ទីក្រុងកៀវ៖ ស្ដាប់ទៅគួរឱ្យរន្ធត់ជាពន់ពេកនៅពេលអ៊ុយក្រែនថ្លែងថារុស្ស៊ីដោយហេតុតែចង់វាយបណ្ដេញអ៊ុយក្រែនចេញឱ្យផុតពីតំបន់ខឺសទាំងស្រុងមុនពេលលោកត្រាំស្បថចូលកាន់តំណែងនោះ ពួកគេ (រុស្ស៊ី) បានពលីជីវិតយុទ្ធជនជាច្រើន។ អគ្គបញ្ជាការកងទ័ពអ៊ុយក្រែន ឧត្ដមសេនីយ៍អូឡិចសាន់ដឺស ស៊ីស្គី (Oleksandr Syrskyi)…
ទីក្រុងកៀវ៖ ស្ដាប់ទៅគួរឱ្យរន្ធត់ជាពន់ពេកនៅពេលអ៊ុយក្រែនថ្លែងថារុស្ស៊ីដោយហេតុតែចង់វាយបណ្ដេញអ៊ុយក្រែនចេញឱ្យផុតពីតំបន់ខឺសទាំងស្រុងមុនពេលលោកត្រាំស្បថចូលកាន់តំណែងនោះ ពួកគេ (រុស្ស៊ី) បានពលីជីវិតយុទ្ធជនជាច្រើន។ អគ្គបញ្ជាការកងទ័ពអ៊ុយក្រែន ឧត្ដមសេនីយ៍អូឡិចសាន់ដឺស ស៊ីស្គី (Oleksandr Syrskyi) បានដកស្រង់របាយការណ៍របស់ប្រភពសម្ងាត់យោធាមកនិយាយថា «រុស្ស៊ីបាត់បង់កម្លាំងប្រយុទ្ធយ៉ាងតិច៣,៨ម៉ឺននាក់» គិតទាំងស្លាប់ និងរបួសនៅខឺស។
ចំនួនខាងលើនេះគិតត្រឹមរយៈពេលជាង៤ខែនេះចាប់តាំងពីអ៊ុយក្រែនវាយឆ្មក់ចូលតំបន់នោះកាលពីខែសីហា ឆ្នាំ២០២៤។ បើដូចអ្វីដែលអ៊ុយក្រែនអះអាងមែន ខឺសក្លាយជាទីលានបញ្ចុះសពយុទ្ធជនទាំងសងខាង។ សូម្បីតែកូរ៉េខាងជើងដែលមិនជាប់ពាក់ព័ន្ធនឹងខ្លួនសោះ ប៉ុន្តែដើម្បីបង្ហាញអំពីភក្ដីភាព និងមិត្តដែកថែបរបស់ខ្លួនរវាងម៉ូស្គូ និងព្យុងយ៉ាង លោកគីមជុងអ៊ុនបានបញ្ជូនទ័ពទៅខឺសជាង១,២ម៉ឺននាក់ដោយយោងតាមប្រភពសម្ងាត់ពីអ៊ុយក្រែន, កូរ៉េខាងត្បូង និងបស្ចិមប្រទេស។
ប្រមុខដឹកនាំអ៊ុយក្រែន លោកហ្សេឡិនស្គី ថ្លែងថាត្រឹមតែមួយរយៈពេលខ្លីប៉ុណ្ណោះ កូរ៉េខាងជើងបាត់បង់កម្លាំងប្រយុទ្ធជាងបីពាន់នាក់គិតទាំងស្លាប់ និងរបួស។ ប៉ុន្តែលោកលែងខ្វល់ថាកូរ៉េខាងជើង ឬរុស្ស៊ីហើយ ឱ្យតែត្រូវគីឡូគ្នាត្រូវតែប្រយុទ្ធគ្នាមួយអស់ដៃព្រោះពួកគេបញ្ជូនទ័ពមកដោយខ្លួនឯងទេ គ្មាននរណាបបួល ឬបង្ខិតបង្ខំពួកគេឱ្យមកប្រយុទ្ធទល់នឹងអ៊ុយក្រែនឡើយ។
