ខេត្តឧត្តរមានជ័យ ៖ បន្ទាប់ពីមានការប្រយុទ្ធគ្នារវាងកងទ័ពកម្ពុជា និងកងទ័ពសៀម កាលពីថ្ងៃទី២២ មេសា រហូតមកដល់ថ្ងៃទី៤ ឧសភា ឆ្នាំ២០១១ កន្លងទៅនេះ នៅប្រាសាទតាមាន់ធំ និងប្រាសាទតាក្របី គេបានសង្កេតឃើញ កងទ័ពសៀមដែលឈរជើងនៅតាមខ្សែត្រៀម បន្ទាត់ព្រំដែនដែលឈរជើងទល់មុខកងទ័ពកម្ពុជានោះ
ខេត្តឧត្តរមានជ័យ ៖ បន្ទាប់ពីមានការប្រយុទ្ធគ្នារវាងកងទ័ពកម្ពុជា និងកងទ័ពសៀម កាលពីថ្ងៃទី២២ មេសា រហូតមកដល់ថ្ងៃទី៤ ឧសភា ឆ្នាំ២០១១ កន្លងទៅនេះ នៅប្រាសាទតាមាន់ធំ និងប្រាសាទតាក្របី គេបានសង្កេតឃើញ កងទ័ពសៀមដែលឈរជើងនៅតាមខ្សែត្រៀម បន្ទាត់ព្រំដែនដែលឈរជើងទល់មុខកងទ័ពកម្ពុជានោះ ហាក់បីដូចជាមានការប្រុងប្រយ័ត្នខ្លាំង ។ ក្រោយពីបញ្ឈប់ការវាយប្រយុទ្ធរួចមក ក្រុមទាហានសៀមបានជីកលេណដ្ឋានបន្ថែម និងយកស្បៃសំណាញ់ ពណ៌ខៀវ មកដាក់បាំងពង្រាយ នៅក្បែរៗប្រាសាទ ដែលសកម្មភាពនេះកងទ័ពកម្ពុជាបានទាមទារឱ្យរុះរើចេញ តែកងទ័ពសៀមមិនទាន់យល់ព្រមនៅឡើយទេ ។
លោកឧត្តមសេនីយ៍ត្រីនាក់ វង្ស មេបញ្ជាការរងកងពលតូចថ្មើរជើងលេខ៤២ ប្រចាំសមរភូមិទិសទី៣ ប្រាសាទតាមាន់ធំបានឱ្យកោះសន្តិភាពដឹងថា នៅតាមខ្សែត្រៀមជួរមុខ និងនៅតាមគោលដៅដែលក្រុមទាហានសៀមឈរជើង នៅទល់មុខកងទ័ពកម្ពុជាឈរជើងនោះ គឺកងទ័ព សៀមបានជីកលេណដ្ឋានជាបុគ្គល ឬលេណដ្ឋានចល័តបន្ថែមជាច្រើនទៀត ថែមទាំងយកស្បៃសំណាញ់ពណ៌ខៀវហ៊ុមព័ទ្ធបាំងតាមរបងនៅក្បែរប្រាសាទ ដោយខ្លាចកងទ័ពកម្ពុជា និងគណៈប្រតិភូចូលទៅលេងក្នុងបរិវេណប្រាសាទតាមាន់ធំមើលឃើញទីតាំងកងទ័ពឈ្លានពានរបស់ពួកគេ។
លោកឧត្តមសេនីយ៍ត្រីបានមានប្រសាសន៍បញ្ជាក់ទៀតថា កាលពីពុំទាន់មានការប្រយុទ្ធគ្នា គឺនៅក្នុងបរិវេណប្រាសាទតាមាន់ធំមានគោលការណ៍ឱ្យកងទ័ពកម្ពុជា និងសៀមទាំងសងខាងការពាររួមគ្នា បើកងទ័ពកម្ពុជាមានចំនួន៣នាក់ គឺកងទ័ពសៀមចំនួន៣នាក់ដែរ ហើយក្រោយពីមានការប៉ះទង្គិចគ្នាជាទ្រង់ទ្រាយធំកន្លងមកនេះ ក៏មានការព្រមព្រៀងដាក់កម្លាំងរៀងៗខ្លួនដូចមុនដែរ ។ តែអ្វីដែលខាងភាគីសៀមកំពុងធ្វើនោះ លោកសុំឱ្យកងទ័ពសៀមរុះរើស្បៃសំណាញ់ ពណ៌ខៀវ ដែលគេយកមកដាក់ហ៊ុមព័ទ្ធនៅក្បែរៗប្រាសាទចេញ ដើម្បីរក្សាឱ្យមានទិដ្ឋភាពដើមវិញ ព្រោះថានៅជុំវិញបរិវេណប្រាសាទនោះសម្រាប់ភ្ញៀវឡើងទៅលើប្រាសាទតាមាន់ ធំ ពួកគេក៏ចង់ទស្សនាទៅលើធម្មជាតិដែលស្ថិតនៅជុំវិញទីតាំងប្រាសាទដែរ ។ តាមសំណើនេះទាហានសៀមបានតបមកវិញថា បើឱ្យទាហានសៀមរុះរើស្បៃសំណាញ់នោះចេញកងទ័ពសៀមបានសុំឱ្យកងទ័ពកម្ពុជាលុបលេណដ្ឋានដែលជីកនៅក្បែរផ្លូវឡើងចូលប្រាសាទចោលដែរ ។ ការចរចាគ្នារវាងភាគីទាំងពីររហូតមកទល់ពេលនេះ ពុំទាន់បានដោះស្រាយត្រូវរ៉ូវនៅឡើយទេ គិតត្រឹមថ្ងៃទី២៦ មិថុនា ។ សូមបញ្ជាក់ថា នៅជុំវិញ ប្រាសាទ ភាគីសៀមមានទាហានប៉ារ៉ាកងពលលេខ៦ និងទាហានឈុតខ្មៅវរៈ២៦ ដែលឈរជើងនៅទីនោះ ៕
ចែករំលែកព័តមាននេះ