ខេត្តកំពង់ស្ពឺ ៖ ជនសង្ស័យម្នាក់ត្រូវបានកម្លាំងនគរបាលស្រុកថ្ពងដឹកនាំដោយលោក វរសេនីយ៍ឯក ហ៊ុន សុខហុន បានសហការជាមួយកម្លាំងនគរបាលស្រុកសាមគ្គីមានជ័យនៃខេត្តកំពង់ឆ្នាំងធ្វើការឃាត់ខ្លួនបាន ខណៈដែលជនសង្ស័យបានធ្វើសកម្មភាពលួចម៉ូតូជនរងគ្រោះពីស្រុកថ្ពងនៃខេត្តកំពង់ស្ពឺ ហើយព្យាយាមជិះគេចខ្លួនទៅដល់ខេត្តកំពង់ឆ្នាំង។

ការឃាត់ខ្លួនជនសង្ស័យជាចោរលួចម៉ូតូបានកាលពីល្ងាចថ្ងៃទី៣១ ខែធ្នូ ឆ្នាំ២០២៤ នៅក្នុងស្រុកសាមគ្គីមានជ័យ ខេត្តកំពុងឆ្នាំង។

លោកវរសេនីយ៍ឯក ហ៊ុន សុខហុន អធិការនគរបាលស្រុកថ្ពងបាននិយាយឱ្យដឹងថាជនសង្ស័យដែលឃាត់ខ្លួនបានមានឈ្មោះ កឺ រិន ភេទប្រុស អាយុ២៨ ឆ្នាំមុខរបរមិនពិតប្រាកដ រស់នៅក្នុងភូមិខ្នាច ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង។

លោកវរសេនីយ៍ឯក ហ៊ុន សុខហុន អធិការនគរបាលស្រុកថ្ពងបានបន្តទៀតថា កាលពីវេលាម៉ោង០៤និង៣០នាទីរសៀលថ្ងៃទី៣០ខែធ្នូ ឆ្នាំ២០២៤ នៅចំណុចមាត់ស្ទឹងស្ថិតនៅក្នុងភូមិស្យា ឃុំ វាលពន់ ស្រុកថ្ពង ខេត្តកំពង់ស្ពឺមានករណីចោរលួចម៉ូតូ០១គ្រឿង ម៉ាកC125 ពណ៌ខ្មៅ ស៊េរីឆ្នាំ២០១៩ ពាក់ស្លាកលេខស្វាយរៀង1M.4561 ជាកម្មសិទ្និរបស់ឈ្មោះ អ៊ុច ញ៉ុយ ភេទ ប្រុស អាយុ២៥ឆ្នាំមុខរបរកម្មករបូមខ្សាច់ រស់នៅភូមិព្រៃមិច ឃុំ វាលពន់ ស្រុក ថ្ពងខេត្ត កំពង់ស្ពឺ។

លោកអធិការនគរបាលស្រុកថ្ពងបានបន្តទៀតថា នៅមុនពេលកេីតហេតុជនរងគ្រោះបានទុកម៉ូតូនូវមាត់ស្ទឹងរួចចុះទៅបូមខ្សាច់ក្នុងស្ទឹងស្ថិតនៅចំណុចខាងកេីតហេតុខាងលើ ចំងាយ១៥០ម៉ែត្រមានជនសង្ស័យម្នាក់មិនស្គាល់អត្តសញ្ញាណបានមកសុំទឹកហូបពេលដែលម្ចាស់ម៉ូតូចុះទៅបូមខ្សាច់នៅក្នុងស្ទឹង រួចជនសង្ស័យបានលួចសោរម៉ូតូដែលម្ចាស់ទុកនៅលេីមែកឬស្សីក្បែរនោះ រួចជនសង្ស័យក៏បានជិះម៉ូតូគេចខ្លួន ។ ស្របពេលនោះអ្នកបើកឡានដឹកខ្សាច់ឃេីញក៏រត់តាមស្រែកថាចោរៗ រួចម្ចាស់ម៉ូតូបានឮសូសម្លែងស្រែកថាចោរៗនោះ ក៏រត់ពីក្នុងស្ទឹងទៅតាម ជាមួយម្ចាស់ឡានរហូតដល់ក្នុងភូមិ ម្ចាស់ឡានដឹកខ្សាច់ក៏បានខ្ចីម៉ូតូគេជិះតាមពីក្រោយរហូតដល់ចំណុចផ្សារត្រាចក្នុងស្រុកសាមគ្គីមានជ័យ ខេត្តកំពង់ឆ្នាំង ក៏បាត់ជនសង្ស័យទៅ។

លោកអធិការស្រុកថ្ពងបានបញ្ជាក់ថា ថ្ងៃទី៣១ ខែធ្នូ ឆ្នាំ២០២៤ កំលាំងជំនាញរបស់លោកបានចុះស្រាវជ្រាវដល់កន្លែងកើតហេតុ ហើយបានកំណត់មុខសញ្ញា រួចបានសហការ ជាមួយកំលាំងអធិការនគរបាលស្រុកសាមគ្គីមានជ័យ ខេត្តកំពុងឆ្នាំង ធ្វើការឃាត់ខ្លួនជនសង្ស័យម្នាក់ឈ្មោះ កឺ រិន ភេទប្រុស អាយុ២៨ឆ្នាំ រស់នៅភូមិខ្នាច ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង។

បច្ចុប្បន្នជនសង្ស័យរួមជាមួយ និងវត្ថុតាងបញ្ជូនទៅកាន់ការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមផ្លូវច្បាប់៕