ខេត្តកំពង់ស្ពឺ ៖ មនុស្សចំនួន០២នាក់បានស្លាប់ភ្លាមៗនៅកន្លែងកើតហេតុ និងម្នាក់ទៀតបានរងរបួសធ្ងន់ ខណៈដែលរថយន្តឡិចស៊ីស៣០០បុករថយន្តដឹកទំនិញធុនធំពីក្រោយពេញទំហឹងនៅលើផ្លូវល្បឿនលឿន។ ហេតុការណ៍នេះបានកើតឡើងកាលពីវេលាម៉ោង០៣និង៤៥នាទីទៀបភ្លឺឈានចូលថ្ងៃទី៣ ខែមករា ឆ្នាំ២០២៥ លើកំណាត់ផ្លូវល្បឿនលឿន K39+200…
ខេត្តកំពង់ស្ពឺ ៖ មនុស្សចំនួន០២នាក់បានស្លាប់ភ្លាមៗនៅកន្លែងកើតហេតុ និងម្នាក់ទៀតបានរងរបួសធ្ងន់ ខណៈដែលរថយន្តឡិចស៊ីស៣០០បុករថយន្តដឹកទំនិញធុនធំពីក្រោយពេញទំហឹងនៅលើផ្លូវល្បឿនលឿន។
ហេតុការណ៍នេះបានកើតឡើងកាលពីវេលាម៉ោង០៣និង៤៥នាទីទៀបភ្លឺឈានចូលថ្ងៃទី៣ ខែមករា ឆ្នាំ២០២៥ លើកំណាត់ផ្លូវល្បឿនលឿន K39+200 ទិសដៅព្រះសីហនុទៅភ្នំពេញត្រង់ចំណុចភូមិត្រាច ឃុំកាហែង ស្រុកសំរោងទង ខេត្តកំពង់ស្ពឺ។
នគរបាលបាននិយាយឱ្យដឹងថា នៅមុនពេលកើតហេតុ មានរថយន្ត០១គ្រឿង ម៉ាកលុចស៊ីស RX300 ពណ៌ស ពាក់ផ្លាកលេខបាត់ដំបង 2B-3816 អ្នកបើកបរឈ្មោះ លី ហ៊ូវ ភេទប្រុស អាយុ ៤០ឆ្នាំ (ស្លាប់) រស់នៅភូមិពោធិ៍ខ្វិត ឃុំព្រះបាទជាន់ជុំ ស្រុកគីរីវង់ ខេត្ដតាកែវ មានអ្នករួមដំណើរជាមួយមនុស្សចំនួន០២នាក់ ទៀត ទី១-ឈ្មោះ YIN CHAOYANG ភេទប្រុស ជនជាតិចិន (ស្លាប់) និងទី០២-ឈ្មោះ DING YUMEI ភេទស្រី ជនជាតិចិន (របួសធ្ងន់) កំពុងសង្រ្គោះបន្ទាន់នៅមន្ទីរពេទ្យ។
នគរបាលបានបន្តថា បើយោងតាមកាមេរាសុវត្ថិភាពទិន្នន័យដោយផ្លូវល្បឿនលឿនរថយន្តបើកបរពីទិសខាងលិច មកពីខេត្តព្រះសីហនុ ឆ្ពោះទៅទិសខាងកើត រាជធានី ភ្នំពេញ លុះមកដល់ចំណុចខាងលើបានបុកពីក្រោយរថយន្ដដឹកទំនិញ១គ្រឿង ម៉ាកហ៊ីយ៉ិនដាយ ពណ៌ស ពាក់ផ្លាកលេខភ្នំពេញ 3D-7588 មិនស្គាល់អត្តសញ្ញាណអ្នកបើកបរ (ក្រោយហេតុការណ៍បានចុះរត់គេចខ្លួន) កំពុងបើកបរស្របទិសគ្នា ។
សមត្ថកិច្ចនគរបាលប្រចាំការផ្លូវល្បឿនលឿនបានសហការជាមួយកំលាំងជំនាញអធិការដ្ឋាននគរបាលស្រុកសំរោងទង ធ្វើការវាស់វែងអន្ដរាគមន៍ជួយសង្រ្គោះនិងបញ្ជូនជនរងគ្រោះទៅមន្ទីរពេទ្យ រីឯសពបានតំកល់ទុកនៅមន្ទីរពេទ្យបង្អែកខេត្តកំពង់ស្ពឺ រង់ចាំក្រុមគ្រួសារមកទទួលយកទៅធ្វេីបុណ្យ។
បច្ចុប្បន្ន នគរបាលបានធ្វេីការស្ទួចយករថយន្ដបង្កគ្រោះថ្នាក់ទាំង ២គ្រឿង យកទៅរក្សាទុកនៅប៉ុស្តិ៍នគរបាលរដ្ឋបាលឃុំត្រពាំងគង នៃអធិការដ្ឋាននគរបាលស្រុកសំរោងទង ដើម្បីមានចំណាត់ការបន្ដតាមផ្លូវច្បាប់ ៕
ចែករំលែកព័តមាននេះ