តារាសម្ដែងចិនបាត់ខ្លួននៅប្រទេសថៃ ៣ថ្ងៃសង្ស័យចាញ់បោ.ក ក្រុមជួញដូរមនុស្ស
បរទេស ៖ គិតមកដល់ថ្ងៃទី០៧ ខែមករា ឆ្នាំ២០២៥ តារាសម្ដែងជនជាតិចិនរហស្សនាម Xing Xing និងមានឈ្មោះពេញ Wang…
បរទេស ៖ គិតមកដល់ថ្ងៃទី០៧ ខែមករា ឆ្នាំ២០២៥ តារាសម្ដែងជនជាតិចិនរហស្សនាម Xing Xing និងមានឈ្មោះពេញ Wang Xing បានបាត់ខ្លួននៅក្នុងប្រទេសថៃអស់រយៈពេល ៣ថ្ងៃមកហើយ បន្ទាប់ពីត្រូវបានគេរាយការណ៍ថា បានដល់ទីក្រុងបាងកក កាលពីព្រឹកព្រលឹមទៀបភ្លឺថ្ងៃទី៣ មករា ដើម្បីថតភាពយន្ត ប៉ុន្តែក៏បាត់ការទាក់ទងទាំងស្រុងត្រឹមម៉ោងជិត៣រសៀលថ្ងៃដដែលនោះ ដោយត្រូវបានគេប្រទះឃើញចុងក្រោយបង្អស់ នៅជិតព្រំដែនថៃ-មីយ៉ាន់ម៉ា ក្នុងខេត្តតាក ។
ជុំវិញព័ត៌មានបាត់ខ្លួនតារាចិន នៅប្រទេសថៃ ត្រូវបានសារព័ត៌មានបាងកកប៉ុស្តិ៍ ធ្វើបច្ចុប្បន្ននៅម៉ោង១០និង២៣នាទី ថ្ងៃទីទី០៧ ខែមករា ឆ្នាំ២០២៥ថា អាជ្ញាធរថៃនៅខេត្តតាក បានអះអាងនាថ្ងៃអង្គារនេះថា យោងតាមវីដេអូពីកាមេរ៉ាសុវត្ថិភាព គឺលោក Xingxing បានបាត់ខ្លួនតាំងពីឆ្លងព្រំដែនពីទឹកដីថៃចូលទៅប្រទេសមីយ៉ាន់ម៉ា ខណៈនេះមន្ត្រីថៃបានស្នើសុំអាជ្ញាធរទាំងអស់ នៅក្នុងប្រទេសមីយ៉ាន់ម៉ាឱ្យជួយក្នុងការស្វែងរករូបគាត់ ។
យ៉ាងណាក៏ដោយប្រភពពីសារព័ត៌មាន Jimu News និងប៉ុស្តិ៍លេខ៧ថៃ (Ch7HD) បានអះអាងថា អាជ្ញាធរមីយ៉ាន់ម៉ា បានរកឃើញ Xingxing កាលពីថ្ងៃទី៦ ខែមករា ហើយពេលនេះ សង្សារ និងក្រុមគ្រួសារអាចទាក់ទងរូបគាត់បានហើយ ដោយស្ថានអគ្គកុងស៊ុលចិនប្រចាំទីក្រុងឈៀងម៉ៃ ត្រៀមសហការជាមួយអាជ្ញាធរថៃ និងមីយ៉ាន់ម៉ា ដើម្បីនាំគាត់វិលមកប្រទេសថៃវិញនៅថ្ងៃអង្គារនេះ ។ តែអ្វីដែលគ្រប់គ្នាខ្លោចចិត្តនោះ Xingxing ត្រូវបានគេរកឃើញនៅក្នុងតំបន់ឧស្សាហកម្ម Myawaddy ហើយ សក់ក្បាលរបស់គាត់ត្រូវបានគេកោរត្រងោល ប៉ុន្តែមិនបានបញ្ជាក់លម្អិតពីមូលហេតុ ក៏ដូចជា ក្រុមមនុស្សដែលនៅពីក្រោយរឿងនេះនោះទេ ។
ពាក់ព័ន្ធនឹងការរឿងរ៉ាវដែលកើតមានចំពោះតារាប្រុសរូបនេះ គេក៏ឃើញមានតារាសម្ដែងប្រុសជនជាតិចិន ២រូបផ្សេងទៀត បានចេញមកចែករំលែកបទពិសោធន៍ដែលខ្លួនបានជួបប្រទះដោយផ្ទាល់នៅក្នុងប្រទេសថៃ ដោយពួកគេបានអះអាងថា ខ្លួនប៊ិះនឹងធ្លាក់ខ្លួនទៅជាជនរងគ្រោះនៃការឆបោករបស់ក្រុមជួញដូរមនុស្ស ។
តារាសម្តែងចិនឈ្មោះ Deng You បានបង្ហោះអត្ថបទអំពីការបាត់ខ្លួនរបស់ Xingxing កាលពីថ្ងៃទី០៦ ខែធ្នូ ដោយអះអាងថា រូបគេផ្ទាល់ក៏ធ្លាប់ជួបប្រទះនឹងការបោកប្រាស់ដូចគ្នាដែរ ជាមួយតារាសម្តែងម្នាក់ទៀត ហើយជនរងគ្រោះនឹងត្រូវបាននាំទៅប្រទេសមីយ៉ាន់ម៉ា ។