គេមិនទាន់ដឹងថាតើការអះអាងរបស់អគ្គបញ្ជាការកងទ័ពអ៊ុយក្រែនមានការពិតកម្រិតណាទេព្រោះរុស្ស៊ីរក្សាភាពស្ងៀមស្ងាត់។ ក្រៅពីចំនួនកងទ័ពខាងលើនេះ រុស្ស៊ីក៏បានបាត់បង់គ្រឿងបរិក្ខារយោធាជាងមួយពាន់គ្រឿងផងដែរ។ ក្រៅពីនេះ យុទ្ធជនរុស្ស៊ីរាប់រយនាក់ត្រូវអ៊ុយក្រែនចាប់បានជាឈ្លើយសឹកដើម្បីទុកដូរគ្នានៅពេលឱកាសល្អមកដល់។ ជាពិសេស ពេលមានបុណ្យ-ទានផ្សេងៗដូចជាបុណ្យគ្រីសស្មាស់ និងចូលឆ្នាំសាកលជាដើម។
សូមរំលឹកថាអ៊ុយក្រែនវាយឆ្មក់ដ៏គួរឱ្យភ្ញាក់ផ្អើលចូលតំបន់ខឺសកាលពីថ្ងៃទី៦ ខែសីហា ឆ្នាំ២០២៤ និងចូលកាន់កាប់បាន១,៣ពាន់គីឡូម៉ែត្រការ៉េ។ មុនដំបូង រុស្ស៊ីបណ្ដោយឱ្យពួកគេលុកលុយជាបណ្ដោះអាសន្នសិនចុះ។ ប៉ុន្តែនៅពេលដឹងថាលោកត្រាំឈ្នះឆ្នោត រុស្ស៊ីក៏ដាក់ផែនការវាយរំដោះបានពាក់កណ្ដាលមកវិញហើយ។ ក្រោយមក អ៊ុយក្រែនបង្ហើបអាថ៌កំបាំងថាខ្លួនចង់ហែកកម្លាំងរបស់រុស្ស៊ីខ្លះដើម្បីកុំឱ្យពួកគេវាយលុកខ្លាំងពេកទៅលើប្រទេសអ៊ុយក្រែនភាគខាងកើត។
ប៉ុន្តែរុស្ស៊ីមិនបានធ្វើតាមការបញ្ឆោតនោះទេ។ រុស្ស៊ីចង់ផ្ដោតសំខាន់ទៅលើសមរភូមិអ៊ុយក្រែន។ ដូចនេះ កងទ័ពរុស្ស៊ីដែលបំពេញបេសកកម្មនៅអ៊ុយក្រែនត្រូវរក្សាទុកដដែល ហើយរុស្ស៊ីសុខចិត្តហៅកងទ័ពកូរ៉េខាងជើងមកជួយច្បាំងនៅខឺស។ មេបញ្ជាការរងកងទ័ពជើងទឹកអាមេរិកចូលនិវត្តថ្លែងថាតួលេខស្លាប់ និងរបួសនេះបង្ហាញថាសង្គ្រាមអ៊ុយក្រែនបន្តឆាបឆេះយ៉ាងក្ដៅគគុក។ លោកយល់ថារុស្ស៊ីបាត់បង់កម្លាំងប្រយុទ្ធអស់ច្រើន ហើយមិនអាចធ្វើកំណែនទាន់ពេលវេលាទេ ទើបបានជាកងទ័ពកូរ៉េខាងជើងទៅជួយច្បាំង។
អ៊ុយក្រែនសង្ឃឹមថាខ្លួនអាចស៊ូទ្រាំនឹងការវាយលុករបស់រុស្ស៊ីនៅតំបន់ខឺស ហើយនឹងបន្តកាន់កាប់ទឹកដីមួយផ្នែកនៅទីនោះក្រោយពេលលោកត្រាំឡើងកាន់អំណាច។ ធ្វើបែបនេះដើម្បីឱ្យមានទម្ងន់នៅក្នុងការចរចាគ្នា។ នៅសល់១៧ថ្ងៃទៀត មិនដឹងថាតើរុស្ស៊ីអាចវាយយកតំបន់នេះ១០០%មកវិញ ឬយ៉ាងណា។ សម្រាប់អ៊ុយក្រែន ដើម្បីបន្តកាន់កាប់ទីនោះ ពួកគេក៏ត្រូវតែបង់នូវតម្លៃដ៏ខ្ពស់ផងដែរ។ ប្រភពសម្ងាត់អះអាងថារុស្ស៊ីបានដាក់ពង្រាយកងទ័ពក្រាស់ឃ្មឹករហូតដល់៥ម៉ឺននាក់។ នេះមិនទាន់គិតដល់កងទ័ពកូរ៉េខាងជើងដែលត្រៀមបញ្ជូនទៅថែមទៀតដើម្បីជំនួសកងទ័ពដែលបានស្លាប់ និងរបួស៕
ចែករំលែកព័តមាននេះ