲ្យជាងផ្អាកការងារ និងលើសម្ភារៈជាងសំណង់របស់គាត់ដាក់រថយន្ត ប្រុងដឹកទៅសាលាខណ្ឌ និងផ្ដាំតាមជាងឲ្យប្រាប់គាត់ ទៅដោះស្រាយគ្នានៅសាលាខណ្ឌ ហើយកជាង ក៏បានប្រាប់ឲ្យគាត់ដឹងតាមនោះ។ ទើបពេលនោះ គាត់បានបើករថយន្តទៅកាន់ទីតាំងនោះ ឈប់តាមផ្លូវ ប៉ុន្តែគាត់មិនបានឈប់រាំងផ្លូវនោះទេ ដោយសារតែផ្លូវទំហំត្រឹមតែជាង៣ម៉ែត្រ ហើយពេលគាត់បើករថយន្តចូលទៅ អាជ្ញាធរក៏បើករថយន្តចេញមក ទើបទុលគ្នាចេញមិនរួច ហើយគាត់ក៏ឈប់រថយន្តនៅទីនោះតែម្ដង ដើម្បីដោះស្រាយគ្នា ។
ស្ត្រីរូបនោះ ក៏ចង់ហៅអាជ្ញធរស្បថ ជាមួយគ្នាទៀតផង ប្រសិនបើចោទថា គាត់បិទផ្លូវនោះ មិនតែប៉ុណ្ណោះ គាត់បានសុំឲ្យអាជ្ញាធរសងលុយ១,១៤០,០០០រៀល ព្រោះអាជ្ញាធរ បានឲ្យជាងរបស់គាត់ ចំនួន៣៨នាក់ ផ្អាកការងារ ធ្វើឲ្យជាងទាំងនោះ មិនបានធ្វើការកន្លះថ្ងៃ ដែលបានធ្វើឲ្យគាត់ត្រូវខាតថ្លៃឈ្នួលជាងចំនួនទឹកប្រាក់ខាងលើ ទើបគាត់ទាមទារសំណងពីអាជ្ញាធរបែបនេះ ហើយគាត់ក៏សុំឲ្យអាជ្ញាធរទម្លាក់សម្ភារៈគាត់ទុកវិញ ទើបបើកផ្លូវឲ្យយករថយន្តចេញពីទីតាំងរបស់គាត់ ៕
ចែករំលែកព័តមាននេះ