Deng You បន្តថា ក្រុមឆក់បោកទាំងនោះ បានល្បួងអោយជនរងគ្រោះធ្វើដំណើរពីប្រទេសចិនមកកាន់ទីក្រុងបាងកក ដោយចេញថ្លៃសំបុត្រយន្តហោះទាំងទៅ ទាំងមកអោយជនរងគ្រោះ ដើម្បីធានាថា ពួកគេមានសុវត្ថិភាព ប៉ុន្តែក្រោយពីជនរងគ្រោះចូលដល់រថយន្តរបស់ឧក្រិ.ដ្ឋជនទាំងនោះទើបដឹងខ្លួនថា ចា.ញ់បោកគេ ។
ទាក់ទងទៅនឹងការចែករំលែកបទពិសោធរបស់ក្រុមតារាសម្តែងចិនដែលរងគ្រោះដោយអំពើជួញដូរមនុស្សនៅក្នុងប្រទេសថៃ មន្ត្រីស្ថានទូតចិនប្រចាំទីក្រុងបាងកក ប្រទេសថៃ បានអះអាងថា ពួកគេនឹងចែករំលែករឿងរ៉ាវទាំងនេះដល់ប្រជាជនចិនតាមរយៈគ្រុប WeChat របស់ស្ថានទូត ដើម្បីជាសញ្ញាព្រមានអោយពួកគេប្រុងប្រយ័ត្ន ។
បន្ថែមលើនេះ ស្ថានអគ្គកុងស៊ុលចិនប្រចាំទីក្រុងឈៀងម៉ៃ នឹងបញ្ជូនបុគ្គលិកចុះទៅដល់ច្រកព្រំដែនថៃ-មីយ៉ាន់ម៉ា នៅក្នុងស្រុក Mae Sot ដើម្បីផ្សព្វផ្សាយព័ត៌មានទាំងនេះដើម្បីរំលឹកឱ្យប្រជាជនចិន ប្រុងប្រយ័ត្នកុំអោយធ្លាក់ខ្លួនជាជនរងគ្រោះក្នុងអំពលជួញដូរមនុស្ស ។
គួររំលឹកថា តារាសម្តែង Xingxing ត្រូវបានគេរាយការណ៍ថា បានចាកចេញពីអាកាសយានដ្ឋាន Shanghai ហើយបានមកដល់អាកាសយានដ្ឋានសុវណ្ណភូមិនៅខាងក្រៅទីក្រុងបាងកក នៅម៉ោងប្រហែល៣ទៀបភ្លឺថ្ងៃសុក្រសប្តាហ៍មុន បន្ទាប់ពីត្រូវបានអញ្ជើញឱ្យចូលរួមនៅក្នុងគម្រោងថតខ្សែភាពយន្តពីមនុស្សមួយក្រុមដែលអះអាងថា មកពីផលិតដ៏ល្បីរបស់ថៃ GMM Grammy។
Xingxing ត្រូវបានគេដឹកតាមរថយន្តធ្វើដំណើរឆ្ពោះទៅកាន់ស្រុក Mae Sot នៃខេត្តTak ហើយស្រាប់តែបាត់ខ្លួន និងបាត់ដំណឹងសូន្យតែម្តង ទើបនារីជាសង្សាររបស់លោកដែលមានឈ្មោះថា Jiajia បានចែករំលែកព័ត៌មានលម្អិតអំពីការបាត់ខ្លួនរបស់សង្សារខ្លួននៅលើវេទិកាប្រព័ន្ធផ្សព្វផ្សាយសង្គម Sina Weibo របស់ប្រទេសចិន ទើបផ្អើលដល់បណ្តាព័ត៌មានក្នុងស្រុកនិងអន្តរជាតិ ។
Jiajia បានប្តឹងប៉ូលិសសៀងហៃ ស្ថានទូតចិននៅទីក្រុងបាងកក និងស្ថានកុងស៊ុលចិននៅឈៀងម៉ៃ ហើយធ្វើដំណើរមកដាក់ពាក្យបណ្តឹងនៅទីក្រុងបាងកកកាលពីថ្ងៃចន្ទ ។
សូមជម្រាបថា តារាសម្ដែង Xingxing ត្រូវបានគេស្គាល់តាមរយៈស្នាដៃសម្ដែងក្នុងរឿងភាគទូរទស្សន៍ចិនមួយចំនួនរួមមានរឿង «Fox Spirit Matchmaker: Red Moon Pact» រឿង «The Tale of Rose» និង «Under the Skin»៕
ចែករំលែកព័តមាននេះ