រថយន្តយីឌុប បុកម៉ូតូពីក្រោយ កិនយុវជនម្នាក់ស្លា.ប់ភ្លាមៗ
រាជធានីភ្នំពេញ ៖ រថយន្តយីឌុប ១គ្រឿង បើកបរក្នុងល្បឿនលឿន ហើយពុំដឹងថា អ្នកបើកបស្រវឹងស្រា ឬក៏បែបណានោះទេ បានជ្រុលទៅបុក និងកិនម៉ូតូ…
រាជធានីភ្នំពេញ ៖ រថយន្តយីឌុប ១គ្រឿង បើកបរក្នុងល្បឿនលឿន ហើយពុំដឹងថា អ្នកបើកបស្រវឹងស្រា ឬក៏បែបណានោះទេ បានជ្រុលទៅបុក និងកិនម៉ូតូ ១គ្រឿងពីក្រោយ បណ្ដាលឲ្យម៉ូតូជាប់ក្រោមរថយន្ត។ ចំណែកយុវជនអ្នកជិះម៉ូតូម្នាក់ បានខ្ទាតចេញបោកក្បាលផ្ទប់ថ្នល់ស្លា.ប់បាត់បង់ជីវិតភ្លាមៗនៅនឹងកន្លែងក្បែររថយន្ត និងទ្រូងផ្លូវ ហើយអ្នកបើកបររថយន្តចុះរត់គេចខ្លួនបាត់ស្រមោល ។
ឧប្បត្តិហេតុនោះ បានកើតឡើងកាលពីវេលាម៉ោង៣និង២៥នាទីរសៀលថ្ងៃទី៣០ ខែធ្នូ ឆ្នាំ២០២៤ នៅតាមផ្លូវជាតិលេខ៤ ស្ថិតនៅក្នុងភូមិជម្ពូវ័ន១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
រថយន្តបង្កធន់ធំ ១គ្រឿងនោះ ម៉ាកហ៊ីយ៉ាន់ដាយ ប្រភេទយីឌុបពណ៍ស លាយខៀវ ពាក់ស្លាកលេខកំពង់ចាម 3A-4005 ។ ចំណែកយុវជនរងគ្រោះឈ្មោះ គុណ សុវណ្ណា អាយុ១៧ឆ្នាំ មុខរបរបុគ្គលិកផែស្ងូតតេងឡាយ មានទីលំនៅភូមិសន្សំកុសល សង្កាត់បឹងទំពន់ទី១ ខណ្ឌមានជ័យ រាជធានីភ្នំពេញ ។
អ្នកដំណើរតាមផ្លូវខាងលើ បាននិយាយថា នៅមុនពេលកើតហេតុគាត់បានឃើញយុវជនរងគ្រោះ ជិះម៉ូតូ ១គ្រឿង ម៉ាកហុងដាឌ្រីមសេ១២៥ ស៊េរីឆ្នាំ២០២៤ ពណ៍ខ្មៅពាក់ស្លាកលេខភ្នំពេញ 1KY2419 ធ្វើដំណើរក្នុងទិសដៅពីលិចទៅកើត លុះពេលទៅដល់ត្រង់ចំណុចកើតហេតុ ស្រាប់តែឃើញរថយន្តខាងលើ បើកបរក្នុងទិសដៅស្របគ្នាទៅដល់ ហើយពុំដឹងថា អ្នកបើកបររថយន្តនោះស្រវឹងស្រាទាំងថ្ងៃ ឬបែបណាទេ បើកលឿនដូចហោះ ជ្រុលទៅបុកម៉ូតូពីក្រោយពេញទំហឹង បណ្ដាលឲ្យម៉ូតូគាបជាប់ខាងក្រោមរថយន្ត ហើយយុវជនអ្នកជិះម៉ូតូដួលបោក និងថ្នល់ស្លាប់ភ្លាមៗនៅនឹងកន្លែងតែម្ដង ។
ប្រភពដដែលបាននិយាយបន្តទៀតថា ក្រោយពេលដឹងថា បុកនិងកិនអ្នកជិះម៉ូតូស្លាប់ហើយ អ្នកបើកបររថយន្តបង្កខាងលើ បានចុះរត់គេចខ្លួនចោលរថយន្តបាត់ស្រមោល ។ បន្ទាប់មកនគរបាលប៉ុស្តិ៍ចោមចៅទី៣ និងនគរបាលបានចុះទៅដល់កន្លែងកើតហេតុ រួចរាយការណ៍ជូននគរបាលការិយាល័ចរាចរផ្លូវគោកនៃស្នងការដ្ឋានរាជធានីភ្នំពេញ ។ ដើម្បីឲ្យចុះទៅធ្វើកំណត់ហេតុប្រគល់សពជូនក្រុមគ្រួសារយកទៅធ្វើបុណ្យ និងធ្វើការវាស់វែង នាំយករថយន្តនិងម៉ូតូយកទៅរក្សាទុករងចាំដោះស្រាយគ្នាតាមច្បាប់នៅពេលក្រោយ ៕
ចែករំលែកព័តមាននេះ