ខេត្តសៀមរាប ៖ តាមរយៈការគាំទ្រក្រសួងពាក់ព័ន្ធនានា រួមជាមួយអាជ្ញាធរជាតិអប្សរា ការផ្តួចផ្តើមរៀបចំឡើង ដោយក្រុមអ្នកស្រឡាញ់អក្សរសាស្ត្រខ្មែរ ព្រឹត្តិការណ៍ «សំណេរអង្គរ» លើកទី២ នឹងប្រារព្ធឡើងនៅថ្ងៃទី១៩…
ខេត្តសៀមរាប ៖ តាមរយៈការគាំទ្រក្រសួងពាក់ព័ន្ធនានា រួមជាមួយអាជ្ញាធរជាតិអប្សរា ការផ្តួចផ្តើមរៀបចំឡើង ដោយក្រុមអ្នកស្រឡាញ់អក្សរសាស្ត្រខ្មែរ ព្រឹត្តិការណ៍ «សំណេរអង្គរ» លើកទី២ នឹងប្រារព្ធឡើងនៅថ្ងៃទី១៩ ខែមករា ឆ្នាំ២០២៥ ខាងមុខនេះ នៅបរិវេណស្ពានហាលខាងមុខប្រាសាទអង្គរវត្ត ។
លោក ឡុង កុសល អគ្គនាយករង អាជ្ញាធរជាតិអប្សរា មានប្រសាសន៍ក្នុងសន្និសីទសារព័ត៌មានស្តីពី ព្រឹត្តិការណ៍ «សំណេរអង្គរ» លើកទី២ កាលពីព្រឹកថ្ងៃទី៥ ខែមករា ឆ្នាំ២០២៥ថា កម្មវិធីសំណេរអង្គរលើកទី២នេះ ពិតជាមានអត្ថន័យយ៉ាងទូលំទូលាយជាទីបំផុត កម្មវិធីនេះស្ដែងចេញ នូវអារ្យធម៌ និងទំនៀមទម្លាប់មួយ នៃការសរសេរដោយផ្សាភ្ជាប់ទៅនឹងសេចក្តីចងចាំឡើងវិញ។ ជាពិសេសគឺបំផុស និងជំរុញឡើងវិញ នូវការសរសេរដើម្បីបង្កើនចំណេះដឹង ក៏ដូចជាចលករមួយយ៉ាងសំខាន់ក្នុងការបង្កើតនូវព្រឹត្តិការណ៍ផ្សេងៗ ដើម្បីលើកកម្ពស់វិស័យទេសចរណ៍នៅតំបន់រមណីយដ្ឋានអង្គរផងដែរ ។
ចំណែកលោក លឹម ប៊ុនហុក រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ និងជាគណៈកម្មការរៀបចំសំណេរអង្គរ បានថ្លែងថា ការអភិរក្ស និងលើកតម្លៃអក្សរសាស្ត្រខ្មែរ ពិតជាមានសារសំខាន់ ពីព្រោះខ្មែរមានភាសា និងអក្សរសាស្ត្រដ៏យូរលង់ណាស់មកហើយ។ ដោយសារតែខ្មែរ មានអក្សរជាយូរលង់មកហើយ ព្រមទាំងបានចារិកទុក នៅតាមប្រាសាទនានាផង ដូច្នេះហើយបានជា «សំណេរអង្គរ» ជាព្រឹត្តិការណ៍ដ៏សំខាន់ ក្នុងការជួយលើកកម្ពស់អក្សរសាស្ត្រខ្មែរ ពិសេសគឺជួយឱ្យប្រជាពលរដ្ឋសរសេរភាសាខ្មែរ ឱ្យបានត្រឹមត្រូវតាមក្បួនអក្ខរាវិរុទ្ធ ការអានពាក្យខ្មែរឱ្យត្រឹមត្រូវ ព្រមទាំងស្វែងរកអ្នកដែលមានស្នាដៃសរសេរអក្សរខ្មែរបានស្អាតបំផុត ។
សូមបញ្ជាក់ថា ព្រឹត្តិការណ៍សំណេរអង្គរលើកទីពីរ មានបេក្ខជនចូលរួមប្រមាណ ១,២២០នាក់ ដែលក្នុងនោះមានទាំងកុមារ អាយុ៦ឆ្នាំ និងមនុស្សចាស់អាយុ៨០ឆ្នាំ ព្រមទាំងព្រះសង្ឃ ជនបរទេស និងអនិកជនខ្មែរ ដែលរស់នៅបរទេសខ្លះទៀតផង ៕
ចែករំលែកព័តមាននេះ