រាជធានីភ្នំពេញ ៖ យុវជនម្នាក់ និងក្មេងប្រុសម្នាក់ បានធ្វើសកម្មភាពលួចអាគុយរថយន្តរបស់ប្រធានសន្តិសុខ នៅទីលានចាក់សំរាម ដែលទុកនៅក្នុងរោងជាងជួសជុលរថយន្តមួយកន្លែងនៅទីនោះ។ លុះពេលលួចបានហើយ យកទៅចាក់ទឹកអាស៊ីតចោល ដើម្បីយកទៅលក់អេតចាយ…
រាជធានីភ្នំពេញ ៖ យុវជនម្នាក់ និងក្មេងប្រុសម្នាក់ បានធ្វើសកម្មភាពលួចអាគុយរថយន្តរបស់ប្រធានសន្តិសុខ នៅទីលានចាក់សំរាម ដែលទុកនៅក្នុងរោងជាងជួសជុលរថយន្តមួយកន្លែងនៅទីនោះ។ លុះពេលលួចបានហើយ យកទៅចាក់ទឹកអាស៊ីតចោល ដើម្បីយកទៅលក់អេតចាយ ប៉ុន្តែត្រូវបានម្ចាស់ឆែកកាមេរ៉ាសុវត្ថិភាពឃើញ ក៏បានតាមឃាត់ខ្លួនបាន រួចប្រគល់ជូននគរបាល ចាត់ការតាមច្បាប់តែម្ដង ។
ការឃាត់ខ្លួននោះបានធ្វើឡើងកាលពីវេលាម៉ោង០៧និង៣០នាទីព្រឹកថ្ងៃទី៣០ ខែធ្នូ ឆ្នាំ២០២៤ នៅត្រង់ចំណុចរោងទុកចោលលើទីលានចាក់សំរាម តាមផ្លូវបេតុង ស្ថិតនៅក្នុងភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ ។
ជនសង្ស័យម្នាក់ឈ្មោះ គង់ ប៊ុននី អាយុ១៨ឆ្នាំ ស្នាក់នៅលើទីលានចាក់សំរាមខាងលើ និងម្នាក់ទៀតឈ្មោះ ផន ដាវីត អាយុ១៥ឆ្នាំ មុខរបររើសអេតចាយ មានទីលំនៅភូមិរលួស សង្កាត់ជើងឯក ខណ្ឌដង្កោ រាជធានីភ្នំពេញ ។
ដោយឡែកម្ចាស់អាគុយឈ្មោះ ថន ធា ភេទប្រុស អាយុ៤៥ឆ្នាំ មុខរបរជាប្រធានសន្តិសុខ និងជាអ្នកមើលការខុសត្រូវនៅលើទីលានចាក់សំរាម គាត់ក៏បានដកហូតយកអាគុយម៉ាក OSAKI ពណ៌ខ្មៅ១គ្រឿងរបស់ខ្លួនបានមកវិញផងដែរ ។
សមត្ថកិច្ចបានប្រាប់ឲ្យដឹងថា កាលពីថ្ងៃទី២៩ ខែធ្នូ ឆ្នាំ២០២៤ វេលាម៉ោង២៣និង១០នាទីយប់ បុរសម្នាក់ឈ្មោះ ឃិន ចាន់មករា អាយុ៥០ឆ្នាំ ដែលជាសន្តិសុខ បានដើរល្បាតមើលលើទីលានចាក់សំរាមនោះ ។ ខណៈពេលទៅដល់រោងជាង ស្រាប់តែបាត់អាគុយម៉ាក OSAKI ខាងលើ ក៏បានប្រាប់ទៅឈ្មោះ ថន ធា ដែលជាប្រធានសន្តិសុខរបស់ខ្លួន និងជាម្ចាស់អាគុយឲ្យបានដឹង បន្ទាប់មកបាននាំគ្នាឆែកមើលកាមេរ៉ាសុវត្ថិភាព ដែលបំពាក់នៅកន្លែងកើតហេតុ ។
សមត្ថកិច្ចបានប្រាប់ឲ្យដឹងបន្តទៀតថា ពេលនោះបានឃើញជនសង្ស័យទាំង២នាក់ខាងលើ គឺជាអ្នកចូលទៅលួច រួចក៏បានតាមរកភ្លាមៗ ហើយរហូតដល់វេលាម៉ោង០៧និង៣០នាទី ថ្ងៃទី៣០ ខែធ្នូ ឆ្នាំ២០២៤ ទើបប្រទះឃើញជនសង្ស័យទាំង០២នាក់ខាងលើរួម និងអាគុយរបស់ខ្លួន ដែលបានលួចទៅផងដែរ ។ បន្ទាប់មកប្រធានសន្តិសុខរូបនោះ ក៏បានឃាត់ខ្លួនប្រគល់ឲ្យនគរបាលប៉ុស្តិ៍រដ្ឋបាលដង្កោ ធ្វើការសាកសួរ ហើយជនសង្ស័យបានឆ្លើយសារភាពថា ពួកខ្លួនពិតជាបានធ្វើសកម្មភាពលួចអាគុយម៉ាក OSAKI នោះមែន ។
ជនសង្ស័យបាននិយាយបន្តទៀតថា ពេលលួចបានហើយពួកខ្លួនបានបើកគំរបចាក់ទឹកអាស៊ីតចេញអស់ ដើម្បីទុកលក់អេតចាយ ស្រាប់តែម្ចាស់ទៅទៅទាន់ឃាត់ខ្លួនបានទាំង២នាក់បែបនេះតែម្ដង ។ ចំណែកលោក ថន ធា ដែលជាម្ចាស់អាគុយ ក្រោយពីប្រគល់ជនសង្ស័យជូននគរបាលរួច ក៏បានដាក់ពាក្យបណ្តឹងឲ្យនគរបាលចាត់ការតាមច្បាប់ដោយមិនលើកលែងឡើយ ។
បន្ទាប់ពីមានចម្លើយសារភាពរបស់ជនសង្ស័យ ហើយមានការសម្របសម្រួលពីលោកស្រី ផាត់ សុគន្ធា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ នគរបាលព្រហ្មទណ្ឌនៃអធិការដ្ឋានខណ្ឌដង្កោ ក៏បានឃាត់ខ្លួនជនសង្ស័យ និងកសាងសំណុំរឿងចាត់ការតាមផ្លូវច្បាប់ហើយ ៕
ចែករំលែកព័តមាននេះ